Read Biblia Revisión Chuya Qellqa 1992 – Chuya Qellqa 1992 Marcos 10 Bible Online

Marcos 10 - Biblia Revisión Chuya Qellqa 1992 – Chuya Qellqa 1992 bible

Marcos 10

¹Jesusmi Capernaúm llaqtamanta lloqsispan Judea lawman hinaspa Jordán mayupa waklawninman rirqa. Chaymi llapa runakuna huktawan huñunakaramuptin imaynam puntakunata hina yachachirqa.

²Fariseokunañataqmi Jesusman asuykuspanku imawanpas wichichiyta munaspanku tapurqaku: ¿Allinchu pipas casado kachkaspa warminmanta rakikuruynin kanman? nispanku.

³Jesusñataqmi tapurqa: ¿Imatataq Moisés kamachisurqankichik? nispa.

⁴Hinaptinmi paykunañataq nirqaku: Moisesqa permitirqam papelta ruwaykuspa warminmanta rakikunanta, nispanku.

⁵Chaymi Jesús nirqa: Moisesqa chaynata kamachikurqa rumi sonqo kasqaykichikraykum.

⁶Qallariyninpi tukuy imata unanchaspaqa, qaritawan warmitam Diosqa ruwarqa.

⁷Chayraykum qariqa taytanmanta mamanmanta rakikuspan warminmanña hukllawakunqa,

⁸chaynapim iskayninku huk aychallaña kanqaku. Chaynaqa, manam iskayñachu kanqaku aswanqa hukllañam.

⁹Chaynaqa, Diospa kuskanchasqantaqa amayá runaqa rakichunchu, nispa.

¹⁰Wasipiña kachkaptinkum Jesuspa discipulonkuna chay rimasqankunamanta huktawan tapurqaku.

¹¹Hinaptinmi paykunata nirqa: Warminmanta rakikuruspan huk warmiwan casarakuruq runaqa, chay warmiwanmi waqllikurun.

¹²Sichum warmipas qosanmanta rakikuruspan huk qariwan casarakuruspanqa waqllikuruntaqmi, nispa.

¹³Jesús llapchaykarinanpaqmi wawakunata pusamurqaku, chaymi discipulonkunañataq llapa wawakuna pusamuqkunata qaqcharqaku.

¹⁴Jesusñataqmi harkakusqankuta rikuruspan piñakuspan nirqa: Wawakuna ñoqaman hamunanta ama harkakuychikchu, kay wawakuna hina kaqkunapaqmi Diospa munaychakuyninqa.

¹⁵Cheqaptam nikichik, pipas wawakuna hina Diospa munaychakuyninta mana chaskispanqa, chay munaychakuymanqa manam yaykunqachu, nispa.

¹⁶Chaymantam wawakunata marqakuykuspan makinta paykunapa hawanman churaykuspan bendeciykarirqa.

¹⁷Pasakunanpaqña Jesús kachkaptinmi, huk runa kallpaylla hamururqa, hinaspam ñawpaqninpi qonqorakuykuspan nirqa: Allin yachachikuq ¿imatataq ruwasaq wiñay kawsayta haypanaypaq? nispa.

¹⁸Jesusñataqmi nirqa: ¿Imanasqataq “allin yachachikuq” niwanki? Manam pipas allinqa kanchu, aswanqa chullallam, payqa Diosmi.

¹⁹Qamqa yachankim kay kamachikuykunataqa: “Amam waqllikunkichu, amam pitapas wañuchinkichu, amam suwakunkichu, amam pimantapas llullataqa rimankichu, amam engañankichu, taytaykitawan mamaykitam respetanki”, nispa.

²⁰Hinaptinmi chay runa nirqa: Yachachikuq, warma kasqaymantaraqmi chaykunataqa ruwayman churarqani, nispa.

²¹Jesusñataqmi kuyakuywan qawarispan nirqa: Chaywanpas kayraqmi faltasunki: Kutispaykiyá tukuy kapuqnikita rantikaramuy hinaspa wakchakunaman qoykamuy, chaynapim hanaq pachapi kapuqniyuq kanki; hinaspayki cruznikita qepikuykuspa qatiway, nispa.

²²Chayta uyariruspanmi chay runaqa, achka kapuqniyuq kasqanrayku ancha llakisqallaña pasakurqa.

²³Jesusñataqmi muyuriqninpi runakunata qawarispan discipulonkunata nirqa: Mayna sasatam apu runakunaqa Diospa munaychakuyninmanqa yaykunqaku, nispa.

²⁴Chaymi discipulonkuna kayta uyariruspanku admirakurqaku. Jesusmi ichaqa paykunata nirqa: Churillaykuna ¡mayna sasam Diospa munaychakuyninman yaykuyqa!

²⁵Apu runa Diospa munaychakuyninman yaykunanmantaqa huk camelloraqcha yaqapas agujapa rinrinta usturunman, nispa.

²⁶Chayta uyariruspankum discipulokuna aswanraq hukmanyarurqaku hinaspam tapunakurqaku: Hinaptinqa ¿pitaq salvakuytaqa atinman? nispanku.

²⁷Jesusñataqmi paykunata qawarispan nirqa: Runakunapaqqa kayqa sasallañam, Diospaqmi ichaqa tukuy imapas atinallan, nispa.

²⁸Hinaptinmi Pedroñataq nirqa: Ñoqaykuqa tukuy imaykutapas saqespam qatichkaykiku, nispa.

²⁹Chaymi Jesusñataq nirqa: Cheqaptapunim nikichik, pipas ñoqarayku hinaspa allin noticiarayku wasinta, wawqe-paninkunata, turi-ñañankunata, taytanta, mamanta, warminta, churinkunata, chakrankunata saqeqqa,

³⁰qatikachasqa kaspapas, kay tiempollapiraqmi pachak kuti masta chaskinqa chaynataqmi wasikunata, wawqenta, paninta, turi-ñañanta, taytanta, mamanta, churinkunata hinaspa chakrankunatapas; hamuq tiempopiñataqmi wiñay kawsayta chaskinqa.

³¹Ichaqa puntapi kaqkunam qepapi kanqaku, qepapi kaqkunañataqmi puntapi kanqaku, nispa.

³²Jerusalenman qespiptinkum Jesusñataq discipulonkunapa ñawpaqninta rirqa. Chaymi discipulonkuna admirakurqaku, hinaspam mancharisqallaña qatirqaku. Chayraykum Jesusqa chunka iskayniyuq discipulonkunata huklawman qayaykuspan imam pasananmanta willayta qallaykurqa:

³³Jerusalén llaqtamanmi qespichkanchik, chaypim runapa Churinta sacerdotekunapa kamachiqninkunaman hinaspa Diospa leynin yachachiqkunaman entreganqaku, paykunam wañunanpaq sentenciaspanku Diosta mana reqsiq runakunaman entreganqaku.

³⁴Hinaptinmi paymanta burlakuspanku, azotespanku, toqaspanku wañuchinqaku, ichaqa kimsa punchawmanmi kawsarimunqa, nispa.

³⁵Zebedeopa churinkunam Jacobowan Juan, Jesusman asuykuspanku nirqaku: Yachachikuq, huk mañakuyniykum kachkan, ama hina kaspa anri niykuwayku, nispanku.

³⁶Chaymi Jesús tapurqa: ¿Imatataq qamkunapaq ruwanayta munankichik? nispa.

³⁷Hinaptinmi paykunañataq nirqaku: Mañakuykikum munaychakuynikipi hukniykuta alleq lawnikipi, hukniykutañataq ichoq lawnikipi tiyaykachiwanaykikupaq, nispanku.

³⁸Jesusñataqmi nirqa: Manam yachankichikchu imam mañakusqaykichiktapas. ¿Yaqachu ñakarisqayta hina ñakariyta atiwaqchik? ¿Yaqachu ñoqapa wañusqayta hina wañuyta atiwaqchik? nispa.

³⁹Chaymi paykunañataq nirqaku: Arí, atisaqkum, nispanku. Jesusñataqmi nirqa: Arí, cheqaptapunim qamkunaqa ñoqa hina ñakarinkichik hinaspa wañunkichik.

⁴⁰Chaywanpas alleq lawniypi otaq ichoq lawniypi tiyaytaqa manam ñoqachu nisaq, chayqa haykam akllasqakunallapaqmi kachkan, nispa.

⁴¹Chayta uyariruspankum chunkantin discipulokunañataq Jacobopaqwan Juanpaq piñakururqaku.

⁴²Jesusmi ichaqa paykunata qayaykuspan nirqa: Yachasqaykichikpi hinapas kamachikuqkunaqa nacionkunapim munaychakunku, hinaspam atiyninkuman hina kamachikunku.

⁴³Qamkunapiqa manam chaynachu kanqa, aswanraqmi qamkunamanta pipas kamachikuyta munaspaqa qamkunapa serviqnikichik kanan.

⁴⁴Qamkunamanta pipas puntapi kayta munaspaqa llapaykichikpa servisuqnikichikyá kachun.

⁴⁵Chaynam runapa Churinpas, manam servichikunanpaqchu hamurqa, aswanqa servispa achka runakunapa rantinpi wañunanpaqmi, nispa.

⁴⁶Chaymantam Jericó llaqtaman chayarurqaku. Chay llaqtamanta discipulonkunawan chaynataq achka runakunawan Jesús lloqsichkaptinmi, Timeopa churin ñawsa Bartimeo ñanpa patanpi tiyachkasqa limosnata mañakuspan.

⁴⁷Paymi Nazaretmanta kaq Jesuspa hamusqanta uyariruspan kaynata qayaykachakurqa: ¡Davidpa churin Jesús, llakipayariykullaway! nispa.

⁴⁸Chaymi runakunañataq upallananpaq qaqcharqaku. Paymi ichaqa aswanraq qaparispan nirqa: ¡Davidpa churin, llakipayariykullaway! nispa.

⁴⁹Jesusñataqmi sayaykuspan nirqa: Qayamuychik, nispa. Chaymi ñawsata qayamuspanku nirqaku: Kallpanchakuy, hatarispa asuykuy qayasuchkankim, nispanku.

⁵⁰Chay ñawsañataqmi capanta wikutispan kallpaylla Jesusman asuykurqa.

⁵¹Asuykuruptinmi Jesusñataq tapurqa: ¿Imatataq qampaq ruwanayta munanki? nispa. Chaymi ñawsañataq nirqa: Yachachikuq, qawarikuytam munallani, nispa.

⁵²Jesusñataqmi nirqa: Pasakuyña, iñisqaykiraykum sanoyarunki, nispa. Hinaptinmi chaylla qawarikuruspan Jesusta qatikurqa.