Read Biblia Revisión Chuya Qellqa 1992 – Chuya Qellqa 1992 Números 25 Bible Online

Números 25 - Biblia Revisión Chuya Qellqa 1992 – Chuya Qellqa 1992 bible

Números 25

¹Israelpa mirayninkunam Sitim lawpi samaruspanku, Moabita warmikunawan huchallikuyta qallaykurqaku.

²Chay warmikunam diosninkuman ofrecesqanku mikuykunata chay runakunaman mikuchirqakum, chaymi mikuruspanku Moab runakunapa idolonkunataña yupaycharqaku.

³Chaynapim Israel runakunaqa Baal-peor idolotaña qatirqaku, chayraykum Tayta Dios paykunapa contranpi llumpayta piñakururqa.

⁴Hinaspam Moisesta nirqa: Llapa kamachiqninkunata huñuruspa lliw runapa qawasqanta ñoqa Tayta Diospa qayllaypi punchaw pacha warkurariy, chaynapim Israel runakunapa contranpi piñakuyniy taninqa, nispa.

⁵Chaymi Israel runakunapa juezninkunata Moisés kamachirqa: Baal-peor idolota yupaychaq aylluykichikkunata sapakama wañuchiychik, nispa.

⁶Diosman asuykuna carpapa punkunpi Moiseswan Israelpa mirayninkuna waqachkaptinkum, huk israelita runa lliwpa qawasqanta madianita warmita carpanman pusaykurqa.

⁷Chayta rikuspanmi Aaronpa willkan otaq Eleazarpa churin sacerdote Finees, huñunakuymanta hatarispan lanzata aparikuspa

⁸chay warmi pusaykuq runapa carpanman yaykuruspan iskayninkuta wiksanpatakama lanzawan tuksirurqa. Chayñam Israelpa mirayninkuna wañuchiq peste onqoy tanirurqa.

⁹Chaykamaqa iskay chunka tawayuq waranqa runakunañam wañururqaku.

¹⁰Chaymi Moisesta Tayta Dios nirqa:

¹¹Aaronpa willkan otaq Eleazarpa churin sacerdote Fineesmi Israel runakunapa contranpi piñakuyniyta tanirachin, payqa ñoqa hina piñakuspam chay runata wañurachirqa. Chayraykum Israel miraykunapa contranpi llumpayta piñakuchkaspaypas paykunataqa mana puchukarachirqanichu.

¹²Chaynaqa, paywan hawkayay pacto ruwasqayta willay.

¹³Ñoqapi sonqoyuq kasqanraykum paywanpas chaynataq mirayninkunawanpas pactota ruwasaq, chaynapi sacerdoteykunaña wiñaypaq kanankupaq. Chaynataqa ruwani Israel miraykunapa huchankunata pampachaykachiwasqanraykum, nispa.

¹⁴Madián warmiwan kuska wañuruq runaqa karqa Salupa churin Zimrim, Zimriqa karqa Simeón ayllupi kamachikuqmi.

¹⁵Chay Madián warmiñataqmi karqa Zurpa churin Cozbi. Zurqa karqa Madián runakunapa huknin kamachiqninmi.

¹⁶Moisestam Tayta Dios nirqa:

¹⁷Madián runakunata atacaspa wañuchiychik.

¹⁸Paykunaqa Baal-peor idolonkuwanmi engañasurqankichik, engañasurqankichiktaqmi Madianpi kamachikuqpa warmi churin Cozbiwanpas. Chay warmiqa paykunapa ayllunmi karqa. Baal-peor idolota yupaychasqaykichikmanta castigasqay punchawmi Cozbipas lanzawan wañuchisqa karqa, nispa.