Read Biblia Revisión Chuya Qellqa 1992 – Chuya Qellqa 1992 Mateo 6 Bible Online

Mateo 6 - Biblia Revisión Chuya Qellqa 1992 – Chuya Qellqa 1992 bible

Mateo 6

¹Amayá runa qawanallanpaqchu allin kaqkunataqa ruwaychik, chaynata ruwaptikichikqa hanaq pachapi Taytaykichikpas manam ima premiotapas qosunkichikchu.

²Wakchakunata yanapaspaykiqa amayá pimanpas willakachakuychu, iskay uyakunallam sinagogakunapi hinaspa callekunapi chaynataqa ruwanku runakunapa alabasqan kanankupaq. Cheqaptapunim nikichik: Paykunapaqqa ñam premionku kachkanña.

³Wakchakuna yanapasqaykitaqa amayá pipas yachachunchu.

⁴Aswanqa mana pipapas yachasqallantayá ruway, chaynapim pakasqallapi kaqkuna rikuq Dios Taytayki premioykita lliwpa qayllanpi qosunki.

⁵Mañakuspaykichikqa amayá iskay uyakuna hinachu kaychik, paykunaqa sinagogakunapi hinaspa callepa esquinankunapi sayaykuspa mañakuytam kuyanku, chaynataqa ruwanku runakuna qawananpaqmi. Cheqaptapunim nikichik: Paykunapaqqa ñam premionku kachkanña.

⁶Qamyá ichaqa, mañakunaykipaqqa cuartoykiman yaykuy hinaspa punkuta wichqaykuspa mana pipapas rikusqallanta Dios Taytaykita mañakunki, chaynapim pakasqallapi ruwasqaykita rikuq Taytayki premioykita qosunki.

⁷Mañakuspaykichikqa amayá Diosta mana reqsiqkuna hinaqa kuti-kutirispaqa rimaychikchu, paykunaqa chayna achkallataña rimasqankuraykum Diospa uyarisqanpaq piensanku.

⁸Amayá paykuna hinaqa kaychikchu, Taytaykichikqa manaraqpas mañakuchkaptikichikmi ima munasqaykichiktapas yachanña.

⁹Qamkunaqa kaynatayá mañakuychik: Hanaq pachapi kaq Taytayku, sutiki hatunchasqa kachun,

¹⁰munaychakuyniki hamuchun, munasqayki ruwasqa kachun kay pachapi, imaynam hanaq pachapi hina.

¹¹Sapa punchawyá tantaykuta qowayku.

¹²Huchaykutayá pampachawayku, imaynam ñoqaykupas mana allin ruwawaqniykuta pampachasqaykuta hina.

¹³Amayá tentacionmanqa kachaykuwaykuchu, aswanqa mana allinmanta libraykuwayku. [3][Qampam munaychakuypas, atiypas, hatun kaypas wiña-wiñaypaq. Amén].

¹⁴Runamasikichikpa pantasusqaykichikta pampachaptikichikqa hanaq pachapi Taytaykichikpas pampachasunkichikmi.

¹⁵Runamasikichikta mana pampachaptikichikqa Taytaykichikpas manam huchaykichiktaqa pampachasunkichikchu.

¹⁶Ayunaspaykichikqa amayá iskay uyakuna hina llaki uyantinqa kaychikchu, paykunaqa chaynata ruwanku ayunasqankuta runakunawan qawachikunanpaqmi. Cheqaptapunim nikichik, paykunapaqa ñam pagonku kachkanña.

¹⁷Ayunaspaykiqa uyaykita upakuspayá sumaqta allichakuy,

¹⁸chaynapi ayunasqaykita runakuna mana musyananpaq, chaynata ruwaptikiqa imam ruwasqaykita yachaq Taytaykim lliwpa yachasqanta pagoykita qosunki.

¹⁹Kay pachapiqa amayá qori-qollqellataqa huñukuychikchu, chaykunaqa puyurachikuq, ismuruq hinaspa suwapa aparunallanmi.

²⁰Hanaq pachapiyá qori-qollqetaqa huñukuychik. Chaypiqa manam puyupas tukunqachu nitaqmi ismunqachu, suwapas manam apanqachu.

²¹Maypim qori-qollqekichik kachkan, chaypitaqmi sonqoykichikpas kachkan.

²²Ñawiqa cuerpopa achkiyninmi. Sichum ñawiki allin kaptinqa kawsakuynikipas achkiwan huntasqam kanqa.

²³Ñawiki mana allin kaptinqa kawsakuynikipas tutayayllapim kanqa. Sichum qampi kaq achki tutayay kaptinqa ¿mayna tutayayraq kawsakuynikipas kanqa?

²⁴Manam pipas iskay patrontaqa servinmanchu, hukninta cheqnispanchá huknintañataq kuyanman, otaqmi hukninman hapipakuruspanchá huknintañataq wischupakunman. Manam Diostawan qori-qollqetaqa serviwaqchikchu.

²⁵Chaynaqa, nikichikmi: Amayá mikunaykichikmanta, tomanaykichikmanta hinaspa pachakunaykichikmantaqa llakikuychikchu. Mikuymantapas aswanqa vidaykichikmi valen, pachamantapas aswanqa cuerpoykichikmi valen.

²⁶Alton pawaq urpikunata qawaychik, paykunaqa manam tarpunkuchu nitaq cosechankuchu, manataqmi taqemanpas huñunkuchu. Ichaqa hanaq pachapi Taytanchikmi mikuchin. ¡Qamkunaqa urpikunamantapas aswantam valenkichik!

²⁷¿Mayqannikichiktaq maynataña munaspapas kawsaynikichikman huk horallatapas yapayta atiruwaqchik?

²⁸¿Imanasqataq imawan pachakunaykichikmantapas llakikunkichik? Purun waytakunapa wiñasqanta qawariychik, paykunaqa manam llamkankuchu nitaqmi puchkankuchu.

²⁹Ichaqa nikichikmi, rey Salomonpas manam tukuy imayuq kachkaspapas huknin wayta hinallapas pachakurqachu.

³⁰Chaynaqa, pisi iñiyniyuq runakuna, sichum suma-sumaq kachkaspa paqarinñataq hornopi ruparuq purun waytakunata Diospuni kuyayllapaqta pachachichkaspaqa ¿manachum qamkunatapas pachachisunkichikman?

³¹Hinaptinqa amayá “imataraq mikusun, imataraq tomasun, imawanraq pachakusun” nispaykichikqa llakikuychikchu.

³²Diosta mana reqsiq runakunallam chaykunamantaqa llakikun, hanaq pachapi Taytaykichikmi yachan qamkunapa mana chaykuna kapususqaykichiktaqa.

³³Imamantapas llalliriqtaqa Diospa munaychakuynintawan paypa munasqanman hina ruwaytayá maskaychik, hinaspaqa ima munasqaykichiktapas chaskinkichikmi.

³⁴Amayá hamuq punchawmantaqa llakikuychikchu, hamuq punchawkunapas sasachakuytaqa apamunqapunim. Punchawkunaqa sapakamam sasachakuyniyuq.