Read Biblia Revisión Chuya Qellqa 1992 – Chuya Qellqa 1992 Zacarías 1 Bible Online

Zacarías 1 - Biblia Revisión Chuya Qellqa 1992 – Chuya Qellqa 1992 bible

Zacarías 1

¹Rey Darío iskay wata pusaq killanña munaychakuchkaptinmi, Iddopa willkan chaynataq Berequiaspa churin Zacariasta Tayta Dios kaynata rimapayarqa:

²Ñoqa Tukuy Atiyniyuq Tayta Diosmi, ñawpaq taytaykichikkunapa contranpi llumpayta piñakururqani.

³Chaynaqa, kaynata nimuy, Tukuy Atiyniyuq Tayta Diosmi kaynata nin: “Kutirikamuwaychik hinaptinqa ñoqapas qamkunamanmi kutirikamusaq”. Tukuy Atiyniyuq Tayta Diosmi chaynata nin.

⁴Amayá taytaykichik hinaqa kaychikchu, paykunatam ñawpaq profetakuna kaynata qaqcharqaku, Tukuy Atiyniyuq Tayta Diosmi kaynata nin: “Mana allin kawsaynikichikmantawan mana allin ruwaynikichikmanta kutirikamuwaychik”, nispa. Ichaqa paykunam mana uyariqpas tukurqakuchu, nitaqmi kaqpaqpas hapirqakuchu. Tayta Diosmi chaynata nin.

⁵Kunanqa ¿maytaq chay ñawpaq taytaykichikkunaqa? ¿Profetakunapas wiñaypaqchu kawsanqaku?

⁶Profetaykunawan willachisqay simiykunawan kamachikuyniykunam ichaqa ñawpaq taytaykichikkunata hayparurqa. Hinaptinmi paykuna ñoqaman kutirikamuspa nirqaku: “Tukuy Atiyniyuq Tayta Diosmi tanteasqanman hina ñoqanchikwan ruwarun, payqa imaynam kawsasqanchikman chaynataq ruwasqanchikman hinam ñoqanchikwan ruwarun”, nispanku.

⁷Rey Darío iskay wataña munaychakuchkaptinmi, chunka hukniyuq killapa otaq Sebat sutiyuq killapa iskay chunka tawayuq punchawninpim, Tayta Dios rimapayarqa, Iddopa willkan hinaspa Berequiaspa churin Zacariasta.

⁸Huk tuta visionpi rikusqantam profeta Zacarías willakurqa kaynata: Huk runatam puka caballopi silladata rikurqani. Paymi arrayankunapa kanan qechwapi sayachkasqa. Qepanpiñataqmi sayachkasqaku puka caballokuna, bayo caballokuna hinaspa yuraq caballokuna.

⁹Chaymi tapurqani: Señorlláy ¿Pikunataq wak sillada runakunaqa? nispay. Hinaptinmi rimapayawaqniy ángel niwarqa: Ñoqam qawachisqayki pikunam kasqanta, nispa.

¹⁰Hinaptinmi arrayankunapa chawpinpi kaq runa nirqa: Kay silladakunaqa kay pachata patan-patan purimunankupaq Tayta Diospa kachamusqankunam, nispa.

¹¹Chay silladakunañataqmi, arrayankunapa chawpinpi sayaq Tayta Diospa angelninman kaynata nirqaku: “Ñoqaykum kay pachata patan-patan puriramuniku, hinaspam rikuramuniku kay pachaqa mana imapa pasasqan hawkalla kasqanta”, nispanku.

¹²Chaymi Tayta Diospa angelnin qaparirqa kaynata: ¡Tukuy Atiyniyuq Tayta Dios, qanchis chunka watañam Jerusalenpaqwan Judá nacionpaq piñakurunki! ¿Hayka unayraqtaq pasanqa paykunata llakipayarinaykipaq? nispa.

¹³Hinaptinmi rimapayawaqniy angelta rimapayamuspan, kuyapayakuq hinaspa consuelakuq simikunata Tayta Dios nimurqa.

¹⁴Chaymi rimapayawaqniy ángel kamachiwarqa kaynata willakunaypaq: Tukuy Atiyniyuq Tayta Diosmi kaynata nin: Ñoqaqa anchatam Siontawan Jerusalén llaqtata kuyani.

¹⁵Ichaqa mana imapas qokuq nacionkunapaqmi llumpayta piñakuruni. Tumpallataraq piñakusqayraykum paykuna aswanraq mana allinta ruwarqaku.

¹⁶Chayraykum Tayta Dios kaynata nin: Kunanmi Jerusalén llaqtata yapamanta llakipayaykusaq, hinaptinmi temploypas chaynataq Jerusalenpas musoqmanta hatarichisqa kanqa, nispa.

¹⁷Chay angelqa kamachiwarqataqmi kaytapas: Tukuy Atiyniyuq Tayta Diosmi kaynata nin: “Llaqtaykunatam huktawan allin kaqkunawan llimparichisaq. Kikiypunim Sión llaqtata consuelaykusaq, hinaspaymi Jerusalentapas kaqllamanta llaqtaypaqña akllakuykusaq”, nispa.

¹⁸Huktawan qawarispaymi visionpi rikururqani tawa waqrakunata.

¹⁹Chaymi rimapayawaqniy angelta tapurqani: ¿Ima ninantaq kay waqrakunaqa? nispay. Hinaptinmi payñataq niwarqa: Kay waqrakunaqa Judata, Israelta chaynataq Jerusalentapas cheqerachiq atiykunam, nispa.

²⁰Chaymantam Tayta Dios qawachiwarqa tawa herrerokunata.

²¹Chaymi tapurqani: ¿Imapaqtaq kay herrerokuna hamurunku? nispay. Hinaptinmi payñataq niwarqa: Imaynam chay waqrakuna Judá nacionta cheqerachirqa manaña pipas uman hoqariy atinankama, kay herrerokunañataqmi hamurunku Judá nacionta waqrachkaq hina manchakuypaqta katkatatachispa, atiyninkuwan cheqerachiq nacionkunapa waqranta kuchuspanku pampaman wichichinankupaq, nispa.