Read Biblia Revisión Chuya Qellqa 1992 – Chuya Qellqa 1992 Mateo 13 Bible Online

Mateo 13 - Biblia Revisión Chuya Qellqa 1992 – Chuya Qellqa 1992 bible

Mateo 13

¹Chay punchawmi wasimanta Jesús lloqsiruspan lamar qochapa patanpi tiyaykurqa.

²Ichaqa achkallaña runakuna asuykuptinmi barcaman qespiykuspan tiyaykurqa, llapa runakunañataqmi qocha patallanpi karqaku.

³Jesusmi tukuy imamanta rikchanachiykunawan yachachispan kaynata nirqa: Huk runam tarpukuq lloqsirqa.

⁴Muhuta maqcheptinmi wakiqnin muhu ñanman wichirqa, chaymi urpikuna hamuruspan mikururqaku.

⁵Wakinñataqmi mana ancha allpapa kasqan rumillaña ranraman wichirqa, hinaspanmi as allpallapi kasqanrayku chaylla wiñaramurqa,

⁶ichaqa mana sumaq sapichakusqa kasqanraykum inti lloqsiramuspan chakirachirqa.

⁷Wakin muhuñataqmi kichka-kichka ukuman wichirqa, hinaptinmi kichkakuna wiñaruspa eqoyarachirqa.

⁸Wakinñataqmi allin allpaman wichisqanrayku wiñaruspan huk muhullamanta pachakta, soqta chunkata hinaspa kimsa chunkata rururqa.

⁹Haykam uyariqkunaqa kasukuychikyá, nispa.

¹⁰Hinaptinmi discipulonkuna Jesusman asuykuspa tapurqaku: ¿Imanasqataq runakunata rikchanachiykunawan yachachinki? nispanku.

¹¹Chaymi payñataq nirqa: Diosmi qamkunamanqa munaychakuyninpi pakasqa kaqkunata yachachisunkichik, paykunamanmi ichaqa mana reqsichinchu.

¹²Kapuqniyuqmanqa achkataraqmi qonqaku, chaynapi aswan kapuqniyuqraq kananpaq; mana kapuqniyuqmantam ichaqa aslla kapuqninpas qechusqa kanqa.

¹³Chayraykum paykunamanqa rikchanachiykunawan rimapayani; paykunaqa qawachkaspankupas manam rikunkuchu, uyarichkaspapas manam entiendenkuchu.

¹⁴Chaynatam paykunapi profeta Isaiaspa kayna nisqan cumplikun: “Uyarichkaspapas manam entiendenqakuchu, qawachkaspapas manam rikunqakuchu.

¹⁵Kay runakunapaqa sonqonkupas rumiyasqam kachkan, rinrinkupas upayasqam kachkan, ñawinkupas wichqasqam kachkan. Mana qawakunankupaqmi ñawinkutapas wichqarunku, mana uyarinankupaqmi rinrinkutapas taparunku, chaynapi mana entiendenankupaq nitaq ñoqaman kutirikamunankupaq, chaynapi ñoqapas mana sanoyachinaypaq”, nispa.

¹⁶Qamkunaqa mayna kusisqam kankichik, ñawikichik qawakusqanwan chaynataq rinrikichik uyarikusqanwan.

¹⁷Cheqaptapunim nikichik, achka profetakunawan allin kawsakuq runakunam qamkunapa rikusqaykichik rikuykuyta munarqaku, ichaqa manam rikurqakuchu; uyarisqaykichiktam uyariykuyta munarqaku, ichaqa manam uyarirqakuchu.

¹⁸Uyariychik, kunanmi muhu tarpuqwan rikchanachisqaypa imam ninanta yachachisqaykichik:

¹⁹Ñanman wichiykuq muhum Diospa munaychakuyninmanta palabrata uyarichkaspan mana entiendeq runaman rikchakun, paypa sonqonpi tarpusqa muhuta supay hamuruspa qechurusqanrayku.

²⁰Rumillaña ranraman wichiqñataqmi rikchakun, palabrata uyariykuspa kusikuywan chaskiqman,

²¹ichaqa mana sumaqta sapichakusqanraykum mana unaytachu kawsarqa. Paykunam Diospa palabranrayku cheqnisqa qatikachasqa kaspanku chaylla wichirunku.

²²Kichka-kichka ukuman wichiykuq muhuñataqmi rikchakun, Diospa palabranta uyarichkaspan kay pachapi preocupacionkunawan hinaspa qori-qollqe kuyaywan engañarachikuq runaman. Tukuy kaykunam Diospa palabran uyarisqanta pamparuptin mana rurunñachu.

²³Allin allpaman wichiq muhuñataqmi rikchakun palabrata uyarispan entiendeq runaman. Chaymi huk muhullamanta rurun pachakta, soqta chunkata hinaspa kimsa chunkata, nispa.

²⁴Jesusmi huk rikchanachiytawan rimarispan nirqa: Diospa munaychakuyninqa rikchakun chakranpi allin muhuta tarpuq runamanmi.

²⁵Ichaqa puñunankukamam, enemigo hamuruspan vallikuta trigopa chawpinpi tarpuruspan pasakurqa.

²⁶Trigo wiñaruspan ruruyta qallaykuptinmi vallikupas rikurirurqa.

²⁷Hinaptinmi llamkaqkunañataq patronninman willamurqaku: Señorllayku, allin muhuta chakraykipi tarpuchkaptikiqa ¿maymantamá kay vallikuqa wiñaramun? nispanku.

²⁸Chaymi payñataq nirqa: Enemigoymi kaytaqa ruwarun, nispan. Hinaptinmi llamkapuqninkunañataq nirqaku: ¿Munankichu rispayku chay vallikuta qoraramunaykuta? nispanku.

²⁹Chaymi payñataq nirqa: Ama, yanqañataq trigotawan kuskata chutaramuwaqchik.

³⁰Kuskanyá rutunakama wiñachun, chaypiñam rutuqkunata kamachisaq vallikuta puntata ruturuspa gavilla-gavillata wataruspa kañaykunankupaq hinaspa trigotañataq taqeyman waqaychanankupaq, nispan.

³¹Jesusmi huk rikchanachiytawan nirqa: Diospa munaychakuyninqa rikchakun huk runapa tarpusqan mostaza muhumanmi.

³²[6]Mostazaqa llapallan muhumantapas uchuychallam, wiñaruspam ichaqa wakin qorakunatapas masyaruspan sachayarun, hinaptinmi urpikunapas kallmankunapi qesachakunku, nispan.

³³Jesusmi huk rikchanachiytawan nirqa: Diospa munaychakuyninqa levaduramanmi rikchakun, chay levadurawanmi huk warmi kimsa tupu harinata chapururqa hinaptinmi lliwta poqorachirqa, nispan.

³⁴Jesusmi tukuy kaykunata runakunaman rikchanachiykunawan yachachirqa, mana rikchanachispaqa manam imatapas yachachirqachu.

³⁵Chaynapi profetapa kayna nisqan cumplikunanpaq: Rikchanachiykunawanmi rimarisaq, kay pachata Dios unanchasqanmantapuni pakasqa kaqkunatam rimasaq, nispa.

³⁶Jesusmi runakunata aviaruspan wasiman yaykurqa, hinaptinmi discipulonkuna asuykuspanku nirqaku: Vallikuman rikchanachispa rimarisqaykipa imam ninatayá yachaykachiwayku, nispanku.

³⁷Chaymi payñataq nirqa: Chay allin muhu tarpuqqa runapa Churinmi.

³⁸Chakrañataqmi kay pacha, allin muhum Diospa munaychakuyninpa churinkuna, vallikuñataqmi supaypa churinkuna.

³⁹Chay valliku tarpuq enemigoqa diablom, cosecham kay pachapa puchukaynin, cosechaqkunañataqmi angelkuna.

⁴⁰Chaynaqa, imaynam vallikuta huñuruspa ninapi kañarunku, chaynam kay pachapa puchukayninpas kanqa.

⁴¹Runapa Churinmi angelninkunata kamachinqa, hinaptinmi munaychakuyninmanta llapa huchasapakunatawan runamasin pantachiqkunata huñunqaku,

⁴²hinaspam rawrachkaq hornoman wischuykunqaku. Chaypim qaparkachaspanku kirunkutapas kirichichinqaku.

⁴³Chuya kaqkunam ichaqa inti hinaraq Taytankupa munaychakuyninpi kancharinqaku. Haykam uyariqkunaqa kasukuychikyá.

⁴⁴Diospa munaychakuyninqa chakrapi pampasqa pakamanmi rikchakun. Chaytam huk runa tariruspan kasqallan pakapaykun, hinaspam kusisqallaña kallpaspan tukuy kapuqninta rantikaramuspan chay chakrata rantirun.

⁴⁵Diospa munaychakuyninqa sumaq perlaskuna maskaq negociantemanmi rikchakun.

⁴⁶Paymi sumaq perlasta tarirurqa, hinaspam tukuy kapuqninta rantikaramuspan chay perlasta rantirurqa.

⁴⁷Diospa munaychakuyninqa rikchakun, lamar qochaman wischuykuptinku tukuy rikchaq challwakunata hapimuq mallamanmi.

⁴⁸Mallaman challwakuna huntaruptinmi, challwaqkunañataq lamar qochapa patanman aysanku, chaypim tiyaykuspa challwata akllanku, hinaspam allinninta canastaman churanku, mana allinnintañataqmi wischunku.

⁴⁹Chaynam kanqa kay pachapa puchukayninpipas, angelkunam hamuspanku chuya runakunamanta mana allin runakunata rakinqa,

⁵⁰hinaspankum rawrachkaq hornoman wischuykunqaku. Chaypim qaparkachaspanku kirunkutapas kirichichinqaku, nispan.

⁵¹Chaymantam discipulonkunata Jesús tapurqa: ¿Yaqachu kaykunata entienderunkichik? nispan. Hinaptinmi paykuna nirqaku: Arí, Señor, nispanku.

⁵²Jesusñataqmi nirqa: Chayraykum Diospa munaychakuyninmanta allin yachachisqa Diospa leynin yachachiqkunaqa huk wasipa dueñonman rikchakunku, payqa tukuy kapuqninkuna waqaychasqanmantam musoqtapas otaq mawkatapas hurqomun, nispan.

⁵³Jesusmi kay rikchanachiykunata rimaruspan chaymanta pasakuspan

⁵⁴Nazaret llaqtanman chayarurqa, hinaspam sinagogapi yachachiyta qallaykurqa. Runakunañataqmi admirakuspa nirqaku: ¿Maymantataq kay yachaykunata hurqoramun? ¿Imaynatataq kay milagrokunata ruwan?

⁵⁵¿Manachum kay runaqa carpinteropa churin hinaspa Mariapa wawan? ¿Manachum wawqenkunapas Jacobo, José, Simón hinaspa Judas?

⁵⁶¿Manachum paninkunapas ñoqanchikwan kachkanku? ¿Maymantamá tukuy kaykunataqa hurqoramun? nispanku.

⁵⁷Jesusñataqmi paypi mana creesqankurayku nirqa: Profetaqa huklaw llaqtakunapim allin chaskisqa, llaqtanpiwan wasinpim ichaqa mana allin chaskisqachu, nispan.

⁵⁸Chaymi mana paypi creesqankurayku, llaqtanpiqa as milagrokunallata ruwarqa.