Read Biblia Revisión Chuya Qellqa 1992 – Chuya Qellqa 1992 Números 35 Bible Online

Números 35 - Biblia Revisión Chuya Qellqa 1992 – Chuya Qellqa 1992 bible

Números 35

¹Moab nacionpa pampankunapi otaq Jordán mayupa hichpan Jericó llaqtapa chimpanpi kachkaptinkum Moisesta Tayta Dios nirqa:

²Israelpa mirayninkunata kamachiy, tupaqninku allpa chaskisqankupi Leví aylluman llaqtakunata chaynataq echaderonkunatapas qonankupaq, chay llaqtakunapim paykuna yachanqaku.

³Chaykunapi yachaptinkum echaderonkunapas llapallan animalninkupaq kanqa.

⁴Llaqtapa muyuriqninpi Leví aylluman qosqaykichik echaderokunaqa tawa pachak pichqa chunka metrom kanqa, chaynaqa llaqtapa murallanmanta hawa lawmanmi kanqa.

⁵Llaqtapa hawa lawnin intipa qespimunan lawpim isqon pachak metrota tupunkichik, sur lawmanpas isqon pachak metrotataq, hina chaynallatam intipa seqaykunan lawmanpas chaynataq norte lawmanpas tupunkichik. Chaynaqa, chay llaqtapa muyuriqninpi echaderonkunam paykunapaq kanqa.

⁶Leví aylluman qosqaykichik llaqtakunamantam soqta llaqtakuna amparakuna kanqa. Chay llaqtakunaqa runa wañuchiqpa lluptikuspan amparakunanpaqmi kanqa. Chay soqta llaqtakunatawan kuskatam tawa chunka iskayniyuq llaqtakunatapas qonkichik.

⁷Leví ayllumanmi tawa chunka pusaqniyuq llaqtakunata sapakama echaderontintakama qonkichik.

⁸Chaskisqaykichik llaqtakunamanta Leví aylluman qoptikichikqa, achkata chaskiqmi achkata qonqa, asllata chaskiqñataqmi asllata qonqa. Sapa ayllu hayka llaqtam chaskisqaykichikman hina Leví aylluman qonkichik, nispa.

⁹Israelpa mirayninkunaman ninanpaqmi Moisesta Tayta Dios nirqa: Jordán mayuta chimparuspa Canaán allpapiña kaspaykichikmi,

¹¹amparakuna llaqtakunata akllankichik, chaynapi pipas qonqaymanta runamasinta wañurachispanqa chayman lluptikunanpaq.

¹²Chay llaqtakunam kanqa wañuqpa ayllunkuna vengakurunanmanta lluptikunanpaq, chaynapim chay wañurachiq runaqa mana wañunqachu runakuna huñunakuspa wañuchisqanmanta juzganankukama.

¹³Llaqtakuna qosqaykichikmantam soqta llaqtakuna amparakunapaq kanqa.

¹⁴Jordán mayupa kaylawninpim kimsa llaqtakuna kanqa, Canaán allpapipas kimsataqmi kanqa.

¹⁵Chay soqta llaqtakunam amparakuna llaqtakuna kanqa Israelpa mirayninkunapaq, huklaw llaqtayuqkunapaq chaynataq samapakuq runakunapaqpas, chaynapi pipas qonqaymanta hukkaqninta wañurachiq runaqa lluptispa chaypi amparakunanpaq.

¹⁶Pipas runamasinta fierrowan wañurachispanqa runa wañuchiqñam rikurirun, chaynaqa wañuchisqapunim kanqa.

¹⁷Pipas runamasinta rumita hapiykuspa wañurachispanqa, runa wañuchiqñam rikurirun, chaynaqa wañuchisqapunim kanqa.

¹⁸Pipas runamasinta kaspiwan wañurachispanqa, runa wañuchiqñam rikurirun, chaynaqa wañuchisqapunim kanqa.

¹⁹Chay wañuqpa hichpa ayllunmi runa wañuchiqta maypipas tupasqanpi wañuchinqa.

²⁰Pipas runamasinta cheqnisqanrayku tanqaykuspanqa otaq wateqaspa imatapas hawanman wañunanpaq wischuykuspanqa,

²¹mana chayñataq cheqnisqanrayku makinwan maqachkaspalla wañurachispaqa, runa wañuchiqñam rikurirun; chaynaqa wañuqpa hichpa ayllunmi maypipas tupasqanpi paytapas wañuchinqa.

²²Sichum pipas mana cheqnikuchkaspan pitapas tanqaykuptinqa otaq mana wateqaspa imatapas qonqaymanta hawanman wichiykachiptinqa

²³otaq mana enemigon kachkaspan qonqaymanta hawanman rumita wichiykachiptin wañuruptinqa,

²⁴runakunam huñunakuruspanku kay kamachikuykunaman hina allin arreglota ruwanqaku qonqaymanta wañurachiq runapaqwan vengakuy munaqpaq.

²⁵Wañuqpa vidanmanta vengakuy munaqmantam huñunasqa runakuna qonqaymanta wañurachiqta libraspanku amparakuna llaqtaman kutichinqaku, chay runamasin wañurachiq runaqa chay llaqtapim yachanqa aceitewan tallispa sapaqchasqa sumo sacerdotepa wañunan punchawkama.

²⁶Sichum chay runa amparakusqan llaqtamanta lloqsiruptinqa,

²⁷wañuqpa vengakuq ayllunmi wañurachinqa, wañurachispanqa mana huchayuqmi kanqa.

²⁸Chayraykum chay runamasin wañuchiq runaqa amparakusqan llaqtapi sumo sacerdote wañukunankama yachanqa, chaymantañam llaqtanman kutikunqa.

²⁹Kay kamachikuykunam qamkunapaq chaynataq hamuq miraynikichikpaq maypiña yachaptikichikpas kanqa.

³⁰Pipas runamasinta wañuchiqqa, rikuqninkunapa nisqanman hinam wañunqa, huk testigopa nisqallanwanmi ichaqa mana pipas wañunqachu.

³¹Runa wañuchiqta libranapaq qollqetaqa amam chaskinkichikchu, chay runaqa wañunqapunim.

³²Amparakuna llaqtamanta lluptiruspa llaqtanman kutikunanpaq qollqeta pagayta munaptinqa amam chaskinkichikchu, sumo sacerdote wañukunankamam amparakuna llaqtapi yachanqa.

³³Yachasqaykichik allpataqa runa wañuchiykunawanqa amam millakuypaqtaqa ruwankichikchu, runa wañuchiyqa allpatam millakuypaqta ruwan. Chay allpaqa chuyanchasqa kanqa runa wañuchiqta wañurachiptillankum.

³⁴Yachanaykichikpaq allpataqa amam millakuypaqta ruwankichikchu, chay yachanaykichik allpapiqa ñoqapas yachasaqmi. Ñoqa Tayta Diosqa Israelpa mirayninkuna ukupim yachani, nispa.