Read Biblia Revisión Chuya Qellqa 1992 – Chuya Qellqa 1992 Miqueas 6 Bible Online

Miqueas 6 - Biblia Revisión Chuya Qellqa 1992 – Chuya Qellqa 1992 bible

Miqueas 6

¹Kunanyá Tayta Diospa nisqanta uyariychik. Hatarispayki imam pasasusqaykita orqokunaman willakuy, qayakusqaykita orqokuna uyarichun.

²Orqokuna, kay pachapa cimientonkuna uyariychik, Tayta Diosmi llaqtanwan quejaman yaykurun, Israelpa contranpim juiciota kichaykun.

³Tayta Diosmi kaynata nin: Llaqtalláy ¿imanaruykitaq, imapitaq piñarachiki? Kunanyá contraypi rimariy.

⁴ Egiptomantam qamtaqa hurqomurqayki, esclavo kasqaykimantam libramurqayki. Pusamusunaykipaqmi Moisesta, Aaronta hinaspa Mariata kachamurqani.

⁵ Llaqtalláy, kunanyá yuyariy Moab nacionpa reynin Balac consejaptin Beorpa churin Balaampa imam kutichisqanta. Yuyariyá Sitim lawmanta Gilgalman risqaykita, hinaspayá atiyniywan yanapasqayta reqsikuy, nispa.

⁶¿Imawantaq Diospa qayllanman asuykusaq? ¿Imawantaq ancha hatun Diosta yupaychasaq? ¿lliw kañana sacrificiowanchu qayllanman asuykusaq? ¿Huk watayuq torokunawanchu asuykusaq?

⁷¿Waranqa carnerokunataña otaq chunka waranqa mayukunata hinaña aceiteta qoptiypas, yaqachum Tayta Diosqa kusikunman? ¿Piwi churiytachu mana kasukuq kasqaymanta qoykusaq? ¿Qari churiytachu huchaymanta qoykusaq?

⁸Yaw runa, Tayta Diosqa nisurqankiñam allin kaqkunamantaqa, Tayta Diosqa ¿imatataq qanmanta mañasunki? Allin arreglo ruwanaykitam, llakipayakuyta kuyanaykitam. Diosnikipa qayllanpi uchuychakunaykitam.

⁹Tayta Diosmi llaqtata qayachkan, payta uyariyqa allin yachayniyuq kaymi. Llapa runakuna uyariychik, kamachikuqkuna uyariychik:

¹⁰Mana allin ruwaqpa wasinpiqa kachkanraqmi engañowan qori-qollqe ganaqkunaqa, mana allin ruwaqpa wasinpiqa kachkanraqmi millakusqay suwakuq balanzankuna.

¹¹¿Imaynataq pampachayman suwakuq balanzatawan mana cabal pesota hatalliq runataqa?

¹²Kay llaqtapi apukunaqa runamasinta ñakarichiqkunam; llapa runakunapas llullakuspa engañakuqkunam.

¹³Chayraykum ñoqapas ñakarichispay huchaykirayku tuñichichkayki.

¹⁴Mikuspapas manam saksankichu, aswanqa hinallam yarqaymanta ñakarinki, huñukusqaykitapas manam takyachinkichu, takyachisqaykitapas guerrapim ñoqa tukuchisaq.

¹⁵Tarpuspapas manam cosechankichu, aceitunas sarusqaykipa aceitenwanpas manam servichikunkichu, uvas sarusqaykipa vinontapas manam upyankichu.

¹⁶ Rey Omripa kamachikuyninkunatam kasukurqanki, rey Acabpa ayllunkuna ruwasqankutam ruwarqanki, paykunapa nisusqaykiman hinam kawsarqanki. Chayraykum purmachisqa kanki, runaykikunatañataqmi burlakuspa asipayanqaku, llaqtaypa penqayninmi hawaykiman chayanqa.