Read Biblia Revisión Chuya Qellqa 1992 – Chuya Qellqa 1992 Zacarías 12 Bible Online

Zacarías 12 - Biblia Revisión Chuya Qellqa 1992 – Chuya Qellqa 1992 bible

Zacarías 12

¹Israelpaq Tayta Diospa rimarisqan simikuna. Cielokunata mastariq, kay pachapa cimientonta churaq hinaspa runaman kawsay qoq Tukuy Atiyniyuq Tayta Diosmi kaynata nin:

²Ñoqam Jerusalenta muyuriqninpi nacionkunapaq sinkachikuq vasota hina churani. Chay llaqtakunam Jerusalenta muyuriruspanku, Judapa wakin llaqtankunatapas atacanqaku.

³Chay punchawpim Jerusalén llaqtata, llapa nacionkunapa contranpi llasa-llasaq rumita hina ruwarusaq; pipas hoqariy munaqtaqa chay rumim ñuturunqa. Hinaptinmi kay pachapi llapallan llaqtakuna contranpi huñunakunqaku.

⁴Tayta Diosmi kaynata nin: Chay punchawpim llapa caballokunata mancharichispay sillakuqkunatañataq locoyarachisaq. Judapa mirayninkunata waqaychaspaymi nacionkunapa caballonkunatañataq ñawsayarachisaq.

⁵Chayta qawaykuspankum Judá nacionpi kamachikuqkuna sonqonkupi ninqaku: “Tukuy Atiyniyuq Tayta Diosmi Jerusalenpi yachaqkunapa Diosninqa, paytaqmi kallpanchaqninkupas”, nispanku.

⁶Chay punchawpim Judá nacionpi kamachiqkunata yanta chawpipi sansata hina ruwarusaq chaynataq gavillakunapa chawpinpi ratachkaq ninata hina, hinaptinmi muyuriqninpi nacionkunata alleq lawman ichoq lawman paykuna kañanqaku. Jerusalenpi runakunañataqmi hina llaqtankupi yachanqaku.

⁷Tayta Diosmi Judá naciontaraq puntata salvaykunqa, chaynapi Davidpa castankunawan Jerusalenpi yachaqkuna, Judá nacionpi mana hatunchakurunankupaq.

⁸Chay punchawpim Jerusalenpi yachaqkunata Tayta Dios waqaychanqa; chay tiempopiqa manchati runapas rey David hinam allinnin qari-qari kanqa, rey Davidpa mirayninkunañataqmi Dios hinaraq kanqaku, ñawpaqninkuta riq Tayta Diospa angelnin hinaraqmi kanqaku.

⁹Chay punchawpim Jerusalenpa contranpi hamuq nacionkunata puchukachisaq.

¹⁰Davidpa mirayninkunamanwan Jerusalenpi yachaqkunamanmi ichaqa llakipayakuq hinaspa mañakuq espirituta chaqchurimusaq. Hinaptinmi ñoqata, lanzawan tuksisqankuta qawaspa, piwi churinkumanta hina waqanqaku, sapallan wawankumanta hinam llakikunqaku.

¹¹Chay punchawmi Jerusalén llaqtapi sinchi waqakuy kanqa, Hadad-rimón sutiyuq idolonkumanta Meguido pampapi waqasqankuta hinam waqanqaku.

¹²Kay nacionpi yachaqkunam, castankuman hina sapakama waqanqaku: Davidpa mirayninkunam sapaqpi waqanqaku, warminkupas sapaqpitaqmi waqanqaku; Natanpa mirayninkunam sapaqpi waqanqaku, warminkupas sapaqpitaqmi waqanqaku.

¹³Leví castakunam sapaqpi waqanqaku, warminkuñataqmi sapaqpi; Simeipa castankunam sapaqpi waqanqaku, warminkuñataqmi sapaqpi.

¹⁴Wakin ayllukunapas chaynatapunim sapakama waqanqaku, warminkupas sapaqpitaqmi waqanqaku.