Read Biblia Revisión Chuya Qellqa 1992 – Chuya Qellqa 1992 Números 24 Bible Online

Números 24 - Biblia Revisión Chuya Qellqa 1992 – Chuya Qellqa 1992 bible

Números 24

¹Israel runakunata Tayta Dios bendeciykuy munasqanta Balaam yacharuspanmi manaña wakin kutikunapi hinaqa Diospa imam nimunanta uyariq rirqañachu, aswanqa chunniq lawman qawarispanmi,

²Israelpa mirayninkunata ayllupuralla samasqankuta rikururqa, hinaptinmi Diospa Espiritun Balaamman huntaykurqa.

³Chaymi Balaam kaynata profetizarqa: Ñoqaqa Beorpa churin Balaammi kani, ñoqaqa imakunatapas allintam rikuni,

⁴Diospa rimasqankunata uyariqmi, Tukuy Atiyniyuq Tayta Diospa qawachisqanta rikuqmi kaynata nini:

⁵Jacobpa mirayninkuna, ¡mayna kuyayllapaqmi carpaykikunaqa! Israelpa mirayninkuna, ¡mayna kuyayllapaqmi yachanaykikunaqa!

⁶Qamkunaqa rikchakunkichik seqella plantasqa palmerakunamanmi, mayu patanpi huertakunamanmi, Tayta Diospa plantasqan áloes sachakunamanmi yaku patanpi cedro sachakunamanmi.

⁷Israelpa mirayninkunaqa yakumantapas manam muchunqakuchu, tarpukuyninkupaqpas manam yaku pisinqachu. Reyninkupas rey Agagpa hawanpim munaychakunqa, paypa munaychakuyninqa hatunmi kanqa.

⁸Paykunataqa Diosmi Egipto nacionmanta hurqomurqa, búfalo hina kallpasapallañam payqa. Israel runakunaqa Enemigon nacionkunatapas pasaypaqtam chinkachinqa, tulluntapas ñutuypaqmi ñutuparunqa, flechankunawanmi tuksiypaq tuksiparunqa.

⁹ Israelqa león hinaraqmi kurkuykunpas, china león hinaraqmi waqtapanpas, ¿Pitaq rikchachiyta atinman? ¡Bendecisuqnikikuna bendecisqa kachun! ¡Ñakasuqnikikuna ñakasqa kachun! nispa.

¹⁰Balaampa nisqanta uyarispanmi rey Balac anchallataña piñakurqa, piñakuymanta makintapas taqllakuspanmi Balaamta nirqa: Enemigoykunata ñakanaykipaqmi qayachimurqayki, aswanqa kimsakamañam paykunata bendeciykunki.

¹¹Chaynaqa, wasikiman ripuy. Ñoqaqa ancha reqsisqatam ruwaykiman karqa, aswanqa Tayta Diosmi harkakurun, nispa.

¹²Chaymi Balaam nirqa: Ñoqapas kachamuwasqayki runakunataqa nimurqaniñam:

¹³“Yachasqayki palaciopi huntataña qorita qollqeta qowaptikipas, Tayta Diospa kamachiwasqanpa contranpiqa manam imatapas ruwaymanchu. Allin kaqtapas otaq mana allin kaqtapas kikillaymantaqa manam ruwaymanchu, Tayta Diospa niwasqallantam rimasaq nispay”.

¹⁴Kunanqa llaqtaymanmi kutikusaq, ichaqa hamuq punchawkunapi runaykikunata wak runakuna imam ruwananmantayá willaykusqayki, nispa.

¹⁵Hinaspam kaynata profetizarqa: Ñoqaqa Beorpa churin Balaammi kani, ñoqaqa imakunapas rikuqmi kani,

¹⁶Diospa rimasqankunata uyariqmi kani, tukuy imapa hawanpi munaychakuq Diospa yachasqanta reqsiqmi kani, Tukuy Atiyniyuq Diospa qawachisqanta rikuqmi kani, mosqoypi revelacionkunata chaskiqmi kani.

¹⁷Rikuchkanim, ichaqa manam kunan kaqtachu, qawachkanim ichaqa manam hichpallapi kaqtachu: Jacobpa mirayninmantam huk chaska lloqsimunqa, Israel ayllumantam munaychakuq [6]Rey hatarimunqa, Moab runakunapa umantam taqñunqa, Setpa mirayninkunatam chinkachinqa.

¹⁸Edompa allpantam hapikuykunqa, Seir orqopi kaq enemigonkunatam vencenqa. Israelpa mirayninkunaqa atiywanmi imatapas ruwanqaku,

¹⁹Jacobpa mirayninmantam munaychakuq lloqsinqa, payqa llaqtapi puchuqkunatam chinkachinqa, nispa.

²⁰Amalec runakunapa allpan lawman Balaam qawarispanmi kaynata profetizarqa: Amalec nacionqa wakin nacionkunamantapas ancha reqsisqam, ichaqa tuñichisqa kaspam wiñaypaq purmanqa, nispa.

²¹Cen runakunata qawarispanmi Balaam kaynata profetizarqa: Cainpa mirayninkuna, pakakunaykikuna mana yaykuy atinaña kaptinpas, qaqa rumikunapiña qesachakuptikipas, qesaykiqa kañasqam kanqa; Asiria runakunam presota apasunki, nispa.

²³Balaamqa profetizarqataqmi: ¡Ay! ¡Piraq kawsanqa tukuy kaykunata Dios ruwaptin!

²⁴Chipre islamantam barcokuna hamunqa, Asiriapa chaynataq Heberpa llaqtankunatam purmachinqa, ichaqa kikinpas purmachisqam kanqa, nispa.

²⁵Chaymantam llaqtanman Balaam kutikurqa, rey Balacpas ñannintam kutikurqa.