Read Biblia Revisión Chuya Qellqa 1992 – Chuya Qellqa 1992 Habacuc 1 Bible Online

Habacuc 1 - Biblia Revisión Chuya Qellqa 1992 – Chuya Qellqa 1992 bible

Habacuc 1

¹Kaymi profeta Habacucpa Diosmanta visionpi chaskisqan profeciakuna.

²Dios Taytalláy ¿Haykapikamataq mañakuyniyta mana uyariykuwankichu? ¿Haykapikamataq kaynaña wañuchinakuymanta mana libraykuwankikuchu?

³¿Imanasqataq huchallikuytawan ñakariyllata qawachiwanki? Wañuchinakuywan tuñichinakuyllam munaychakuchkan, piñanakuywan wañuchinakuyllañam tukuy hinastinpi kachkan.

⁴Kamachikuykunapas qepanchasqam, allin ruwaywan allin kawsaypas sarusqam; mana allin runam allin ruwaq runakunata ñakarichinanpaq qatikachan, chaymi allin arreglo ruwaytapas mana allin ruwaymanña qewirunku.

⁵Muyuriqnikichikpi nacionkunata qawariychik, qawarispa mancharikuychik. Mana creenaykichikpaq kaqkunatam kay punchawkunapi ruwasaq, pipas chaykunamanta willasuptikichikqa manam creewaqchikchu.

⁶Caldea law mana llakipayakuq runakunatam hatarichimuchkani; kay pachapi tukuy hinastinman kallpaspa hukpa allpanta munaychakuq runakunatam pusamuchkani.

⁷Chay runakunaqa llumpay manchakuypaqmi, paykunaqa imatapas ruwanku munayninkuman hinaspa atiyninkuman hinam.

⁸Caballonkupas, leopardomanta aswan apurawman kallpaqmi, purunpi lobomantapas aswan manchakuypaqmi. Silladankunapas mana yupay atinam, mikunanman anka pawaykuq hinaraqmi enemigonkumanpas karumantaraq pawaykunku.

⁹Paykunaqa mayman rispankupas lliwtam puchukachinku, risqankupiqa manchakuywan wañuymi ñawpan, presokunatapas lamar qochapi aqota hinañam huñurunku.

¹⁰Reykunamantapas paykunaqa burlakunkum, kamachikuqkunamantapas asikunkum. Asikuspam murallasqa llaqtakunamanpas, rampata ruwaykuspa chayninta yaykuruspa munaychakurunku.

¹¹Kallpasapa wayra hinam pasarunku, paykunaqa kallpankuta diosninkupaq hapispam chaywan huchallikunku.

¹²Dios Taytalláy, wiña-wiñaypaq kawsakuq chuya Diosnilláy, qamqa kanki waqaychaqniykum, chayraykum mana wañusaqkuchu. Babilonia runakunataqa hatarichinki, llaqtaykita castiganallaykipaqmi.

¹³Qamqa chuyay-chuyaymi kanki mana allin ruwayta qawanaykipaqqa, daño ruwayta qawanaykipaqqa. Chaynaqa, ¿imanasqataq runamasin wañuchiqta qawaylla-qawakunki? ¿Imanasqataq allin ruwaq runata mana allin runa tuñichiptin upallalla qawakunki?

¹⁴¿Imanasqataq runakunata qawanki challwakunata hina, mana kamachiqniyuq purun animalkunata hina?

¹⁵Caldea runakunam anzuelowan mallawan challwachkaq hina llapa runakunata hapiruspa sinchillataña kusikunku.

¹⁶Chayraykum mallankuta yupaychanku, inciensotaraqmi qontichipunku, chay mallankuwanmi tukuy imata huñukunku, chayraykum mikunankupas mana pisiq.

¹⁷Chaynaqa, ¿tukuy tiempochu challwaspa llapa runata mana llakipayarispa wañuchinqaku?