Read Biblia Revisión Chuya Qellqa 1992 – Chuya Qellqa 1992 Sofonías 2 Bible Online

Sofonías 2 - Biblia Revisión Chuya Qellqa 1992 – Chuya Qellqa 1992 bible

Sofonías 2

¹Mana penqakuq runakuna, huñunakuspa yuyaymanaychik,

²qopa hina huk punchawllapi manaraq chinkaruchkaspa, Tayta Diospa hatun piñakuynin punchaw hawaykichikman manaraq chayaramuchkaptin.

³Kay pachapi llapallan llampu sonqo runakuna, kamachikuyninkunata ruwayman churaq runakuna, Tayta Diosta maskaychik. Allinta ruwaspayá uchuychakuychik, hinaspaqa icharaqpas Tayta Diospa piñakuynin punchawmanta pakaykusqaraq kawaqchik.

⁴Gaza llaqtaqa chunninqam, Ascalón llaqtapas purmanqam; Asdod llaqtapi yachaqkunapas punchawpacham qarqosqa kanqaku, Ecrón llaqtapi yachaqkunapas sapinmanta chutasqam kanqaku.

⁵Lamar qochapa patanpi yachaqkuna, Creta llaqtapi yachaqkuna, ¡imallapiraq rikukunkichik! Qamkunapa contraykichikpim Tayta Dios kaynata rimarin: “Filisteokunapa yachanan Canaán llaqta, manaña runayuq kanaykikamam purmachisqayki”, nispa.

⁶Lamar qochapa patanpi llaqtam sumaq pastopa kanan allpaman tikrasqa kanqa, oveja michiqkunam chaypi huñunakunqa, ovejakunapa kanchanñam kanqa,

⁷Judamanta puchuqkunapaqmi kanqa, ovejankutapas chaypiñam michinqaku. Ascalón llaqtapa wasinkunapim paykunaqa tutanpas samakunqaku. Chaynaqa, kanqa Tayta Diosninku watukuspa preso risqankumanta kutichimusqanraykum.

⁸ Tukuy Atiyniyuq Tayta Diosmi kaynata nin: Moab runakunapa, Amón runakunapa kamikuynintam uyariruni, paykunam llaqtayta penqayman churaspanku llaqtaypa allpanwan allpankutapas miraykachikurqaku.

⁹Chayraykum Tukuy Atiyniyuq Tayta Dios kaynata nin: Moab nacionmi Sodoma hina kanqa, Amón castakunapas Gomorra hinam kanqa, itanakunapa wiñananmanñam tikrakunqa, kachi orqomanñam tikrakunqa, mana imapa kanan chunniqñam wiñaypaq kanqa. Llaqtaymanta puchuqkunam tukuy imankupipas munaychakunqaku.

¹⁰Chaykunam pagon kanqa Moab runakunapaqwan Amón castakunapaq, Tukuy Atiyniyuq Tayta Diospa llaqtanta kamispa allpankutapas Diospa llaqtanpa allpanwan mirachikusqankurayku.

¹¹Tayta Diosmi paykunapa contranpi manchakuypaqta hatarinqa, kay pachapi llapallan idolokunatam chinkarachinqa, hinaspanmi tukuy hinastinpi payllaña yupaychasqa kanqa, lamar qochapa chawpinpi llaqtakunapas paytam yupaychanqaku.

¹²Etiopía nacionpi runakunatapas Diosmi espadanwan wañuchinqa.

¹³Norte lawman makinta haywarispanmi Asiria nacionta chinkarachinqa, Nínive llaqtatapas pasaypaqta purmarachispam aqopa kanan chaki chunniqmanña tikrarunqa.

¹⁴Wasinpa qerunkunatapas hurqoruptinkum ovejakunawan purun animalkunallaña puñunqaku, pilarninkunapipas tukuwan erizollañam yachanqaku, ventanankunapiwan qawiñankunapipas pakpakakunallañam waqanqaku.

¹⁵Chaynatam chay hatun tukuspa hawka kawsakuq llaqta tukunqa. Runankunapas chay llaqtamantaqa kaynataraqmi niqku: “Llaqtanchik hinaqa manam kay pachapi ima llaqtapas kanchu”, nispankuraq. ¡Imaynamá tuñichisqa, purun animalkunapa uchkunñaqa rikurirun! Pipas chayninta pasaqqa burlakuspam umantapas kuyuchinqaraq.