Read Biblia Revisión Chuya Qellqa 1992 – Chuya Qellqa 1992 Números 2 Bible Online

Números 2 - Biblia Revisión Chuya Qellqa 1992 – Chuya Qellqa 1992 bible

Números 2

¹Moisestawan Aarontam Tayta Dios kaynata nirqa:

²Israelpa mirayninkunaqa, asuykamuwanaykichik carpapa karu muyuriqninpim, sapakama maymi banderankupa kasqanpi chaynataq ayllunkupa señalninman hina samanqaku.

³Carpapa ñawpaqninpim otaq intipa qespimunan lawninpim, banderankuman hina Judá ayllu tropa-tropa samanqa. Judá ayllupa kamachiqninmi karqa Aminadabpa churin Naasón.

⁴Judapa tropankunamantam yupasqankuman hina qanchis chunka tawayuq waranqa soqta pachaknin qarikuna karqaku.

⁵Judá ayllupa alleq lawninpim Isacar ayllu samanqa. Isacar ayllupa capitanninmi karqa Zuarpa churin Natanael.

⁶Isacarpa tropankunamantam yupasqankuman hina pichqa chunka tawayuq waranqa tawa pachaknin qarikuna karqaku.

⁷Judá ayllupa ichoq lawninpim Zabulón ayllu samanqa. Zabulonpa mirayninkunapa capitanninmi karqa Helonpa churin Eliab.

⁸Paypa tropankunam yupasqankuman hina pichqa chunka qanchisniyuq waranqa tawa pachaknin qarikuna karqaku.

⁹Chaynaqa, Judapa campamentonmantam yupasqankuman hina pachak pusaq chunka soqtayuq waranqa tawa pachaknin qarikuna karqaku. Paykunam Israelpa ñawpaqninta rirqaku.

¹⁰Rubén ayllupa banderanmi, carpapa sur lawninpi otaq alleq lawninpi kanqa. Rubén ayllupa capitanninmi karqa Sedeurpa churin Elisur.

¹¹Paypa tropankunam yupasqankuman hina tawa chunka soqtayuq waranqa pichqa pachaknin qarikuna karqaku.

¹²Rubén ayllupa alleq lawninpim Simeón ayllu samanqa. Simeonpa mirayninkunapa capitanninmi karqa Zurisadaipa churin Selumiel.

¹³Paypa tropankunam yupasqankuman hina pichqa chunka isqonniyuq waranqa kimsa pachaknin qarikuna karqaku.

¹⁴Rubén ayllupa ichoq lawninpim Gad ayllu samanqa. Gadpa mirayninkunapa capitanninmi karqa Deuelpa churin Eliasaf.

¹⁵Paypa tropankunam yupasqankuman hina tawa chunka pichqayuq waranqa soqta pachak pichqa chunka qarikuna karqaku.

¹⁶Chaynaqa, Rubenpa campamentomantam yupasqankuman hina, pachak pichqa chunka hukniyuq waranqa tawa pachak pichqa chunka qarikuna karqaku. Paykunam Judá ayllupa qepanta rinqaku.

¹⁷Paykunapa qepantañataqmi otaq chay tawa campamentopa chawpintañataqmi ñoqaman asuykamuwanaykichik carpata aparikuspa Leví ayllu rinqa. Samasqankuman hinam sapakama banderankuman hina rinqaku.

¹⁸Efraín ayllupa banderanmi, carpapa inti seqaykunan lawninpi otaq carpapa qepanpi samanqa. Efraín ayllukunapa capitanninmi karqa Amiudpa churin Elisama.

¹⁹Paypa tropankunam yupasqankuman hina tawa chunka waranqa pichqa pachaknin qarikuna karqaku.

²⁰Efraín ayllupa alleq lawninpim Manasés ayllu samanqa. Manasés ayllupa capitanninmi karqa Pedasurpa churin Gamaliel.

²¹Paypa tropankunam yupasqankuman hina kimsa chunka iskayniyuq waranqa iskay pachaknin qarikuna karqaku.

²²Efraín ayllupa ichoq lawninpim Benjamín ayllu samanqa. Benjamín ayllupa capitanninmi karqa Gedeonipa churin Abidán.

²³Paypa tropankunam yupasqankuman hina kimsa chunka pichqayuq waranqa tawa pachaknin qarikuna karqaku.

²⁴Chaynaqa, Efrainpa campamentonmantam yupasqankuman hina pachak pusaqniyuq waranqa pachaknin qarikuna karqaku. Paykunam Leví ayllupa qepanta rinqaku.

²⁵Dan ayllupa banderanmi, carpapa norte lawninpi otaq ichoq lawninpi samanqa. Dan ayllupa capitanninmi karqa Amisadaipa churin Ahiezer.

²⁶Paypa tropankunam yupasqankuman hina soqta chunka iskayniyuq waranqa qanchis pachaknin qarikuna karqaku.

²⁷Dan ayllupa alleq lawninpim Aser ayllu samanqa. Aserpa capitanninmi karqa Ocranpa churin Pagiel.

²⁸Paypa tropankunam yupasqankuman hina tawa chunka hukniyuq waranqa pichqa pachaknin qarikuna karqaku.

²⁹Dan ayllupa ichoq lawninpim Neftalí ayllu samanqa. Neftalí ayllupa capitanninmi karqa Enanpa churin Ahira.

³⁰Paypa tropankunam yupasqankuman hina pichqa chunka kimsayuq waranqa tawa pachaknin qarikuna karqaku.

³¹Chaynaqa, Danpa campamentonmantam yupasqankuman hina pachak pichqa chunka qanchisniyuq waranqa soqta pachaknin qarikuna karqaku. Paykunam chay kimsa campamentopa qepanta banderankuwan kuska rinqaku.

³²Chaynaqa, ayllunkuman hina chaynataq campamentonkuman hina Israelpa mirayninkunata yuparuptinkum soqta pachak kimsayuq waranqa pichqa pachak pichqa chunka qarikuna karqaku.

³³Leví ayllutam ichaqa, Moisesman Tayta Diospa kamachisqanman hina mana yuparqakuchu.

³⁴Moisesman Tayta Diospa kamachisqanta hinam Israelpa mirayninkuna ruwarqaku. Paykunaqa sapakamam maymi banderankupa kasqanpi samarqaku hinaspa ayllunkuman hina rirqaku.