Read Biblia Revisión Chuya Qellqa 1992 – Chuya Qellqa 1992 Mateo 27 Bible Online

Mateo 27 - Biblia Revisión Chuya Qellqa 1992 – Chuya Qellqa 1992 bible

Mateo 27

¹Achikyaramuptinmi sacerdotekunapa kamachiqninkunawan ancianokuna tanteanakurqaku Jesusta wañuchinankupaq.

²Chaymi chaqnasqata pusaspanku gobernador Pilatoman entregaykurqaku.

³Traicionaq Judasñataqmi, Jesusta wañunanpaq sentenciasqankuta yacharuspan llumpayta ñakakurqa, hinaspanmi chay kimsa chunka qollqeta sacerdotekunapa kamachiqninkunamanwan judiokunapa kamachiqninkunaman kutiykachispan

⁴kaynata nirqa: Huchallikurunim, mana huchayuq runatam wañuchinaykichikpaq qamkunaman entregaykuykichik, nispan. Chaymi paykunañataq nirqaku: ¿Imataq qokuwanku ñoqaykutaqa? ¡Chayqa qampiñam! nispanku.

⁵Chaymi Judasñataq qollqeta templopi chamqarurqa, hinaspanmi chaymanta pasaspan warkukaramurqa.

⁶Sacerdotekunapa kamachiqninkunañataqmi qollqeta hoqarispanku nirqaku: Kay qollqetaqa manam ofrendakunamanqa hukllawachwanchu, kayqa yawarpa chaninmi, nispanku.

⁷Hinaspam tanteanakuruspanku chay qollqewan manka ruwaqpa allpan nispa sutichasqanku chakrata rantirurqaku, huklaw llaqtayuqkunata chaypi pampanankupaq.

⁸Chayraykum chay allpaqa kunankamapas “yawar chaqchuna chakra” nispa sutichasqa.

⁹Chaynapim cumplikurqa profeta Jeremiaspa kayna nisqan: “Israel runakunapa precio churasqanman hinam kimsa chunka qollqeta hapiykuspanku

¹⁰manka ruwaqpa allpanta rantirurqaku, chaynataqa ruwarqaku Señorpa kamachiwasqanman hinam”, nispa.

¹¹Jesustam gobernador Pilatopa qayllanman pusarurqaku, hinaptinmi tapurqa: ¿Qamchu kachkanki judiokunapa Reynin? nispa. Chaymi Jesusñataq nirqa: Qanmi nirunki, nispa.

¹²Sacerdotekunapa kamachiqninkunawan ancianokuna acusaptinkuñataqmi Jesusqa mana imatapas nirqachu.

¹³Chaymi Pilato nirqa: ¿Manachu uyarinki contraykipi tukuy ima nisqankuta? nispa.

¹⁴Jesusmi ichaqa mana imatapas rimarirqachu, chaymi gobernador Pilato hukmanyarurqa.

¹⁵Sapa Pascua fiestapim costumbrenman hina gobernadorqa llapa runakunapa akllasqan presota kachariq.

¹⁶Chay tiempopim huk ancha reqsisqa runa carcelpi kachkarqa, paypa sutinmi karqa [11]Jesús Barrabás.

¹⁷Llapa runa huñunasqa kachkaptinmi Pilato tapurqa: ¿Mayqantataq kacharinayta munankichik? ¿Jesús Barrabastachu icha Cristowan sutichasqa Jesustachu? nispa.

¹⁸Payqa yacharqam Jesustaqa envidiakuspanku entregaykusqankuta.

¹⁹Tribunalpi Pilato tiyachkaptinmi warmin kaynata willachimurqa: Ama imanaychu chay allin ruwaq runataqa. Payraykum chisi tuta manchapallataña mosqokuruni, nispa.

²⁰Sacerdotekunapa kamachiqninkunawan ancianokunam llapa runakunata umacharqaku kaynata mañakunankupaq, Barrabasta kacharispa Jesustañataq wañuchinanpaq.

²¹Gobernador Pilatom yapatawan tapurqa: ¿Mayqannintataq kacharinayta munankichik? nispa. Chaymi paykunañataq nirqaku: Barrabasta, nispanku.

²²Pilatoñataqmi tapurqa: Hinaptinqa ¿imatataq ruwasaq Cristowan sutichasqa Jesustaqa? nispa. Chaymi llapallanku nirqaku: ¡Chakatasqa kachun! nispanku.

²³Hinaptinmi Pilato nirqa: ¿Ima mana allintañataq payqa ruwarurqa? nispa. Chaymi paykunañataq aswanraq qaparirqaku: ¡Chakatasqa kachun! nispanku.

²⁴Hatun chaqwata qawaykuspanmi Pilato mana ima ruwaytapas atirqachu. Chaymi yakuta aparachimuspan runakuna qawachkaptin makinta mayllakururqa, hinaspam nirqa: Kay runapa wañusqanmantaqa manam huchayuqchu kasaq, qamkunam huchayuqqa kankichik, nispa.

²⁵Hinaptinmi llapallan runakuna nirqaku: ¡Paypa wañusqanmantaqa ñoqaykum mirayniykupiwan huchayuq kasaqku! nispanku.

²⁶Hinaptinmi Barrabasta Pilato kachaykurqa, Jesustañataqmi azoteruspan chakatanankupaq entregaykurqa.

²⁷Chaymi gobernadorpa soldadonkuna Jesusta palacioman aparuspanku llapa tropata paypa muyuriqninpi huñururqaku.

²⁸Chaypim pachanta llatanaruspanku puka capawan hinarachirqaku.

²⁹Umanmanpas kichkamanta simpasqa coronata churaykuspankum alleq makinmanñataq kaspita hapichirqaku, hinaspam ñawpaqninpi qonqorakuspanku kaynata burlakurqaku: ¡Kawsachun judiokunapa reynin! nispanku.

³⁰Toqaspankum chay kaspiwanñataq umanpi waqtarqaku.

³¹Burlakuyta tukuruspankuñataqmi chay puka capata hurqoruspanku kikinpa pachanwan churarachirqaku, hinaspam chakatanankupaq aparqaku.

³²Chaymanta lloqsispankum Cirene llaqtayuq Simonwan tuparurqaku, paytam hapiruspanku Jesuspa cruzninta hombrochirqaku.

³³Golgotaman chayaruspankum (Gólgota ninanqa “calavera” ninanmi),

³⁴Jesusman vinota qatqe qorapa yakunwan chapuykuspanku tomachirqaku. Jesusmi ichaqa malliykuspan mana tomayta munarqachu.

³⁵Chakataruspankuñataqmi Jesuspa pachankunata rakinakunankupaq sortearqaku,

³⁶hinaspam tiyaykuspanku Jesusta cuidarqaku.

³⁷Imamantam wañuchisqankuta huk letrerota qellqaruspankum cruzpa puntanpi kaynata churarurqaku: “KAYQA JUDIOKUNAPA REYNIN JESUSMI”, niqta.

³⁸Jesustawan kuskatam iskay suwakunata chakatarurqaku, huknintam alleq lawninpi, huknintañataqmi ichoq lawninpi.

³⁹Chaynin pasaqkunañataqmi umankutapas aywisparaq kamirqaku:

⁴⁰Qamqa nirqanki: “Templota tuñirachispaymi kimsa punchawllapi hatarirachisaq” nispam, chaynaqa Diospa Churin kaspaykiqa kikillayki librakuspayá cruzmanta uraykamuy, nispanku.

⁴¹Chaynallataqmi sacerdotekunapa kamachiqninkunapas, Diospa leynin yachachiqkunapas chaynataq judiokuna kamachiqkunapas Jesusta burlakurqaku kaynata:

⁴²Wakinkunatam librarqa kikinmi ichaqa mana librakuyta atinchu. Israelpa Reynin kaspaqa cruzmanta uraykamuchun, chayta qawaspa paypi iñinanchikpaq.

⁴³Payqa Diospim hapipakurqa, cheqapta kuyaspaqa Diosyá kunan librachun, “Diospa Churinmi kani” nirqataq, nispanku.

⁴⁴Jesuswan kuska chakatasqa suwakunapas kamirqakum.

⁴⁵Chawpi punchawmanta kimsa hora tardeykuykamam kay pacha tutayarurqa.

⁴⁶Yaqa kimsa hora tardeykuytam Jesús qaparirqa: ¡Elí, Elí! ¿Lama Sabactani? nispa. Kayqa: “Diosnilláy, Diosnilláy ¿imanasqataq saqerullawanki?” ninanmi.

⁴⁷Chaypi wakin kaqkunañataqmi uyariruspanku nirqaku: Kay runaqa profeta Eliastam qayakuchkan, nispanku.

⁴⁸Paykunamantam hukninku kallpaspan esponjata vinagreman challpuykuspan soqosman wataykuspa Jesusman soqochirqa.

⁴⁹Wakinñataqmi nirqaku: Suyayraq, yaqachus librananpaq Elías hamurunqa, nispanku.

⁵⁰Jesusmi huktawan qaparispan espiritunta entregaykurqa.

⁵¹Chay ratollapim templopi santuariota rakinaq velo hanaymanta urayman llikikuruspan iskayman rakikururqa. Allpapas katkatataptinmi qaqakunapas raqrarurqa.

⁵²Sepulturakunapas kicharikuptinmi allin ruwaq runakuna wañusqankumanta kawsarimurqaku.

⁵³Paykunam Jesuspa kawsarimusqanpa qepanta sepulturankumanta lloqsimurqaku, hinaspam chuya Jerusalén llaqtaman yaykurqaku, chaytaqa achkaq runakunam rikurqaku.

⁵⁴Jesusta cuidaq capitanwan soldadokunañataqmi terremototawan tukuy imakunam pasakusqanta qawaykuspanku, llumpayta mancharikuspanku nirqaku: ¡Cheqaptapunipas payqa Diospa Churinmi kasqa! nispanku.

⁵⁵Chaypim achka warmikuna kachkarqaku karullamanta qawaspanku. Paykunam Jesusta yanapastin Galilea lawmanta qatimurqaku.

⁵⁶Paykunawantaqmi kachkarqaku Magdala llaqtayuq Mariawan Jacobopa hinaspa Joseypa maman Mariapas, chaynallataq Zebedeopa warminpas.

⁵⁷Tutaykaramuptinmi Arimatea llaqtayuq José chayaramurqa, payqa apu runa hinaspa Jesuspa discipulonmi karqa.

⁵⁸Paymi Pilatopaman rispan Jesuspa cuerponta mañarqa. Hinaptinmi Pilato kamachirqa Jesuspa cuerponta qonankupaq.

⁵⁹Chaymi Joseyqa Jesuspa cuerponta musoq sabanaswan wankuykuspan

⁶⁰qaqapi kikinpaq uchkuchisqan musoq sepulturapi churaykurqa, chaymantam punkunta hatun rumiwan tapaykuspan ripukurqa.

⁶¹Chaypitaqmi kachkarqaku Magdala llaqtayuq Mariawan huknin Mariapas, sepulturapa chimpanpi tiyaspanku.

⁶²Paqarinnintintam, otaq samana punchawpim, sacerdotekunapa kamachiqninkunawan llapa fariseokuna Pilatoman rispanku

⁶³nirqaku: Señor gobernador, yuyachkanikum, chay llulla runam kawsachkaspanraq nirqa: “Wañuspayqa kimsa punchawmantam kawsariramusaq”, nispan.

⁶⁴Chaynaqa, kamachiyá kimsa punchawkama sepultura seguranankupaq, yanqañataq discipulonkuna cuerponta tuta suwaruspanku runakunaman ninmanku: “Wañusqanmantam kawsarirun” nispanku, hinaptinmi chay nisqankuqa ñawpaq llullakusqanmantapas aswan mana allinraq karunman, nispanku.

⁶⁵Chaymi pilatoñataq nirqa: Chayqaya soldadokunaqa. Rispaykichikyá yachasqaykichikman hina seguramuychik, nispa.

⁶⁶Chaymi pasaspanku sepulturata allinta seguramurqaku punkupa tapaqnin rumita sellaykuspanku, hinaspam cuidananpaq soldadokunata chaypi saqeykurqaku.