Read Biblia Revisión Chuya Qellqa 1992 – Chuya Qellqa 1992 Números 30 Bible Online

Números 30 - Biblia Revisión Chuya Qellqa 1992 – Chuya Qellqa 1992 bible

Números 30

¹Tayta Diospa kamachisqantam Israel ayllukunapi kamachikuqkunaman Moisés kaynata nirqa:

²Tayta Diosman pipas prometekuspanqa otaq juraspan kikinmanta imatapas qoyta munaspanqa, chay rimasqantam cumplinqapuni; tukuy imapas rimasqanman hinam ruwanqa.

³Sichum huk sipas taytanpa wasinpiraq kachkaspan Tayta Diosman imatapas prometekunqa otaq kikinpas Tayta Diosllapaqña waqaychakuyta munanqa chayqa,

⁴taytanpas chayta yachachkaspan mana imatapas niptinqa cumplinqapunim.

⁵Sichum taytan chayta yacharuspan chay punchawllapi harkakuruptinqa manam cumplinqachu, Tayta Diospas chay warmipa taytan harkakurusqanraykum pampachaykunqa.

⁶Sichum huk sipas Tayta Diosman imatapas prometekuchkaspan otaq kikinpas Tayta Diosllapaqña waqaychakuyta munachkaspan casarakurunqa

⁷hinaptin qosan chayta yacharuspan mana imatapas nispa mana harkakuptinqa cumplinqapunim.

⁸Sichum qosan yacharuspan harkakuptinmi ichaqa ima prometekusqantapas mana cumplinqachu, Tayta Diospas pampachaykunqam.

⁹Viuda warmi otaq leyman hina rakinasqa warmi imatapas prometekuspanqa lliwtam cumplinqa.

¹⁰Sichum casada warmi qosanpa wasinpi kachkaspan imatapas ruwananpaq juraspa prometekurunqa, hinaptin

¹¹qosanñataq chayta yacharuspan mana harkakuptinqa imam prometekusqantam cumplinqa.

¹²Sichum qosan chayta yacharuspan harkakuruptinqa manam ima prometekusqantapas cumplinqachu. Qosan harkakurusqanraykum Tayta Diospas pampachaykunqa.

¹³Pi warmipa imataña ruwananpaq otaq ayunananpaq prometekusqantapas qosanmi “allinmi” ninqa otaq “manam” ninqapas.

¹⁴Sichum qosanñataq yachachkaspan paqarinnintin punchawkama upallakuykuspan mana harkakuptinqa cumplinqapunim, chay warmipa qosanqa upallalla kayniywanmi “allinmi” nichkan.

¹⁵Yacharuchkaspan mana chay punchawllapi harkakuruspanqa kikinñam warminpa huchanmanta cuentallikunqa.

¹⁶Tayta Diosmi chay kamachikuykunata Moisesman qorqa, chaynapi chaykunaman hina warminwan qosan ruwananpaq chaynataq taytanpas wasinpiraq kaq sipas churinwan imaynam ruwananpaq.