Read Biblia Revisión Chuya Qellqa 1992 – Chuya Qellqa 1992 Mateo 12 Bible Online

Mateo 12 - Biblia Revisión Chuya Qellqa 1992 – Chuya Qellqa 1992 bible

Mateo 12

¹Jesusmi tarpusqa chakrapa chawpinta samana punchawpi richkarqa. Discipulonkunañataqmi yarqarachikuspanku trigopa espiganta rachuspa mikuyta qallaykurqaku.

²Chayta qawaspankum llapa fariseokunañataq Jesusta nirqaku: Discipuloykikunaqa samana punchawpi mana ruwanatam ruwachkanku, nispanku.

³Jesusñataqmi nirqa: ¿Manachum leerqankichik Davidwan puriqmasinkuna yarqaymanta kaspanku imam ruwasqanta?

⁴Diospa wasinman yaykuruspankum Diospaq sapaqchasqa tantakunata mikururqaku, chay tantakunaqa manam paykunapa mikunanchu karqa aswanqa sacerdotekunallapam.

⁵¿Manachum Moisespa leyninpipas leerqankichik templopi sacerdotekuna sabadopi llamkachkaspapas mana huchallikusqankuta?

⁶Cheqaptapunim nikichik, kaypiqa templomantapas aswan hatun kaqmi kachkan.

⁷¿Manachu qamkuna yacharqankichik: “Ñoqaqa llakipayakuq kanaykichiktam munani, manam animalkuna wañuchipuwanaykichiktachu”, nispa nisqanta? Chayta yachaspaykichikqa manachá llapa mana huchayuqkunata juzgawaqchikchu.

⁸Chaynaqa, yachaychikyá, runapa Churinqa samana punchawpapas Señorninmi, nispan.

⁹Jesusmi chaymanta pasakuspan sinagogaman yaykururqa.

¹⁰Chaypim kachkarqa chakisqa makiyuq runa, hinaptinmi Jesusta imawanpas wichirachiyta maskaspanku kaynata tapurqaku: ¿Allinchu kanman samana punchawpi huk onqoq runa sanoyachisqa kaynin? nispanku.

¹¹Chaymi Jesús nirqa: ¿Mayqannikichiktaq ovejaykichik uchkuman wichiykuptin, samana punchawpi mana hurqowaqchikchu?

¹²¡Runakunaqa ovejamantapas aswan valorniyuqmi! Chaynaqa, leyqa permitinmi samana punchawpi allin kaqkuna ruwaytaqa, nispan.

¹³Hinaspam chay runata nirqa: Makikita haywariy, nispa. Haywariykuptinmi sanoyarurqa, hinaspam huknin makin hinaña rikurirurqa.

¹⁴Fariseokunañataqmi lloqsiruspanku Jesusta wañuchinankupaq tanteanakurqaku.

¹⁵Jesusmi chayta yacharuspan chaymanta pasakurqa, hinaptinmi achkallaña runakuna qatikurqaku. Payñataqmi onqoqkunata sanoyachispan,

¹⁶paymanta ama pimanpas willakunankupaq kamachirqa.

¹⁷Chaynataqa kamachirqa profeta Isaiaspa kayna nisqan cumplikunanpaqmi:

¹⁸“Paymi serviqniyqa, paytam akllakurqani, payqa kuyasqaymi, payraykum kusisqa kachkani. Espirituytam payman huntaykusaq, Diosta mana reqsiq nacionkunamanmi allin kawsakuymanta willakunqa.

¹⁹Manam peleanqachu nitaqmi qaparinqachu, callekunapi qayakuptinpas manam pipas uyarinqachu.

²⁰Raqrasqa soqosllatapas manam pakinqachu, wañunayachkaq mecherotapas manam wañuchinqachu, allin kawsakuyta hatarichinankama.

²¹Llapa nacionkunapas paypa sutinpi hapipakuspam suyanqaku”.

²²Chaymantam demoniopa huntasqan mana rimaq ñawsa runata Jesusman aparamurqaku. Chaymi sanoyarachiptin qawarikururqa hinaspam rimarqaña.

²³Llapa runakunañataqmi admirakuspa nirqaku: ¿Kaychu kanman Davidpa churin? nispanku.

²⁴Fariseokunañataqmi chayta uyariruspanku nirqaku: Kay runaqa demoniokunataqa qarqon demoniokuna kamachiq Beelzebupa atiyninwanmi, nispanku.

²⁵Imaynam yuyaymanasqankuta yacharuspanmi Jesús nirqa: Ima nacionpas kikinpura rakinasqa kaspaqa purmachisqam kanqa, llaqtapas otaq ayllupas rakinasqa kaspaqa manam takyanqachu.

²⁶Sichum kikillanta Satanás qarqokuptinqa ¿imaynataq munaychakuynin takyanman?

²⁷Qamkunam ninkichik Beelzebupa atiyninwan demoniokuna qarqosqayta; chaynaqa ¿pipa atiyninwantaq qatiqnikichikkunaqa demoniokunata qarqonku? Chayraykum paykuna juzgaqnikichik kanqa.

²⁸Sichum Diospa Espiritunwan demoniokunata qarqoptiyqa, cheqaptapunim Diospa munaychakuynin qamkunaman chayaramusunkichik.

²⁹¿Imaynataq kallpasapa runapa wasinman suwananpaq pipas yaykurunman puntata payta mana chaqnaruchkaspaqa? Chaqnaruspallam imantapas suwarunmanqa.

³⁰Pipas mana favorniypi kaspaqa contraypim kachkan, cosechapi ñoqawan mana huñuqqa usuchinmi.

³¹Chayraykum nikichik: Diosqa pampachanqam runakunapa tukuy rikchaq huchankutawan kamiqninkunatapas, Chuya Espirituta kamiqkunatam ichaqa mana haykapipas pampachanqachu.

³²Pipas runapa Churinpa contraypi rimaqqa pampachasqam kanqa, Chuya Espiritupa contranpi rimaqmi ichaqa mana pampachasqachu kanqa, kay tiempopipas nitaq hamuq tiempopipas.

³³Allin sachaqa allinkunallatam rurun, mana allin sachañataqmi mana allinkunallata rurun, sachataqa ruruyninpim reqsinchik.

³⁴¡Maqta urupa mirayninkuna! ¿Imaynataq mana allin runakuna kachkaspa allin kaqkunata rimawaqchik? Runaqa imam sonqonpi kasqanman hinam riman.

³⁵Allin ruwaq runaqa, allin kaqkunata sonqonpi waqaychasqanman hinam allinllata riman, mana allin runañataqmi sonqonpi mana allin kaqkuna waqaychasqanman hina riman.

³⁶Nikichikmi, juicio punchawpim tukuy mana allinkuna rimasqaykichikmanta llapallaykichik cuentata qonkichik.

³⁷Rimasqaykiman hinam pampachasqapas otaq condenasqapas kankichik, nispa.

³⁸Fariseokunamanta hinaspa Diospa leynin yachachiqkunamantam wakiqninku Jesusta nirqaku: Yachachikuq, milagro ruwasqaykitam qawayta munaniku, chaynapi Diosmanta hamusqaykita yachanaykupaq, nispanku.

³⁹Jesusñataqmi nirqa: Kay mana kasukuq hinaspa huchasapa runakunam milagro ruwanayta munachkanku, ichaqa manam ima milagropas ruwasqachu kanqa. Qawaspaqa-qawankichik profeta Jonasta imam pasasqallantam.

⁴⁰Imaynam Jonás kimsa punchaw kimsa tutan hatun challwapa wiksanpi karqa, chaynam runapa Churinpas kimsa punchaw kimsa tutan allpapa ukunpi kanqa.

⁴¹Nínive llaqtapi runakunam kay runakunawan kuska juicio punchawpi kawsarimunqaku, hinaspam kay runakunata acusanqaku. Paykunaqa Jonaspa willakusqanwanmi huchankumanta wanakururqaku, kaypiqa Jonasmantapas aswan allin willakuqmi kachkan.

⁴²Sur lawmanta Sabá reinapas juicio punchawpim kay runakunawan kuska kawsarimuspan paykunata acusanqa. Payqa kay pachapa tukupaynin karu-karu llaqtamantaraqmi rey Salomonpa yachaynin uyariq hamurqa. Kaypiqa Salomonmantapas aswan yachayniyuqmi kachkan.

⁴³Runamanta mana allin espíritu lloqsiruspaqa, maypi samaykuyta maskaspam chaki allpakunapi purin, mana tarispanñataqmi kaynata yuyaymanan:

⁴⁴“Maymi lloqsimusqay wasiymanyá kutisaq”, nispan. Kutiruspanñataqmi chunnichkaqta, sumaq allichasqata chaynataq sumaq pichasqata tariykun.

⁴⁵Hinaspanmi chayman kutirispan paymantapas aswan mana allin qanchis espiritukunataraq pusaramun hinaspam yaykuykuspa chaypi yachakun. Chaynapim chay runaqa ñawpaq kasqanmantapas aswan mana allinña rikurirun. Chaynam pasanqa kay mana allin miraykunatapas.

⁴⁶Runakunata Jesús rimapayachkaptinmi, mamanwan wawqenkuna chayaramurqaku, hinaspam Jesuswan rimayta munaspanku hawallapi suyarqaku.

⁴⁷Chaymi Jesusman hukkaqnin willarqa: Mamaykiwan wawqekikunam qanwan rimayta munaspa hawapi sayachkanku, nispa.

⁴⁸Hinaptinmi Jesusñataq chay willaqninta nirqa: ¿Pitaq mamaywan wawqeykunaqa? nispa.

⁴⁹Hinaspam discipulonkunata qawarispan nirqa: Paykunam mamaywan wawqeykunaqa.

⁵⁰Pipas, hanaq pachapi kaq Taytaypa munasqan ruwaqmi wawqeyqa, paniypas chaynataq mamaypas, nispa.