Read Biblia Revisión Chuya Qellqa 1992 – Chuya Qellqa 1992 Marcos 12 Bible Online

Marcos 12 - Biblia Revisión Chuya Qellqa 1992 – Chuya Qellqa 1992 bible

Marcos 12

¹Rikchanachiykunawan yachachispanmi Jesús nirqa: Huk runam chakranpi uvasta plantaruspan muyuriqninta perqarachirqa, vino ruwananpaqpas huk pozotam ruwachirqa, hinaspam cuidanankupaq huk torretapas ruwachirqa. Chaymantam llamkaqkunaman chakranta arriendakuruspan karuta illarurqa.

²Cosecha tiempo chayaramuptinmi, arriendaqninkunamanta tupaqninta mañamunanpaq serviqninta kacharqa.

³Paykunañataqmi chay serviqninta hapiruspanku maqaparurqaku, hinaspam mana imayuqta kutirichirqaku.

⁴Chaymantam huknin serviqnintaña kacharqa, paytapas umanta pakiruspankum penqakuypaqta ruwarurqaku.

⁵Kaqllamantam huktaña kacharqa, hinaptinmi paytapas wañurachirqaku. Chaymantam achka serviqninkunataña kacharqa, hinaptinmi wakinta maqaparurqaku, wakintañataq wañurachirqaku.

⁶Chaynapim kuyasqan sapallan churillanña puchururqa, hinaptinmi paytaña kacharqa: “Churiytaqa respetanqakum” nispan.

⁷Ichaqa chay llamkaqkunam ninakurqaku: “Paymi herencia chaskiqqa, ñoqanchikña chakrawan qepakunanchikpaq wañurachisunchik”, nispanku.

⁸Chaymi hapiruspanku wañurachirqaku, hinaspam cuerpontapas chakramanta hawa lawman wischururqaku.

⁹Hinaptinqa ¿imatataq chay chakrayuqqa ruwanqa? Rispanmi chay llamkaqkunata wañurachinqa, hinaspam uvas chakrantapas hukkunamanña arriendakurunqa.

¹⁰¿Manachu Qellqapi leerqankichik: “Perqaqkunapa wischupakusqanku rumim cimientopa esquinan hapiq rumiña rikurirun.

¹¹Kaytaqa Diosmi ruwarun, chaywanmi llumpayta admirakunchik”, nispa, nisqanta?

¹²Hinaptinmi tapuqninkuna musyakururqaku Jesuspa rikchanachiy rimasqanqa paykunapa contranpi kasqanta, chaymi hapiruyta munarqaku; ichaqa llapa runakunata manchakuspankum mana ima ruwayta atispan pasakurqaku.

¹³Jesusmanmi kachamurqaku wakin fariseokunatawan Herodespa wakin qatiqninkunata, imapas rimasqanpi pantarachispanku chaywan acusanankupaq.

¹⁴Chaymi hamuruspanku Jesusta nirqaku: Yachachikuq, yachanikum qamqa cheqap rimaq kasqaykita, qamqa manam pimanpas sayapakunkichu, nitaqmi runatapas hawallantachu qawanki, aswanqa cheqap kaqwanmi Diospa ñanninmanta yachachinki. ¿Allinchu rey Cesarman impuesto pagay icha manachu? ¿Pagasaqkuchu icha manachu? nispanku.

¹⁵Jesusñataqmi paykunapa iskay uya kasqankuta yachaspan nirqa: ¿Imanasqataq pantachiwaypi rinkichik? Qollqeta apamuwaychik qawanaypaq, nispa.

¹⁶Aparamuptinkum paykunata Jesús tapurqa: ¿Pipa uyantaq hinaspa pipa sutintaq kay qollqepi kachkan? nispa. Chaymi paykunañataq nirqaku: Rey Cesarpam, nispanku.

¹⁷Hinaptinmi Jesusñataq nirqa: Cesarpa kaqtaqa Cesarmanyá qoychik, Diospa kaqtapas Diosmantaqyá qoychik, nispa. Chaynata niruptinmi llumpayta hukmanyarurqaku.

¹⁸Chaymantam wañuqkunapa kawsarimunanmanta mana creeq saduceokuna Jesusman hamururqaku, hinaspam kaynata tapurqaku:

¹⁹Yachachikuq, Moisespa qellqasqanpim nin: “Sichum casado runa manaraq churiyuq kachkaspa wañuruptinqa, wawqenmi viudanwan casarakunqa, chaynapi wañukuqpa miraynin kananpaq”, nispa.

²⁰Wawqentin qanchis qarikunam karqaku. Piwi kaqmi casarakururqa, ichaqa manaraq churiyuq kachkaspam wañukurqa.

²¹Chaymi viudanwan qatiqnin wawqenña casarakurqa, ichaqa paypas mana churiyuqmi wañukurqa. Chaynallam pasakurqa kimsa kaq wawqenkuwanpas.

²²Chaynallam qanchisnintinwan pasakurqa, ichaqa manam mayqanpapas churin karqachu. Chaymantam warmipas wañukurqa.

²³Chaynaqa, wañuqkuna kawsarimuptinqa ¿mayqanninpa warmintaq kanqa qanchisnintinwan casarakuchkaptinqa? nispanku.

²⁴Chaymi Jesusñataq nirqa: Qamkunaqa Qellqapa nisqantapas chaynataq Diospa atiynintapas mana reqsisqaykichikraykum pantaypi kachkankichik.

²⁵Wañuqkuna kawsarimuspankuqa manañam casarakunqakuchu nitaqmi casarachinakunqakuchu, paykunaqa hanaq pachapi angelkuna hinañam kanqaku.

²⁶Wañuqkuna kawsarimunanmantaqa ¿manachu Moisespa libronpi leerqankichik, rupachkaq tankar kichkamanta Dios rimapayamuspan: “Ñoqaqa kani Abrahampa, Isaacpa hinaspa Jacobpa Diosninmi” nispa, nisqanta?

²⁷Diosqa manam wañusqakunapa Diosninchu, aswanqa kawsaqkunapa Diosninmi. Qamkunaqa hatun pantaypim kachkankichik, nispa.

²⁸Tapuqninkunata allinta Jesús contestarusqanta qawaykuspanmi, Diospa leynin yachachiqkunamanta hukninku asuykuspan tapurqa: Llapan kamachikuykunamantaqa ¿mayqantaq punta kaq kamachikuy? nispa.

²⁹Chaymi Jesusñataq nirqa: Kamachikuykunamanta punta kaqqa kaymi: “Israel, uyariy: Señorninchik Diosqa, Señorninchikqa chullallam.

³⁰Chaynaqa, Señor Diosnikitam tukuy sonqoykiwan, tukuy vidaykiwan, tukuy yuyaynikiwan hinaspa tukuy kallpaykiwan kuyanki”, nispa.

³¹Iskay kaqñataqmi nin: “Runamasikitam kikikita hina kuyanki”, nispa. Kaykunam llapallan kamachikuykunamanta aswan hatun kamachikuykunaqa, nispa.

³²Diospa leynin yachachiqñataqmi nirqa: Yachachikuq, allintam nirunki. Cheqaptam Diosqa chullalla, paymanta huk diosqa manam pipas kanchu.

³³Tukuy sonqowan, tukuy yuyaywan, tukuy kallpawan Diosta kuyaymi hinaspa runamasinchiktapas kikinchikta hina kuyaymi aswan allinqa, altarpi lliw kañana sacrificiokunamantawan, wakin sacrificiokunata kañaspa ofreceymantapas, nispa.

³⁴Yachaywan contestaruptinmi Jesús nirqa: Manam llumpayñachu Diospa munaychakuyninman yaykunaykipaq faltasunki, nispa. Chaymi manaña pipas imatapas tapurqañachu.

³⁵Jesusmi templopi yachachispan nirqa: ¿Imaynanpitaq Diospa leynin yachachiqkuna ninku “Cristoqa Davidpa churinmi” nispanku?

³⁶Kikin Davidmi Chuya Espiritupa yachachisqan nirqa: “Señor Diosmi Señorniyta nirqa: Enemigoykikunata chakikipa sarupakunanman churanaykama alleqniypi tiyaykuy nispa”.

³⁷Sichum Davidpuni “Señorniy” nispa Cristota nichkaptinqa ¿imaynataq churinqa kanman? nispa. Llapa runakunañataqmi Jesusta ganasllawanña uyarirqaku.

³⁸Jesusmi yachachispan nirqa: Amayá qatipakuychikchu Diospa leynin yachachiqkunataqa, paykunaqa qoysu pachawan puriytam gustanku, plazakunapipas respetollawanña rimaykunankutam munanku.

³⁹Sinagogakunapipas chaynataq convidokunapipas ñawpaqllapi tiyaytaraqmi munankupas.

⁴⁰Paykunaqa viudakunapa tukuy imanta qechuspam mana musyachikunankupaq Diostapas una-unaytaraq mañakunku. Chayraykum paykunaqa hatun castigota chaskinqaku, nispa.

⁴¹Jesusmi templopi tiyachkarqa ofrendakuna churanankupa ñawpaqninpi, llapa runakunapa qollqe churasqankuta qawaspan. Apu runakunam achka qollqeta churarqaku.

⁴²Chaynataqmi wakcha viudapas chayaramuspan iskay qollqechata churaykurqa.

⁴³Hinaptinmi discipulonkunata qayaykuspan Jesús nirqa: Cheqaptapunim nikichik, wak wakcha viudam llapa apukunapa churasqanmantapas aswan mastaqa churarun.

⁴⁴Wakiqninkuqa puchuqllankutañam churarqaku, wak viudam ichaqa wakcha kayninpi vida pasananpaq kaqta lliwta churaykun, nispa.