Read Biblia Revisión Chuya Qellqa 1992 – Chuya Qellqa 1992 Mateo 20 Bible Online

Mateo 20 - Biblia Revisión Chuya Qellqa 1992 – Chuya Qellqa 1992 bible

Mateo 20

¹Diospa munaychakuyninqa rikchakun uvas chakranpaq llamkaqkunata maskamunanpaq tutapayta lloqsiq chakrayuqmanmi.

²Paymi llamkaqkunawan haykatam pagananta tanteanakuruspan uvas chakranpi llamkamunankupaq kacharqa.

³Isqon horata plazaman lloqsispanmi, runakunata mana imatapas ruwachkaqta tarirurqa,

⁴hinaspanmi nirqa: “Qamkunapas uvas chakraypi llamkaq riychik, imam kaqtam pagapusqaykichik”, nispa. Chaymi paykuna pasarqaku.

⁵Chawpi punchawtawan kimsa hora tardeykuyta lloqsispanpas hina chaynallatam ruwamurqa.

⁶Pichqa hora tardeykuyta plazaman huktawan kutispanmi, runakunata mana imatapas ruwachkaqta tarirurqa, hinaspam tapuykurqa: ¿Imanasqataq mana imata ruwaspa tukuy punchaw yanqa kaypi kachkankichik? nispa.

⁷Chaymi paykuna nirqaku: “Llamkanaykupaqqa manam pipas minkawankuchu” nispanku. Hinaptinmi nirqa: “Qamkunapas chakrayman rispa llamkamuychik, imam kaqtam pagasqaykichik”, nispa.

⁸Tutaykuruptinmi mayordomonta chakrayuq nirqa: “Llamkaqkunata qayamuy hinaspa qepa yaykumuqkunamanta qallarispa punta yaykumuqkunapi tukunaykikama pagamuy”, nispa.

⁹Chaymi pichqa hora tardeykuyta llamkaq riqkuna hamuspanku huk punchaw llamkaypa pagonta chaskirqaku.

¹⁰Qallariyninmanta llamkaqkunañataqmi chayaramuspanku más chaskiyta piensarqaku, ichaqa paykunapas sapakamam huk punchaw llamkaypa pagollanta chaskirqaku.

¹¹Chaymi chaskiruspanku chakrayuqta nirqaku:

¹²“Kay qepa yaykumuqkunaqa huk horallatañam llamkarqaku, ñoqaykum ichaqa rupaypipas qallariyninmantapacha tukuylla punchaw llamkarqaniku, ichaqa paykunamanpas ñoqaykuman hinallataqmi pagaykunki”, nispanku.

¹³Chaymi chakrayuqñataq hukninta nirqa: Amigo, ñoqaqa pagachkayki rimasqanchikman hinallam. ¿Manachum huk punchaw pago jornalpaq rimarqanchik?

¹⁴Chaynaqa, pagoykita chaskispa pasakuy, kay qepa yaykumuqkunamanpas hina chaynallatam ñoqaqa pagayta munani.

¹⁵¿Manachum qollqeywanqa munasqayta ruwayman? ¿Icha allin runa kasqaywanchu envidiakunki? nispa.

¹⁶Chay rikchanachiyta tukuykuspam Jesús nirqa: Puntapi kaqkunam qepapi kanqaku, qepapi kaqkunañataqmi puntapi kanqaku. [9](Achkallañam qayasqakunaqa, akllasqakunam ichaqa aslla) nispan.

¹⁷Jesusmi Jerusalenman richkaspan chunka iskayniyuq discipulonkunata huklawman qayaykuspan nirqa:

¹⁸Jerusalén llaqtamanmi richkanchik, chaypim runapa Churin entregasqa kanqa llapa sacerdotekunapa kamachiqninkunaman hinaspa Diospa leynin yachachiqkunaman, paykunam wañuypaq sentenciaspanku

¹⁹Diosta mana reqsiq runakunapa makinman qoykunqaku, chaynapi paymanta burlakuspa, azotespa cruzpi chakatanankupaq. Ichaqa kimsa punchawmanmi kawsarimunqa, nispa.

²⁰Chaymantam Zebedeopa warmin, iskaynin wawankunapiwan Jesusman asuykurqaku hinaspankum ñawpaqninpi qonqorakuykuspanku mañakurqaku.

²¹Jesusñataqmi tapurqa: ¿Imatataq munanki? nispa. Chaymi Zebedeopa warmin nirqa: Kamachiyá munaychakuynikipi kay iskaynin wawaykuna, huknin alleq lawnikipi hukninñataq ichoq lawnikipi tiyanankupaq, nispa.

²²Jesusñataqmi nirqa: Manam imam mañakusqaykichiktapas yachankichikchu. ¿Yaqachu ñoqapa ñakarisqayta hina ñakariwaqchik? nispa. Hinaptinmi paykunañataq nirqaku: Arí, atisaqkum, nispanku.

²³Hinaptinmi Jesusñataq nirqa: Arí, cheqaptapunim qamkunapas ñoqa hina ñakarinkichik, chaywanpas alleq lawniypi otaq ichoq lawniypi tiyanaykichikpaqqa manam ñoqachu kamachisaq, chaypiqa tiyanqaku Taytaypa akllasqan kaqkunallam, nispa.

²⁴Chayta uyariruspankum chunkantin discipulonkunañataq Juanpaqwan Santiagopaq piñakururqaku.

²⁵Chaymi paykunata qayaykuspan Jesús nirqa: Yachasqaykichikpi hinapas, nacionkunapi kamachikuqkunaqa runakunapim munaychakunku, hinaspam atiyniyuq kayninkuman hina kamachikunku.

²⁶Qamkuna ukupim ichaqa mana chaynachu kanqa, aswanraqmi qamkunamanta pipas kamachikuyta munaqqa wakinta servinan,

²⁷qamkunamanta pipas puntapi kayta munaspaqa esclavoykichikmi kanan.

²⁸Chaynam runapa Churinpas, manam servichikunanpaqchu hamurqa, aswanqa servispan runakunapa rantinpi vidanta qonanpaqmi, nispan.

²⁹Jericó llaqtamanta lloqsiptinkum achkallaña runakuna Jesusta qatirqaku.

³⁰Hinaptinmi ñanpa patanpi tiyaq iskay ñawsakuna, Jesuspa pasasqanta uyariruspanku qayaykachakurqaku: ¡Davidpa Churin Señorlláy, llakipayariykullawayku! nispanku.

³¹Runakunañataqmi upallanankupaq chay ñawsakunata qaqcharqaku. Paykunañataqmi aswanraq qayaykachakurqaku: ¡Davidpa Churin Señorlláy, llakipayariykullawayku! nispanku.

³²Jesusñataqmi sayaykuspan chay iskay ñawsakunata qayaspan tapurqa: ¿Imatataq qamkunapaq ruwanayta munankichik? nispa.

³³Chaymi paykuna nirqaku: Señorlláy, ñawillaykuyá qawarikuchun, nispanku.

³⁴Jesusñataqmi paykunata llakipayarispan ñawinkuta llapchaykurqa, hinaptinmi chaypunilla qawarikuruspanku Jesuswan pasakurqaku.