Read Biblia Revisión Chuya Qellqa 1992 – Chuya Qellqa 1992 Mateo 3 Bible Online

Mateo 3 - Biblia Revisión Chuya Qellqa 1992 – Chuya Qellqa 1992 bible

Mateo 3

¹Chay punchawkunapim Bautizaq Juanqa, Judea law purunkunapi kaynata willakurqa:

² Huchaykichikmanta wanakuychik, Diospa munaychakuyninmi hichparamunña, nispan.

³Juanmantam profeta Isaías kaynata nirqa: “Huk runam purunpi kaynata qaparichkan: Señorpa ñanninta allichaychik, purinan ñanta kichaychik”, nispa.

⁴Juanpa pachanqa karqa camellopa pelonmantam, weqaw watanpas qaramantam karqa, mikunanñataqmi karqa aqaruway urukunawan purun abejapa miskin.

⁵Payta uyarinankupaqmi Jerusalenmanta, Judeamanta hinaspa Jordán mayupa muyuriqninkunamanta llapa runakuna riqku.

⁶Chaymi huchankuta reqsikuspa willakuptinku, Juanñataq Jordán mayupi bautizaq.

⁷Llapa fariseokunawan saduceokunapas bautizachikuq hamuptinkum Juanñataq nirqa: ¡Maqta urupa mirayninkuna! ¿Pitaq willarusunkichik hamuq ñakariymanta ayqeruyta?

⁸Huchaykichikmanta wanakusqaykichikta kawsaynikichikpi qawachikuychik.

⁹Amayá niychikchu: “Ñoqaykuqa Abrahampa mirayninmi kaniku”, nispaykichikqa; Diosqa kay rumikunamantapas Abrahampa mirayninkunataqa hatarirachinmanmi.

¹⁰Hachaqa ñam sachakunapa sapinman churasqaña kachkan. Mana allin ruruq sachakunaqa kuchusqa kaspam ninaman wischusqa kanqa.

¹¹Ñoqaqa huchaykichikmanta wanakuptikichikmi yakuwan bautizaykichik, qepay hamuqmi ichaqa Chuya Espirituwan chaynataq ninawan bautizasunkichik, payqa ñoqamantapas aswan atiyniyuqmi, ñoqaqa manam usutallantapas apaq hinachu kani.

¹²Payqa makinpim hurkitanta apamuchkan, chaywanmi trigota pajanmanta rakinanqa; trigotam taqeman apaykunqa, pajatañataqmi mana amachay atina ninapi kañanqa.

¹³Jesusmi Galilea lawmanta Juanpa kasqan Jordán mayuman hamurqa, chaynapi Juanwan bautizachikunanpaq.

¹⁴Juanñataqmi mana munaspan nirqa: ¿Ñoqata bautizawanayki kachkaptinchu qamraq bautizanaypaq hamuwanki? nispan.

¹⁵Jesusñataqmi nirqa: Kunanqa chaynatam ruwanayki, chaynapim Diospa nisqanta cumplisunchik, nispan. Chayñam Juan bautizarqa.

¹⁶Jesusmi bautizarachikuspan yakumanta lloqsimurqa, chayllamanmi hanaq pacha kicharikuykuptin Diospa Espiritunta rikururqa paloma hina payman uraykamuchkaqta.

¹⁷Hinaptinmi hanaq pachamanta huk rimariy uyarikurqa: “Paymi kuyasqay Churiy, payraykum kusisqa kachkani”, nispa.