Read Biblia Revisión Chuya Qellqa 1992 – Chuya Qellqa 1992 Mateo 8 Bible Online

Mateo 8 - Biblia Revisión Chuya Qellqa 1992 – Chuya Qellqa 1992 bible

Mateo 8

¹Orqomanta Jesús uraykamuptinmi achka runakuna qatirqaku.

²Hinaptinmi leprawan onqoq runa Jesusman asuykurqa, hinaspam qonqorakuykuspan nirqa: Señorlláy, munaspaykiqa sanoyaykachillaway, nispa.

³Hinaptinmi llapchaykuspan Jesús nirqa: Arí, sanoyanaykitam munani, nispa. Hinaptinmi chay lepra onqoynin chaylla chinkarurqa.

⁴Chaymi Jesús nirqa: Amam pimanpas willakunkichu, aswanqa sacerdoteman rispaykim paykunawan qawachikamunki, hinaspam sanoña kasqaykimanta yachanankupaq Moisespa kamachisqanman hina ofrendata qomunki, nispa.

⁵Capernaúm llaqtaman Jesús chayaruptinmi soldadokunapa capitannin asuykuspan kaynata ruegakurqa:

⁶Señorlláy, criadoymi suchuyaruspan wasiypi llumpayta ñakarichkan, nispan.

⁷Chaymi Jesús nirqa: Rirusaqyá sanoyarachimunaypaq, nispan.

⁸Hinaptinmi capitanñataq nirqa: Señorlláy, ñoqaqa manam wasiyman yaykunaykipaq hinachu kallani, kaymanta kamaykachiptillaykim criadoyqa sanoyarunqa.

⁹Ñoqapas kamachiqniyuqmi kani, soldadoykunapas kamachiptiyqa kasuwankum. Sichum hukninta “riy” niptiyqa rinmi, hukninta “hamuy” niptiyqa hamunmi, criadoyta imapas ruwananpaq kamachiptiyqa ruwanmi, nispan.

¹⁰Chayna nisqanwanmi Jesús admirakurqa, hinaspam qatiqninkunata nirqa: Cheqaptapunim nikichik, Israelpipunipas manam kayna iñiyniyuqtaqa tarirqanichu.

¹¹Nikichiktaqmi, achkaqmi tukuy hinastinmanta hamunqaku, hinaspam Diospa munaychakuyninpi Abrahamwan, Isaacwan hinaspa Jacobwan mikunankupaq tiyaykunqaku.

¹²Ichaqa Diospa munaychakuyninman punta qayasqa kaqkunam tutayayman wischusqa kanqaku, chaypim waqaspanku kirunkutapas kirichichinqaku, nispan.

¹³Capitantañataqmi Jesús nirqa: Chaynaqa, kutikuyña, iñiynikiman hinayá ruwasqa kachun, nispan. Hinaptinmi criadonqa chay horalla sanoyarurqa.

¹⁴Pedropa wasinman Jesús chayaruspanmi, Pedropa suegranta camapi calenturawan kachkaqta tariykurqa.

¹⁵Chaymi makinta llapchaykuptillan calenturan chinkarurqa, hinaptinmi chaylla hatarispan Jesusta servirqa.

¹⁶Tutayaruptinmi demoniokunapa ñakarichisqan achka runakunata Jesusman pusamurqaku, hinaptinmi rimariyllanwan chay demoniokunata qarqospan onqoqkunata sanoyachirqa.

¹⁷Chaykunam pasakurqa profeta Isaiaspa kayna nisqan cumplikunanpaq. Kaynatam nirqa: “Paymi onqoyninchikkunata qepikuykurqa hinaspam nanayninchikkunata aparqa”, nispan.

¹⁸Jesusmi achkallaña runakuna muyuriqninpi kasqanta qawaykuspan, lamar qochapa waklawninman chimpanankupaq discipulonkunata kamachirqa.

¹⁹Diospa leynin yachachiqñataqmi Jesusman asuykuspan nirqa: Yachachikuq, maymanña riptikipas qatisqaykipunim, nispan.

²⁰Jesusñataqmi nirqa: Atoqkunapapas kanmi machaynin, alton pawaq urpikunapapas kanmi qesan, runapa Churinpam ichaqa maypim umanta samaykachinallanpaqpas mana kanchu, nispa.

²¹Huknin discipulonpas nirqataqmi: Señorlláy, Taytay pamparamunaypaqyá saqeykuway, nispan.

²²Jesusñataqmi nirqa: Wañusqakunaqa wañusqapura pampanakuchun, qamqa qatiway, nispan.

²³Barcaman Jesús qespiykuptinmi discipulonkunapas qatirqaku.

²⁴Richkaptinkum qonqayta lamar qochapi nisyu wayra pukumuptin olakuna orqonchakuspan barcatapas yaqaña pampachkarqa, Jesusñataqmi puñuchkarqa.

²⁵Hinaptinmi discipulonkuna asuykuspa rikchachirqaku: ¡Señorlláy, chinkaykuchkanchikñam, salvawayku! nispanku.

²⁶Jesusñataqmi nirqa: Pisi iñiyniyuq runakuna ¿imanasqataq mancharisqallaña kachkankichik? nispan. Chaymi hatarispan wayratawan lamar qochata qaqcharqa, hinaptinmi hawkayarurqa.

²⁷Discipulonkunañataqmi admirakuspanku kaynata tapukurqaku: ¿Ima runataq kayqa wayrapas, lamar qochapas kasunanpaqqa? nispanku.

²⁸Lamar qochapa waklawninpi Gadara llaqtaman Jesús chayaruptinmi, panteonmanta lloqsimuq iskay runakuna payman taripaykamurqaku, iskayninkum demoniokunapa huntasqan runakuna karqaku, manchakuypaq kasqankuraykum chaynintaqa mana pipas puriqkuchu.

²⁹Paykunam kaynata qaparirqaku: Diospa Churin Jesús ¿Imatataq ñoqaykuwan munanki? ¿Manaraq tiemponpichu ñakarichiqniyku hamurunki? nispanku.

³⁰Paykunapa kasqanmanta waklawniqpim achkallaña kuchikuna mikuchkarqaku.

³¹Chay demoniokunam Jesusta kaynata ruegakurqaku: Qarqowaspaykikuqa wak kuchikunaman yaykunaykupaq kamachiwayku, nispanku.

³²Hinaptinmi Jesús nirqa: Riychikyá, nispan. Chaymi llapa demoniokunaqa runakunamanta lloqsiruspa kuchikunaman yaykururqaku. Chay kuchikunañataqmi tukuy waqtanta kallpaspanku qochaman pawaykuspa wañururqaku.

³³Kuchi michiqkunañataqmi ayqeruspanku llaqtaman chayarurqaku, hinaspam demoniopa huntasqan runakunawan imam pasakusqanta willakurqaku.

³⁴Chaymi llaqtapi runakunañataq llapallanku Jesuspa kasqanman kallpamurqaku, hinaspam llaqtankumanta huklawman pasakunanpaq ruegarqaku.