Read Biblia Revisión Chuya Qellqa 1992 – Chuya Qellqa 1992 Miqueas 5 Bible Online

Miqueas 5 - Biblia Revisión Chuya Qellqa 1992 – Chuya Qellqa 1992 bible

Miqueas 5

¹Jerusalén llaqta, harkachikunaykipaq muyuriqnikipi perqakunata hatarichiy, enemigoykikunam muyurirusunki Israel nacionpa kamachiqninta ñakarichinankupaq.

²Belén Efrata, Judá ayllukunamanta taksallan llaqta, qanmantam Israelpi munaychakuq hatarinqa, payqa paqarimurqa ñawpaqmantaraqmi, tukuy imapa qallariyninmantapacham.

³Ichaqa wiksayuq warmipa wachakunankamam runankunata Tayta Dios saqeykunqa, chaymantañam Israelpa mirayninkuna, karupi tarikuqkuna, hinapi kaq wawqenkunaman hukllawakunqaku.

⁴Hinaptinmi chay rey hatarispan Tayta Diospa atiyninwan paykunata michinqa, paykunañataqmi hawka kawsakunqaku, Tukuy Atiyniyuq Tayta Dios kay pachapa patankama hatunchasqa kasqanrayku.

⁵Paymi hawkayayta apamuwasun Asiria nacionña llaqtanchikman hamuspan palacionchikkunaman yaykuptinpas, paykunapa contranpim qanchis michiqkunatawan ancha reqsisqa pusaq kamachikuqkunata kachaykusun.

⁶Paykunam Asiria naciontapas, Nimrodpa llaqtantapas, espadawan chinkarachinqaku. Asiria runakuna hamuspa allpanchikpa linderonkunata saruptinpas paymi librawasun.

⁷Jacobpa mirayninkunamanta puchuqkunam, llapa llaqtakunapa chawpinpi kanqaku, Diosmanta hamuq sulla hinaraq, pastokunaman chayaq para hinaraq kanqaku. Parawan sullaqa chayamun manam runapa munasqanman hinachu.

⁸Jacobpa mirayninkunamanta puchuqkunam, nacionkunapa llaqtakunapa chawpinpi, purun animalkunapa chawpinpi león hinaraq kanqaku, ovejakunapa chawpinpi uña león hinaraqmi kanqaku, payqa hapiruspanmi tisaparun, paymantaqa manam imapas lluptinmanchu.

⁹Dios Taytalláy, enemigoykikunapa contranpi makikita hoqarispaykim, enemigoykikunata pasaypaqta puchukarachinki.

¹⁰Tayta Diosmi kaynata nin: Chay punchawpim caballoykikunatapas wañurachisaq, guerrapaq carretaykikunatapas ñutuparusaq.

¹¹Llaqtaykichiktapas tuñichisaqmi, amparakunaykichik wasikunatapas purmarachisaqmi.

¹²Layqanakuynikichiktapas chinkarachisaqmi, qatipaqkunatapas chawpikichikmantam chinkarachisaq.

¹³Idolokunatapas chawpikichikmantam chinkarachisaq, manañam makikichikwan ruwasqaykichikpa qayllanpipas qonqorakunkiñachu.

¹⁴Asera sutiyuq idoloykichiktapas chawpikichikmantam wischurusaq, llaqtaykichikkunatapas pasaypaqtam purmarachisaq.

¹⁵Mana kasuwaqniy nacionkunamantam sinchi piñakuywan vengakusaq.