Read Biblia Revisión Chuya Qellqa 1992 – Chuya Qellqa 1992 Nahúm 3 Bible Online

Nahúm 3 - Biblia Revisión Chuya Qellqa 1992 – Chuya Qellqa 1992 bible

Nahúm 3

¹Yaw, runa wañuchiq llaqta, suwakuypa llullakuypa huntarisqan llaqta, ¡imallapiraq rikukunki! Suwakuynikiqa mana tukuqmi.

²Latigokunapa toqyayninwan, ruedakunapa qapariyninwan uyarikuchkan; caballokunapa kallpayninwan carretakunapa kallpayllanñam uyarikuchkan.

³Sillada tropakunam kallpachkan, espadakunawan lanzakunam llipityachkan, waranqantin-waranqantinmi tuksisqa kuchusqa, wañuqkunapas manaña yupay atinam, runakunam kallpasqankupi chaykunawan urmachkanku.

⁴Chaykunam pasakuchkan, kuyakuq tukuq chuchumika warmikunapa llumpa-llumpay qanrakuyninkurayku. Paykunam sumaqllata engañaspanku, qanrakuyninkuwan nacionkunata tuñichirqaku, layqa kayninkuwanñataqmi runakunata wichichirqaku.

⁵Tukuy Atiyniyuq Tayta Diosmi nin: Qampa contraykipim kachkani, pachaykita uyaykikama qempiruspaymi nacionkunaman hinaspa munaychakuqkunaman penqaynikita qawachisaq.

⁶Millakuypaq kaqwan pachachispaymi penqayman churasqayki.

⁷Lliw rikusuqnikikunam qanmanta ayqerikuspa ninqaku: “Nínive llaqtam purmarun, ¿Pitaq payta llakipayanman? ¿Maypitaq consuelaqnin tarikunman?” nispanku.

⁸¿Nilo mayupa patanpi Tebas llaqtamanta aswan atiyniyuqchu qam kanki? Chay llaqtaqa yakupa chawpinpim tarikurqa, muyuriqninpi yakum harkarqa, Nilo mayuwan lamar qocham chay llaqtapa waqaychaqnin perqa hina karqa.

⁹Etiopía nacionwan Egipto nacionmi karqa Tebaspa mana tukuq kallpankuna, Fut nacionwan Libia nacionñataqmi hukllawakuspa yanapaqninkuna karqa.

¹⁰Chaywanpas Tebastaqa presotam aparqaku, warmankunapas callekunapa esquinankunapi waqtasqam wañurqaku. Ancha reqsisqa runankunatapas suerteta choqaspam rakinakurqaku, kamachiqninkunapas cadenasqam karqaku.

¹¹Nínive llaqta, manchakuymantam sinka hina katkatatanki, pantaypi tarikuspam enemigoykimanta pakakunki.

¹²Palacioykikunapas poqosqa higosta taspiykuptinku mikuqpa simillanmanña wichirimuq hinam wichirimunqa.

¹³Tropaykikunapas qampaqqa warmikuna hinam. Llaqtaykipa punkunkunapas enemigoykikunapaqmi chaylla kichakuykunqa, punkuykipa candadonkunatapas ninam rupanqa.

¹⁴Chaynaqa, yakutayá alistakuy enemigoykikuna inturusuptiki tomanaykipaq, harkasuqniki perqakunatayá raktachay, mituta saruspayá ladrillota ruway.

¹⁵Chaypim qamtaqa nina rupasunki, chaypitaqmi espadapas wañuchisunki, aqaruwayta hinam pasaypaqta chinkachisunki. Aqaruway hinayá miray, chilliku hinayá miray.

¹⁶Negociantekikunatapas cielokunapi chaskakunata hinañam mirachirqanki. Aqaruwayqa qaranta mudaruspanmi pawakun.

¹⁷Kamachiqnikikunapas aqaruwaykuna hinañam, capitannikikunapas chillikukuna hinañam, aqaruwaykunaqa chiri punchawkunapim perqakunaman tiyarunku, ichaqa rupaykamuptinmi chinkarunku, maymanmi risqankutaqa manam pipas yachanchu.

¹⁸Asiria nacionpa reynin, michiqnikikunam miskita puñurunku, tropaykipa capitanninkunam puñurunku, tropaykikuna montepi cheqeruptinmi mana pipas huñuqnin kanchu.

¹⁹Nanaynikipaqpas manam hampi kanchu, heridaykiqa mana hampiy atinam. Tuñisqaykimanta uyariqkunam taqllakuspa kusikunku. ¿Pitataq mana ñakarichiqchu kanki mana allin ruwaynikikunawan? nispa.