Read Biblia Revisión Chuya Qellqa 1992 – Chuya Qellqa 1992 Hageo 2 Bible Online

Hageo 2 - Biblia Revisión Chuya Qellqa 1992 – Chuya Qellqa 1992 bible

Hageo 2

¹Chay watapa qanchis kaq killanpa iskay chunka hukniyuq punchawninpim, profeta Hageota Tayta Dios kaytaqa nirqa:

²Judapi kamachikuq Salatielpa churin Zorobabeltawan Josadacpa churin sumo sacerdote Josueyta, chaynallataq puchuq runakunatapas kaynata nimuy:

³¿Yaqaraqchum qamkunamanta pillapas kachkanraq ñawpaq tiempopi kay templopa sumaq kayninta rikuq? ¿Imaynatataq kay templota kunan qawachkankichik? ¿Manachum kay qawasqaykichik temploqa ñawpaq templomanqa mana imallanpipas rikchakunchu?

⁴Chaynaqa, Tayta Diosmi nin: “Zorobabel kallpanchakuy, Josadacpa churin sumo sacerdote Josué qampas kallpanchakuy; kay allpapi llapallan runakuna, qamkunapas kallpanchakuychik hinaspa llamkaychik, ñoqa Tayta Diosmi qamkunawan kachkani”, nispa. Tukuy Atiyniyuq Tayta Diosmi chaynata nin.

⁵Imaynam Egiptomanta lloqsimuptikichik qamkunawan pactota ruwasqayman hinam, Espirituy qamkunata yanapasunkichik, chaynaqa ama manchakuychikchu.

⁶Tukuy imapa hawanpi munaychakuq Tayta Diosmi kaynata nin: Manapas unaymantam, cielokunatawan kay pachata, lamar qochatawan chaki allpata kuyurichisaq.

⁷Llapa nacionkunatam katkatatachisaq; llapa nacionkunam hamunqaku qori-qollqenkuta aparikuspa, kay temploymi ancha kuyayllapaq kanqa. Tukuy imapi munaychakuq Tayta Diosmi chaynata nin.

⁸Tukuy Atiyniyuq Tayta Diosmi nin: Qoripas qollqepas ñoqallapam, nispa.

⁹Kay templopa sumaq kayninqa, punta kaq templopa sumaq kayninmantapas aswan hatunmi kanqa. Hinaptinmi hawkayayta kay allpapi qosqaykichik. Tukuy Atiyniyuq Tayta Diosmi chaynata nin.

¹⁰Rey Darío iskay wataña munaychakuchkaptinmi, isqon kaq killapa iskay chunka tawayuq punchawninpi, profeta Hageota,

¹¹Tayta Dios rimapayaspan nirqa: Kamachikuyniykunamanta llapa sacerdotekunata kaynata tapumuy:

¹²Sichum Diospaq sapaqchasqa aychata pipas millqayninpi apachkaptin, chay runapa pachan tuparunman tantaman, mikuyman, vinoman, aceiteman otaq ima mikuymanpas hinaptinqa ¿yaqachu chay mikuy Diospaq sapaqchasqaña rikurinman? nispa. Sacerdotekunañataqmi nirqaku: Manam, nispanku.

¹³Chaymi huktawan Hageo tapurqa: Sichum hukkaqnin wañusqapa cuerponta llapcharuspa millakuypaqña kachkaspan, ima mikuytapas tupaykunman hinaptin ¿tupaykusqanraykuchu chay mikuy millakuypaqña rikurirun? nispa. Sacerdotekunañataqmi nirqaku: Arí, millakuypaqñam rikurirun, nispanku.

¹⁴Hinaptinmi Hageo nirqa: Tayta Diosmi qamkunamanta kaynata nin: Chaynam kay runakunapa imaña ruwasqankupas chaynataq ofrecewasqankupas millakuypaqña.

¹⁵Chaynaqa, temploypa perqankuna churayta manaraq qallaykuchkaspaykichikyá tukuy sonqoykichikmanta sumaqta yuyaymanaychik.

¹⁶Manaraq kaykuna pasakuchkaptinqa, pipas iskay chunka costalta cosechasqanman rispam chunkallataña tarirqa; chaynallataqmi pichqa chunka puyñu vinota hurqonanpaq hamuqpas, iskay chunka puyñullataña hurqorqa.

¹⁷Llamkasqaykichiktapas rupachkaq wayrawan, qasawan, runtu parawanmi tukuchirqani, ichaqa manam ñoqaman kutirikamuwarqankichikchu. Tayta Diosmi chaynata nin.

¹⁸Kunanmantayá, kay isqon kaq killapa iskay chunka tawayuq punchawninpi temploypa cimientonkuna churay qallarisqaykichikmanta qepamanyá, sonqoykichikpi sumaqta yuyaymanaychik.

¹⁹¿Manaraqchu taqekunapi muhu tarikun? Uvas planta, higos sacha, olivos sacha, granadilla sacha mana sisaptinpas, kunanmantaqa ñoqam bendecisqaykichik, nispa.

²⁰Hina chay punchawllapim profeta Hageota Tayta Dios rimapayaspan kamachirqa kaynata:

²¹Judapi kamachikuq Zorobabelta kaynata nimuy: Cielokunatawan kay pachatam katkatatachisaq;

²²nacionkunapa atiynintam tuñichisaq, munaychakuqkunatam puchukachisaq; guerrapaq carretakunatawan manejaqninkunatam wichichisaq, caballokunapas sillakuqninpiwanmi wañunqaku, kikinkupurallam espadankuwan wañuchinakunqaku.

²³Tukuy Atiyniyuq Tayta Diosmi kaynata nin: Salatielpa churin serviqniy Zorobabel, chay punchawpim qamta akllasqayrayku sellona anillota hina ruwasqayki. Tukuy Atiyniyuq Tayta Diosmi chaynata nin.