Read Biblia Revisión Chuya Qellqa 1992 – Chuya Qellqa 1992 Nahúm 1 Bible Online

Nahúm 1 - Biblia Revisión Chuya Qellqa 1992 – Chuya Qellqa 1992 bible

Nahúm 1

¹Kaymi Elcos llaqtayuq Nahumpa visionpi imam rikusqanmanta qellqa. Paymi Nínive llaqtapa contranpi kaynata profetizarqa:

²Tayta Diosqa celosom hinaspa vengakuqmi, Tayta Diosqa contranpi sayariqkunamanta vengakuqmi, enemigonkunapa contranpi piñakuqmi.

³Tayta Diosqa mana chaylla piñakuruqmi, payqa ancha hatun atiyniyuqmi, huchayuq runataqa castiganqapunim; para-wayrapi chaynataq vientokunapipas puriqmi, puyukunapas purisqanpa polvonmi.

⁴Lamar qochapas mayukunapas qaqchaptinqa chakirunmi, Basanpiwan Carmelo orqopi sachakunapas qawirunmi. Líbano orqopi waytakunapas qawirunmi.

⁵Orqokunapas qayllanpiqa katkatatanmi, moqokunapas qayllanpiqa chullurunmi. Allpa pachapas, hawanpi kaqkunapas paypa qayllanpiqa mancharikunmi.

⁶¿Pitaq pay piñakuruptin qayllanpi sayanman? ¿Pitaq sinchita piñakuruptin takyapakunman? Piñakuyninqa nina hinaraqmi tallirikun, qaqakunapas qayllanpiqa tuñinmi.

⁷Tayta Diosqa kuyapayakuqmi, sasachakuy punchawpipas waqaychakuqmi, payman hapipakuqtaqa pakaykunmi.

⁸Contranpi hatariqkunatam ichaqa lloqlla hinaraq chinkarachin, enemigonkunataqa tutayaypipas qatikachanmi.

⁹¿Imatataq Tayta Diospa contranpi piensachkankichik? Payqa pasaypaqtam chinkarachisunkichik, huk kutillatam enemigonkunamantapas vengakun.

¹⁰Kichka hina wankuy-wankuyña kaspankupas sinkakuyninkupa nuyusqanña kaspankupas chakisqa qopa hinam kañasqa kanqaku.

¹¹Nínive llaqta, qanmantam lloqsimurqa Tayta Diospa contranpi mana allinta tanteaq runa, mana allinkunata umachakuq runa.

¹²Chayraykum llaqtanta Tukuy Atiyniyuq Tayta Dios kaynata nin: Asiria llaqtaqa mayna kallpasapaña kaspapas, achkallaña runayuq kaspapas, purmachisqa kaspam pasaypaqta chinkanqa. Judá llaqta, llumpaytam ñakarichirqayki, manañam mastaqa ñakarichisqaykiñachu.

¹³Kunanmi hawaykipi llasasuqniki yugota pakirusaq, chaqnasuqniki cadenatapas tipirusaqmi.

¹⁴Asiria llaqta, Tayta Diosmi contraykipi kaynata kamachikun: Sutikipas pasaypaq qonqasqam kanqa, yupaychanayki wasimantapas makikiwan ruwasqayki idoloykikunatam pasaypaqta chinkarachisaq, millakuypaq kasqaykiraykum sepulturaykitapas chaypi ruwachisaq.

¹⁵Qawariychik allin willakuy apamuqta, hawkayaymanta willakuy apamuqta, orqokunapa hawanta hamusqanta. Judá nación, fiestaykikunata ruway, prometekusqaykikunata cumpliy, manañam haykapipas mana allin runaqa hamusunkiñachu, pasaypaqtañam chinkarun.