Read Biblia Revisión Chuya Qellqa 1992 – Chuya Qellqa 1992 Habacuc 3 Bible Online

Habacuc 3 - Biblia Revisión Chuya Qellqa 1992 – Chuya Qellqa 1992 bible

Habacuc 3

¹Kaymi profeta Habacucpa mañakuynin.

²Dios Taytalláy, ancha reqsisqa kasqaykitawan tukuy imapas ruwasqaykita uyarispaymi manchakurqani. Kunanpas ñawpaq watakunapi hinayá kawsayniykupi hatun atiynikita hatarichiy, chaynapi ñoqaykupas reqsinaykupaq. Chaynatayá piñakuynikipa chawpinpipas llakipayakuynikita qawaykachiwayku.

³Temán lawmantam Diosqa hamuchkan, Parán orqomantam Chuya Diosqa hamuchkan. Kanchariyninpas cielokunatam huntaykun, kay pachapas payta yupaychaywanmi huntasqa.

⁴Kanchariyninpas achki hinaraqmi, makinmantapas llipyakunaraqmi lloqsimun, atiyninpas chaypim pakasqa tarikun.

⁵Paypa ñawpaqnintam wañuy hamuchkan, qepantañataqmi peste hamuchkan.

⁶Pay sayaykuptinqa kay pachapas kuyurinmi, qawariptinqa nacionkunapas katkatatanmi. Ñawpa tiempomantaraq kaq orqokunapas wichimunmi, ñawpa tiempomantaraq kaq moqokunapas chullurinmi. Diospa ñanninkunam ichaqa wiña-wiñaypaq takyan.

⁷Cusán lawpi yachaqkunatapas hatun ñakariypi kachkaqtam rikurqani, Madián lawpi yachaqkunatapas manchakuywan katkatatachkaqtam rikurqani.

⁸Dios Taytalláy, ¿Mayukunapa contranpichum piñakurunki? ¿Lamar qochapa contranpichum rabiakurunki? ¿Chayraykuchu caballoykikunapi sillakuspa kallpanki? ¿Chayraykuchu venceruq carretaykikunapi kallpanki?

⁹Flechaykikunawan flechanayki arcopas listollañam kachkan. Llapa runakunaman juramentowan qosqayki simikiqa takyanqapunim. Qamqa mayukunawanmi allpatapas raqrarachinki.

¹⁰Orqokunapas rikususpaykim katkatatanku, parapas cielomantam lloqlla hinaraq tallikamun, lamar qochapa ukunkunañataqmi olankuna orqochakuspa hoqarikuptin qaparimun.

¹¹Intiwan killapas, flechaykikunapa achkiriyninwanmi, lanzaykipa kanchariyninwanmi, maymi kasqanpi sayarunku.

¹²Piñakuynikipim kay pachatapas saruparunki, rabiakuynikipim nacionkunatapas saruparunki.

¹³Llaqtaykita salvanaykipaqmi lloqsimurqanki, akllakusqayki reyta salvanaykipaqmi hamurqanki. Mana allin runapa wasinpa qatantam paskarurqanki, cimientonkamam pasaypaqta tuñirachirqanki.

¹⁴Capitanninkunatapas kikinpa flechallanwanmi wañurachirqanki, chaynataqa ruwarqanki cheqerachiwanankupaq kallpasapa wayra hinaraq pawaykamuwaptinkum, mana pipa yachasqallanta chinkarachiwanankupaq pawaykamuwaptinkum.

¹⁵Qamqa caballoykikunawanmi lamar qochapipas purinki, tinpurichkaq yakukunapim kallpanki.

¹⁶Kaykunata uyariykuspaymi mancharikurqani, simillaypas katkatatarqam, chakillaypas manam sayayta atirqachu, cuerpollaypas mana kallpayuqñam rikurirurqa. Chaywanpas ñoqallayqa qasillallam ñakarichiqniyku llaqtata Diospuni ñakarichinan punchawta suyallasaq.

¹⁷Higos sachakuna manaña waytaptinpas, uvaskuna manaña ruruptinpas, aceitunas sachakuna manaña ruruptinpas, chakrakunapi kawsaykuna manaña qespiptinpas, kanchanpi ovejakuna tukuruptinpas, corralpi vacakuna manaña kaptinpas,

¹⁸ñoqaqa Tayta Diosllapim kusikusaq, Salvaqniy Diosllapim kusikusaq.

¹⁹Tukuy Atiyniyuq Tayta Diosmi kallpanchaqniyqa, chakillaytapas luwichupa chakinta hinaraqmi ruwaykapuwan, hinaspanmi altonkunata purichikuwan.