Read Biblia Revisión Chuya Qellqa 1992 – Chuya Qellqa 1992 Números 34 Bible Online

Números 34 - Biblia Revisión Chuya Qellqa 1992 – Chuya Qellqa 1992 bible

Números 34

¹Israelpa mirayninkunaman kamachinanpaqmi Moisesta Tayta Dios kaynata nirqa: Canaán allpaman yaykuruptikichikmi chay allpaqa qamkunapaña kanqa. Linderonkunañataqmi kaykuna kanqa:

³Sur lawmanmi kanqa Zin chunniqmanta qallarispa Edom nacionpa patankama; intipa qespimunan lawmanta qallarispam Puchqo lamar qochakama chayanqa.

⁴Hinaspam Acrabim qasanta Zin chunniqkama muyurimunqa. Chaymantam sur lawman Cades-barnea lawninta rispan Hasar-adar llaqtanta Asmón lawkama chayanqa.

⁵Asmón lawmantañataqmi muyurimunqa Egipto wayqonta Mediterráneo lamar qochakama.

⁶Intipa seqaykunan lawmanñataqmi Mediterráneo lamar qochakama chayanqa.

⁷Norte lawmanñataqmi kanqa Mediterráneo lamar qochamanta qallarispa Hor orqokama.

⁸Hor orqomantañataqmi Hamat lawman yaykunakama rispan Zedad llaqtakama chayanqa.

⁹Chaymantañataqmi Zifrón llaqtanta rispa Hazar-enán llaqtapi tukurunqa. Chaynam norte lawpi linderoykichikqa kanqa.

¹⁰Intipa qespimunan lawpi linderoykichikmi ichaqa derecholla rinqa Hazar-enanmanta qallarispa Sefam lawkama.

¹¹Sefam lawmantañataqmi uraykunqa Riblakama, Riblaqa kachkan Aín lawpi intipa qespimunan lawninpim. Chaymantam intipa qespimunan lawman uraykuspan chayanqa Cineret sutiyuq qochapa patankama.

¹²Chaymantañataqmi Jordán mayuntakama uray lawman rinqa Puchqo lamar qochapi tukunankama, chaykunam allpaykichikpa muyuriqninpi linderokuna kanqa.

¹³Israelpa mirayninkunatam Moisés kaynata kamachirqa: Chay allpatam qamkunapaña kananpaq sorteaspa partenakunkichik, Tayta Diosmi kamachikurqa isqonnintin ayllukunaman chaynataq Manasespa wakin ayllunmanpas partenaykichikpaq.

¹⁴Rubén aylluwan Gad ayllu chaynataq Manasespa wakin ayllunmi ichaqa, Jericopa chimpan Jordán mayupa waklawninpi herenciankuta chaskirunkuña.

¹⁵Chaynaqa, iskay ayllu partenmi herenciankuta chaskirunkuña Jordán mayupa waklawninpi otaq Jericó llaqtapa chimpan intipa qespimunan lawpi, nispa.

¹⁶Moisestam Tayta Dios nirqa:

¹⁷Chay allpataqa Sacerdote Eleazarwan Nunpa churin Josueymi partenqaku.

¹⁸Sapa ayllumantam allpa parteypi yanapakunankupaq kay kamachikuqkunata akllankichik:

¹⁹Judá ayllumanta Jefonepa churin Calebta.

²⁰Simeón ayllumanta Semuelpa churin Amiudta.

²¹Benjamín ayllunmanta Quislonpa churin Elidadta.

²²Dan ayllumantam Joglipa churin Buqui sutiyuq kamachikuqta.

²³Joseypa miraynin Manasés ayllumanta Efodpa churin Hanielta.

²⁴Efraín ayllumanta Siftanpa churin Kemuelta.

²⁵Zabulón ayllumanta Parnacpa churin Elizafanta.

²⁶Isacar ayllumanta Azanpa churin Paltielta.

²⁷Aser ayllumanta Selomipa churin Ahiudta.

²⁸Neftalí ayllumanta Amiudpa churin Pedaelta.

²⁹Chay kamachikuqkunatam Tayta Dios kamachirqa Israelpa mirayninkunaman Canaán allpa parteypi yanapakunankupaq.