Read Biblia Revisión Chuya Qellqa 1992 – Chuya Qellqa 1992 Sofonías 3 Bible Online

Sofonías 3 - Biblia Revisión Chuya Qellqa 1992 – Chuya Qellqa 1992 bible

Sofonías 3

¹¡Imallapiraq rikukunqa! mana kasukuq huchapa intusqan ñakarichikuq llaqta.

²Payqa manam Diospa Chuya siminta uyarirqachu, manam corregichikuytapas munarqachu, Tayta Diospipas manam hapipakurqachu, nitaqmi asuykuytapas munarqachu.

³Kamachiqninkunapas piña león hinam, juezninkunapas chunniqpi atoq hinam, paykunaqa manam tullutapas paqarinnintinkamaqa puchunkuchu.

⁴Profetankunapas hatun tukuq hinaspa iskay uya llullakunam, sacerdotenkupas Diospa altarnintam qachacharunku, Diospa kamachikuynintam saruparunku.

⁵Tayta Diosmi ichaqa chawpinkupi allinllata ruwan, mana allintaqa manam ruwanchu, Payqa sapa achikyaqtam kamachikuyninkunata rimarin. Mana allin runam ichaqa mana penqakuq qara uya.

⁶Tayta Diosmi kaynata nin: Nacionkunatam chinkarachini, torrenkunatapas murallankunatapas lliwtam tuñirachini, callenkunatapas pasaypaqtañam chunnirachini, runakunapas chaynintaqa manañam purinñachu. Purmasqa llaqtakunapiqa, manañam chulla runapas kanñachu.

⁷Hinaspaymi nirqani: Jerusalenqa manchakuwanqañachá, corregisqaytapas chaskikunqañachá, wasinkunapas manañachá castigasqayraykuqa purmanqañachu, nispay. Ichaqa paykunam tukuy rikchaqmana allinkuna ruwayta chaylla qallaykurqaku.

⁸Chayraykum Tayta Dios kaynata nin: Contraykichikpi hatarispay juzganay punchawta suyaykuychik. Nacionkunata llaqtakunatam huñunarusaq hinaspaymi hatun piñakuyniywan paykunata castigarusaq. Piñakuyniypa rupariynin kañaruptinmi kay allpa pacha puchukanqa.

⁹Chay punchawkunapim ñoqa Tayta Diosta qayakamuwanankupaq runakunapa siminta chuyanchaykusaq, hinaptinmi huk sonqollaña serviwanqaku.

¹⁰Etiopía nacionpi mayukunapa waklawninkunamantaraqmi, cheqechisqa llaqtay mañakuwaqniy hamuspa ofrendakunatapas apamuwanqa.

¹¹Kuyasqay llaqtalláy, chay punchawpiqa manañam penqakunkiñachu mana allinkunata ruwaspa contraypi hatarisqaykimantapas, pay tukuqkunatawan hatun tukuqkunata chawpikimanta chinkarachisqayrayku. Chaynapim sapaqchakusqay orqopiqa manaña haykapipas mastaqa contraypi hatarinkiñachu.

¹²Chawpikipim saqeykusaq uchuychakuqkunatawan wakchakunallataña, paykunam ñoqa Tayta Diospi hapipakuwanqaku.

¹³Israelpi puchuqkunapas manañam mana allintaqa ruwanqakuñachu, nitaqmi llullakunqakuñachu, manañam pitapas engañanqakuchu. Michisqa kaspankum hawkaña samakunqaku, manchachiqninkupas manañam kanqañachu, nispa.

¹⁴Sión llaqtapi yachaqkuna, kusikuymanta takiychik, Israel nacionniyuq runakuna, kusikuymanta qapariychik, Jerusalén llaqtapi yachaqkuna, tukuy sonqomanta kusikuychik.

¹⁵Tayta Diosmi castigasunaykipaq rimarisqanta suchurachin, enemigoykikunatam qarqorun. Israel llaqta, reyniki Tayta Diosmi chawpikipi tarikun, manañam imamantapas manchakunkiñachu.

¹⁶Chay tiempopim Jerusalenta ninqaku: “Sión llaqta ama manchakuychu, amayá makikipas hukmanyachunchu.

¹⁷Tayta Diosmi chawpikipi tarikun, payqa Tukuy Atiyniyuqmi, salvaykusunkim. Señorqa anchatam qamrayku kusikunqa. Kuyakuyninwanmi musoq kawsayta qosunki, qamraykum kusikuspan takinqa”, nispanku.

¹⁸Tayta Diosmi kaynata nin: Kusikuy punchawpi hinam sasachakuyta qanmanta suchurichisaq, hatun penqaynikimantam librasqayki.

¹⁹Chay tiempopim lliw ñakarichisuqnikikunata ñakarichisaq, wistu ovejakunatam salvaykusaq, chinkaqtapas maskamuspaymi huñumusaq. Penqaypi kaynikitam reqsisqa kaymanwan pipapas alabananmanña tikrarusaq.

²⁰Chay tiempopim huñumuspa kutichimusqaykichik, hinaspaymi kay pachapi lliwpa reqsisqantaña, chaynataq lliwpa respetanantaña ruwasqaykichik. Chaynataqa ruwasqaykichik, preso risqaykichikmanta kutichimuspaymi. Ñoqa Tayta Diosmi chaynata nini.