Read Biblia Revisión Chuya Qellqa 1992 – Chuya Qellqa 1992 Números 31 Bible Online

Números 31 - Biblia Revisión Chuya Qellqa 1992 – Chuya Qellqa 1992 bible

Números 31

²Israelpa mirayninkunata kamachiy madianitakunamanta vengakunankupaq, chaymantañam wañukunki, nispa.

³Chaymi llaqtata Moisés nirqa: Wakiqnikichik guerrapaq allichakuspa madianitakunapa contranpi riychik, Tayta Diospa sutinpi paykunata vengakamuychik.

⁴Israelpa mirayninkunamantam sapa ayllu guerrapaq waranqa runakunata kachanqa, nispa.

⁵Chaymi sapa ayllumanta waranqa runakunata guerraman rinankupaq akllarqaku. Llapallan akllasqa runakunaqa chunka iskayniyuq waranqam karqa.

⁶Moisesmi sapa ayllumanta waranqa runakunata guerraman kacharqa. Sacerdote Eleazarpa churin Fineespas santuariopa servicionkunata hinaspa tocanapaq trompetakunata aparikuspam rirqa.

⁷Moisesman Tayta Diospa kamachisqanman hinam madianitakunawan peleaspa llapallan qarikunata wañuchimurqaku.

⁸Paykunatawan kuskatam Madianpa pichqa reyninkutapas wañuchimurqaku, chay reykunam karqa: Evi, Requem, Zur, Hur hinaspa Reba. Beorpa churin Balaamtapas espadawanmi wañurachirqaku.

⁹Israelpa mirayninkunam madianita warmikunatawan warmakunata presota aparqaku, animalninkutawan tukuy imankutapas apakurqakum.

¹⁰Yachasqanku llaqtakunatawan llapa campamentonkunatapas kañaykurqakum.

¹¹Chaynapim warmikunata, wawakunata, animalkunata hinaspa tukuy ima qechumusqankutapas hapikuykurqaku.

¹²Hinaspam Moisesman, sacerdote Eleazarman, Israelpa mirayninkunaman aparqaku, Moab law pampakunapi otaq Jordán mayupa hichpan Jericó llaqtapa chimpanpi campamentopi kachkaptinku.

¹³Chaymi Moiseswan sacerdote Eleazar hinaspa llaqtapa kamachiqninkuna campamentomanta lloqsispa tariparqaku.

¹⁴Ichaqa Moisesmi piñakururqa guerramanta kutimuq tropakunapa kamachiqninkunapaqwan waranqa soldadokunapa chaynataq pachak soldadokunapa kamachiqkunapaq.

¹⁵Hinaspam paykunata nirqa: ¿Imanasqataq llapa warmikunata mana wañuchimurqankichikchu?

¹⁶Chay warmikunam Balaampa umachasqan kaspanku Tayta Diospa contranpi Israelpa mirayninkunata hatarichirqaku, chaynapi Baal-peor idolotaña servinankupaq. Chayraykum Tayta Diosqa runankunata peste onqoywan wañuchirqa.

¹⁷Chaynaqa, kunanpuni llapallan qari wawakunatawan haykam qari reqsiq warmikunata wañuchiychik.

¹⁸Manaraq qari reqsiq sipaskunatam ichaqa ama wañuchinkichikchu aswanqa paykunam qamkunapaq kanqa.

¹⁹Qamkunamanta haykam runa wañuchiqkunaqa chaynataq wañusqa runapa ayanta llapcharuqkunaqa, qanchis punchawmi campamentomanta hawapi qepankichik. Hinaspam qamkunapas chaynataq presochamusqaykichik runakunapas kimsa kaq punchawpiwan qanchis kaq punchawpi chuyanchakunkichik.

²⁰Chuyanchankichiktaqmi llapa pachakunatapas, qaramanta ruwasqa tukuy ima kaqkunatapas, cabrapa pelonmanta pachakunatapas hinaspa kullumanta serviciokunatapas, nispa.

²¹Guerramanta kutimuq soldadokunatam sacerdote Eleazar nirqa: Moisesman kamachispanmi Tayta Dios kay kamachikuyta yachachirqa:

²²“Qoritapas, qollqetapas, broncetapas, fierrotapas, estañotapas, tititapas

²³chaynataq imapas ninapa mana rupanan kaqtaqa chuyanchanaykichikpaqmi ninapi chulluchinkichik, hinaspam chuyanchana yakuwan mayllankichik. Ninapa rupanan kaqkunatañataqmi yakullawan mayllankichik.

²⁴Qanchis kaq punchawpim pachaykichikta taqsaspa chuyaña kankichik, chaymantañam campamentoman kutiykunkichik”, nispa.

²⁵Moisestam Tayta Dios nirqa:

²⁶Qanwan sacerdote Eleazarmi runakunapa kamachiqninkunapiwan pusamusqanku runakunata chaynataq animalkunatapas yupankichik.

²⁷Iskayman rakiruspam hukninta guerrapi peleamuqkunaman qonkichik, huknintañataqmi wakin runakunaman.

²⁸Guerrapi peleamuspa qechumusqankumantam, runakuna, vacakuna, asnokuna chaynataq ovejakuna kaptinpas ñoqa Tayta Diospaq sapa pichqa pachakmanta hukninta rakipuwanki.

²⁹Chay ofrendakunataqa ñoqa Tayta Diospaqña kananpaqmi sacerdote Eleazarman qonkichik.

³⁰Israelpa mirayninkunaman tupaqninmantam, runamanta, vacamanta, asnomanta, ovejamanta hinaspa ima animalmantapas, sapa pichqa chunkamanta hukta rakispa Leví ayllukunaman qonki, paykunaqa yachanay carpatam nanachikunku, nispa.

³¹Moiseswan Eleazarmi ruwarqaku imaynam Moisesman Tayta Diospa nisqanman hina.

³²Guerraman rispa qechumusqankum karqa: Soqta pachak qanchis chunka pichqayuq waranqa ovejakuna,

³³qanchis chunka iskayniyuq waranqa vacakuna,

³⁴soqta chunka hukniyuq waranqa asnokuna.

³⁵Manaraq qari reqsiq sipaskunañataqmi karqa kimsa chunka iskayniyuq waranqa.

³⁶Iskayman rakinaruspa guerrapi peleamuqkunaman hukninta rakiptinkum ovejakunamanta tuparqa kimsa pachak kimsa chunka qanchisniyuq waranqa pichqa pachaknin ovejakuna.

³⁷Tayta Diosman tupaqninñataqmi karqa soqta pachak qanchis chunka pichqayuq ovejakuna.

³⁸Guerraman riqkunapaqmi karqa kimsa chunka waranqa vacakuna. Tayta Diospa tupaqninñataqmi karqa qanchis chunka iskayniyuq.

³⁹Asnokunamantañataqmi kimsa chunka waranqa pichqa pachaknin. Tayta Diospaq tupaqninñataqmi karqa soqta chunka hukniyuq.

⁴⁰Sipaskunamantam guerraman riqkunapaq karqa chunka soqtayuq waranqa. Paykunamantam Tayta Diospaq kimsa chunka iskayniyuqta rakirqaku.

⁴¹Moisesman Tayta Diospa kamachisqanman hinam Tayta Diospaq rakisqanku ofrendata sacerdote Eleazarman qorqaku.

⁴²Chay iskayman rakisqanpa hukninta Israelpa mirayninkunaman Moisespa qosqanmi karqa:

⁴³Kimsa pachak kimsa chunka qanchisniyuq waranqa pichqa pachaknin ovejakuna,

⁴⁴kimsa chunka soqtayuq waranqa vacakuna,

⁴⁵kimsa chunka waranqa pichqa pachaknin asnokuna,

⁴⁶chunka soqtayuq waranqa sipaskuna.

⁴⁷Israelpa mirayninkunaman rakisqankumantam sapa pichqa chunkamanta hukta Moisés chaskirqa, sipaskunamanta kaptin otaq animalkunamanta kaptinpas. Chay rakisqankunatam Tayta Diospa yachanan carpata nanachikuq Leví ayllukunaman qorqa. Chaynataqa ruwarqa imaynam Tayta Diospa kamachisqanman hina.

⁴⁸Moisesmanmi rirqaku guerrapi peleamuqkunamanta waranqa soldadokunapa chaynataq pachak soldadokunapa kamachiqkuna.

⁴⁹Hinaspam nirqaku: Guerraman pusasqayku tropakunatam yuparuniku ichaqa manam chullallapas faltanchu.

⁵⁰Chayraykum sapakama tarisqaykuman hina qori alhajakunamanta ofrendata Tayta Diosman apamuniku: Brazaletekunata, pulserakunata, anillokunata, aretekunata, collarkunata. Chaykunatam Tayta Diosman apamuniku huchayku pampachasqa kananpaq, nispanku.

⁵¹Chaymi Moiseswan sacerdote Eleazar chay qorimanta alhajakunata chaskirqaku.

⁵²Waranqa soldado kamachiqkunapa hinaspa pachak soldado kamachiqkunapa Tayta Diosman qorimanta llapa alhajakuna qosqankum karqa pachak pusaq chunka tawayuq kilo masnin.

⁵³Guerraman riq soldadokunapa imapas qechumusqankuqa kikinkupaqmi karqa.

⁵⁴Chaynaqa, waranqa soldado kamachiqkunapa hinaspa pachak soldado kamachiqkunapa qosqanku qoritam Moiseswan sacerdote Eleazar chaskispanku Diosman asuykuna carpaman apaykurqaku, chaynataqa ruwarqaku Israelpa mirayninkunata Tayta Dios mana qonqananpaqmi.