Read Biblia Revisión Chuya Qellqa 1992 – Chuya Qellqa 1992 Números 32 Bible Online

Números 32 - Biblia Revisión Chuya Qellqa 1992 – Chuya Qellqa 1992 bible

Números 32

¹Rubenpa chaynataq Gadpa mirayninkunam animalsapa kasqankurayku, Jazer lawpi hinaspa Galaad lawpi allpakunata animalkunapaq kusallaña kasqanta qawaykurqaku.

²Hinaspam Moisesman, sacerdote Eleazarman chaynataq llaqtapa kamachiqninkunaman rispanku nirqaku:

³Atarot, Dibón, Jazer, Nimra, Hesbón, Eleale, Sebam, Nebo hinaspa Beón lawpi

⁴allpakunatam Tayta Dios qechuruspan Israelpa mirayninkunaman qoykurqa. Chay allpakunaqa animalkuna uywanapaqpas allinmi; ñoqaykuqa achkallaña animalniyuqmi kaniku.

⁵Chaynaqa, ama hina kaspayá chay allpakunata qoykuwayku, chaynapi Jordán mayuta amaña chimpanaykupaq, nispanku.

⁶Chaymi Gadpa chaynataq Rubenpa mirayninkunata Moisés nirqa: ¿Aylluykichikkuna guerraman richkaptinchu qamkunañataq kaypi qepakuykunkichik?

⁷¿Imanasqataq Israelpa mirayninkunata hukmanyachinkichik Tayta Diospa qosqan allpaman mana rinankupaq?

⁸Chaynatam taytaykichikkunapas ruwarqaku Cades-barnea lawmanta wak chimpa allpata qawamunankupaq kachamuptiy.

⁹Escol wayqokama chayaruspankum allpata qawaykamuspanku Israelpa mirayninkunata hukmanyachirqaku Tayta Diospa qosqan allpaman mana rinankupaq.

¹⁰Chayraykum Tayta Dios anchata piñakurqa, hinaspam juraspan kaynata nirqa:

¹¹“Abrahamman, Isaacman hinaspa Jacobman juraspa prometesqay allpamanqa, Egipto nacionmanta lloqsimuq runakunaqa iskay chunka watayuqmanta hanaymanmi mana yaykunqakuchu, paykunaqa manam tukuy sonqonkuwanchu qatiwarqaku.

¹²Cenezeo Jefonepa churin Calebwan, Nunpa churin Josueyllam yaykunqaku. Paykunallam ñoqa Tayta Diostaqa tukuy sonqonkuwan qatiwarqaku”, nispa.

¹³Chayraykum Tayta Dios anchata piñakurqa Israel runakunapa contranpi hinaspam tawa chunka wata chunniqpi purichirqa, paypa qayllanpi mana allin ruwaq miraykuna wañuspa tukunankukama.

¹⁴Yaw, huchasapa runakunapa mirayninkuna, qamkunaqa taytaykichiktañam qatipakuchkankichik, chaynapi Israel runakunapa contranpi Tayta Diosta astawan piñachinaykichikpaq.

¹⁵Tayta Diosmanta karunchakuptikichikqa huktawanmi chunniqpi saqerusunkichik. Qamkunaraykutaqmi kay llaqtatapas chinkarachinqa, nispa.

¹⁶Chaymi Rubenpa hinaspa Gadpa mirayninkuna Moisesman asuykuspa nirqaku: Kaypiyá animalniykupa kanchanta perqarusaqku chaynataq aylluykupaqpas llaqtata hatarirachisaqku.

¹⁷Ñoqaykuñataqmi allinta armakuspa Israelpa mirayninkunapa ñawpaqninta risaqku, yachananku allpaman chayachinaykukama. Aylluykuñataqmi allin murallasqa llaqtakunapi qepanqaku kaylawpi yachaq runakuna mana atacarunanpaq.

¹⁸Israelpa mirayninkuna sapakama allpankuta chaskinankukamam wasiykumanqa mana kutimusaqkuchu.

¹⁹Jordán mayupa chimpanpiqa manañam paykunawan kuskaqa allpata mañakusqaykikuñachu, Jordán mayupa kaylawnin intipa qespimunan lawpi allpayku kasqanrayku, nispanku.

²⁰Chaymi Moisés nirqa: Chaynaqa, nisqaykichikpi hinayá allinta armakuspa guerrapi peleanaykichikpaq Tayta Diospa ñawpaqninta riychik.

²¹Tayta Diospa ñawpaqnintam llapallaykichik Jordán mayuta chimpankichik, hinaspam qayllanmanta enemigonkunata wischunankama chaypi kamunkichik.

²²Chay allpakunata Tayta Dios qoykusuptikichikñam kutikamunkichik, chaynapim kay prometekusqaykichikmanta Tayta Diospaqpas chaynataq Israel miraykunapaqpas libreña kankichik, hinaptinmi kay allpaqa qamkunapaña kanqa imaynam Tayta Diospa nisqanman hina.

²³Nisqaykichikta hina mana ruwaspam ichaqa Tayta Diospa contranpi huchallikunkichik, chaymantaqa cheqaptapunipas castigasqam kankichik.

²⁴Chaynaqa, nisqaykichikpi hinayá aylluykichikpaq llaqtakunata ruwaychik hinaspa llapa animalnikichikpaqpas kanchanta ruwaychik, nispa.

²⁵Hinaptinmi Moisesta Gadpa hinaspa Rubenpa mirayninkuna nirqaku: Kamachiwasqaykikuman hinam ruwasaqku.

²⁶Churiykuwan warmiykum ichaqa lliw animalniykupiwan Galaadpi qepanqaku.

²⁷Ñoqaykuñataqmi llapallayku niwasqaykikuman hina guerrapi peleamunaykupaq allin armasqa Tayta Diospa ñawpaqninta risaqku, nispa.

²⁸Chaymi sacerdote Eleazartawan Nunpa churin Josueyta hinaspa Israelpa mirayninkunapi kamachikuqkunata Moisés kaynata kunarqa:

²⁹Sichum Gadpa chaynataq Rubenpa mirayninkuna guerrapaq armasqa qamkunawan kuska Tayta Diospa ñawpaqninta Jordán mayuta chimpaptinku, chay allpakuna makikichikpiña kaptinqa, Galaad allpatam paykunaman qonkichik.

³⁰Mana peleaq rispankum ichaqa qamkunawan kuska Canaán allpapi tupaqninkuta chaskinqaku, nispa.

³¹Hinaptinmi Gadpa chaynataq Rubenpa mirayninkuna nirqaku: Kay serviqnikikunaqa Tayta Diospa niwasqankuman hinam ruwasaqku.

³²Guerrapaq armasqam Tayta Diospa ñawpaqninta Canaán allpaman chimpasaqku, tupaqniyku allpam ichaqa Jordán mayupa kaylawninpi kanqa, nispa.

³³Chaynapim Gadpa mirayninman, Rubenpa mirayninman chaynataq Joseypa churin Manasespa wakin mirayninman Moisés qorqa amorreokunapa reynin Sehonpa allpanta chaynataq Basán nacionpa reynin Ogpa allpanpa muyuriqninpi llaqtakunata.

³⁴Chaymi Gadpa mirayninkuna musoqmanta kay llaqtakunata hatarichirqaku: Dibón, Atarot, Aroer,

³⁵Atarot-sofán, Jazer, Jogbeha,

³⁶Bet-nimra chaynataq Bet-aranta; chay llaqtakunatam murallayuqtakama ruwarqaku. Ovejankupa kanchantapas ruwarqakum.

³⁷Rubenpa mirayninkunam musoqmanta kay llaqtakunata hatarichirqaku: Hesbón, Eleale, Quiriataim,

³⁸Nebo, Baal-meón hinaspa Sibmata; chay llaqtakunata hatarirachispam musoq sutikunataña churarqaku.

³⁹Manasespa churin Maquirpa mirayninkunam Galaad lawta hapikuykurqaku hinaspam chaypi yachaq amorreokunatapas qarqorurqaku.

⁴⁰Chayraykum Manasespa churin Maquirpa mirayninkunaman Galaad lawpi allpata Moisés qoykurqa, hinaptinmi chaypiña yacharqaku.

⁴¹Manasespa miraynin Jairpas Galaad lawpi taksa llaqtakunatam hapikuykurqa, hinaspam “Havot-jair” nispa suticharqa.

⁴²Nobapas Kenat llaqtatawan taksa llaqtankunatam hapikuykurqa, hinaspam kikinpa sutinwan “Noba” nispa suticharqa.