Read Biblia Revisión Chuya Qellqa 1992 – Chuya Qellqa 1992 Marcos 6 Bible Online

Marcos 6 - Biblia Revisión Chuya Qellqa 1992 – Chuya Qellqa 1992 bible

Marcos 6

¹Jesusmi chaymanta pasakuspan llaqtanman rirqa, discipulonkunapas paywanmi rirqaku.

²Samana punchaw chayaramuptinmi sinagogapi yachachiyta qallaykurqa, chaymi uyariqninkunañataq admirakuspa tapukurqaku: ¿Maypitaq kay runa tukuy kaykunata yacharamun? ¿Maymantataq kaynaña yachayta hurqoramun? ¿Imaynatataq milagrokunata ruwan?

³¿Manachum kay runaqa Mariapa wawan carpintero? ¿Manachum wawqenkunapas Jacobowan, José, Judas hinaspa Simón? ¿Manachum paninkunapas ñoqanchikwan kachkanku? nispanku. Chaynata nispankum Jesusta mana kaqpaqpas hapirqakuchu.

⁴Chaymi paykunata Jesús nirqa: Profetaqa huklaw llaqtakunapiraqmi allin chaskisqa; llaqtanpi, wasinpi hinaspa ayllunkunapim ichaqa mana chaskisqachu, nispa.

⁵Chayraykum llaqtanpiqa mana ima milagrotapas ruwarqachu, aswanqa as onqoqkunallatam makinta churaykuspan sanoyachirqa.

⁶Jesusmi hukmanraq tarikurqa llaqtamasinkuna paypi mana creesqankurayku. Jesusmi hichpan llaqtakunapi yachachistin purirqa.

⁷Chunka iskayniyuq discipulonkunata qayaykuspanmi iska-iskaytakama kacharqa, hinaspam atiyta qorqa demoniokunata qarqonankupaq.

⁸Paykunatam kaynata kamachirqa: Rispaykichikqa qoqawtapas, tantatapas, qollqetapas, talegatapas amam apankichikchu, apaspaqa apankichik huk tawnallatam,

⁹usutaykichikwan churakuykuspam mudana pachaykichiktapas ama apankichikchu.

¹⁰Hukkaqnin wasiman yaykuspaykichikqa ripunaykichikkamam chayllapi samapakunkichik.

¹¹Sichum may llaqtapipas mana chaskisuptikichikqa hinaspa mana uyarisuptikichikqa, chaymanta lloqsispam usutaykichikpa polvontapas taspinkichik, chaynapi Diospa palabran wischupakuq kasqankuta yachanankupaq.

¹²Chaymi discipulonkuna lloqsispanku runakunaman willamurqaku huchankumanta wanakuspa Diosman kutirikunankupaq.

¹³Demoniokunatapas achkallatañam qarqorqaku, chaynataqmi onqoqkunatapas aceitewan untaspanku sanoyachirqaku.

¹⁴Rey Herodesmi Jesuspa tukuy ima ruwasqanmanta rimasqankuta uyariruspan nirqa: Bautizaq Juanmi wañusqanmanta kawsariramun, chayraykum milagrokunata ruwananpaq atiyniyuqqa, nispa.

¹⁵Wakinmi nirqaku: Eliasmi kayqa, nispanku. Wakinñataqmi nirqaku: Ñawpaq profetakuna hina hukkaqninmi, nispanku.

¹⁶Herodesñataqmi chaykunata uyariruspan nirqa: Juanmi payqa, kunkan qoruchisqay runam wañusqanmanta kawsariramun, nispa.

¹⁷Herodesmi ñawpaqta Juanta hapirachimuspan cadenawan chaqnasqata carcelman wichqarachirqa, chaynataqa ruwarqa wawqen Felipepa warmin Herodiaswan casarakusqanrayku.

¹⁸Juanmi Herodesta nirqa: Diospa leyninman hinaqa manam allinchu wawqekipa warminwan casarakuynikiqa, nispa.

¹⁹Chayraykum Herodías warmiqa Juanta cheqnikuruspan wañurachiyta munarqa, ichaqa manam atirqachu,

²⁰Rey Herodesmi Juanta chuya runa kasqanta yachaspan manchakurqa, chayraykum payta waqaycharqa. Juanpa rimasqankunata uyarispanmi mana ima ruwakuytapas atirqachu, ichaqa ganasllawanñam uyarirqa.

²¹Herodías warmipaqmi suyasqan punchaw chayamurqa. Rey Herodesmi santon punchaw chayaramuptin hatun convidota ruwachirqa, hinaspam qayachirqa llapa kamachikuqkunata, tropakunapa capitanninkunata hinaspa Galileapi ancha reqsisqa runakunata.

²²Chay punchawmi convidopi kachkaptinku, Herodiaspa warmi wawan yaykuruspan tusurqa. Chaymi rey Herodestawan mikuqmasinkunata llumpayta gustaykurqa, hinaptinmi sipasta Herodes nirqa: Munasqaykita mañaway, ñoqaqa qosqaykim, nispa.

²³Juraspanmi nirqa: Imatapas mañawasqaykitam qosqayki, mañawaptikiqa munaychakuyniypa partentapas qoykuykimanmi, nispa.

²⁴Chaymi sipasqa lloqsiramuspan mamanta tapurqa: ¿Imatataq mañasaq? nispa. Mamanñataqmi nirqa: Bautizaq Juanpa umanta mañakuruy, nispa.

²⁵Hinaptinmi sipasqa reypa kasqanman chaylla yaykuspan nirqa: Bautizaq Juanpa umanta huk platopi kunallan qoykuway, nispan.

²⁶Chaymi rey Herodes llumpayta llakikururqa, ichaqa convidoman qayachisqankunapa qayllanpi jurasqanraykum mana negayta atirqachu.

²⁷Hinaspam huk soldadota kamachirqa Juanpa umanta apamunanpaq. Chay soldadoñataqmi carcelman rispan Juanpa umanta qoruramurqa,

²⁸hinaspam platopi aparamuspan sipasman qoykurqa, payñataqmi mamanman qoykurqa.

²⁹Juanpa discipulonkunañataqmi chayta yacharuspanku, hamururqaku hinaspa Juanpa cuerponta apaspanku pamparamurqaku.

³⁰Llapa apostolkunam Jesuswan huñunakuruspanku tukuy ima ruwamusqankuta hinaspa yachachimusqankuta willarqaku.

³¹Jesusñataqmi nirqa: Chunniqman hakuchik chaypi samarimunaykichikpaq, nispa. Achkallaña runakuna hamusqanraykum mikunankupaqpas mana tiempo karqachu.

³²Chayraykum Jesusqa apostolninkunawan kuska chunniqman huk barcapi pasakurqaku.

³³Ichaqa llapa runakunam risqankuta rikuruspanku, llaqtakunamanta kallpaspanku paykunamantapas puntataraq chayarurqaku.

³⁴Jesusñataqmi barcamanta uraykamuspan chay achkallaña runakunata qawaykurqa, hinaspam paykunamanta llakipayarikurqa mana michiqniyuq ovejakuna hina kasqankurayku, chaymi tukuy imamanta yachachiyta qallaykurqa.

³⁵Yaqaña tutaykamuptinmi discipulonkuna asuykuspanku Jesusta nirqaku: Llumpay tardeñam, kaypiqa manam wasipas kanchu.

³⁶Llapa runakunatayá kamachiy, chakrakunaman hinaspa hichpa llaqtakunaman rispanku mikuyta rantimunankupaq, nispanku.

³⁷Jesusñataqmi nirqa: Qamkunayá mikuykachiychik, nispa. Paykunañataqmi nirqaku: ¿Ñoqaykuchu rispayku iskay pachak jornalpa chanin qollqewan tantata rantimuspa paykunaman mikuchisaqku? nispanku.

³⁸Jesusñataqmi tapurqa: ¿Haykataq tantaykichik kachkan? Qawamuychik, nispa. Hayka kasqantapas yachaykuspankum nirqaku: Pichqa tantawan iskay challwakunallam, nispanku.

³⁹Chaymi discipulonkunata Jesús kamachirqa, llapa runakunata rakinaspanku pastopi tiyachinankupaq.

⁴⁰Chaymi llapa runakuna pachakman hinaspa pichqa chunkaman rakinasqa tiyaykurqaku.

⁴¹Jesusñataqmi chay pichqa tantatawan iskay challwata hapiykuspan cielota qawarispan Diosman graciasta qorqa, hinaspam tantakunata pakiykuspan discipulonkunaman qoykuptin runakunaman aypurqaku, aypurqakutaqmi challwakunatapas.

⁴²Chaymi llapallanku saksanankukama mikurqaku.

⁴³Tantapa hinaspa challwapa puchuqnintam chunka iskayniyuq canasta huntataraq huñururqaku.

⁴⁴Mikuqkunam karqaku pichqa waranqa qarikuna.

⁴⁵Chaymantam discipulonkunata Jesús kamachirqa barcaman qespispanku Betsaida lawman chimpachkanankupaq, payñataqmi runakunata aviananpaq qepaykurqa.

⁴⁶Llapa runakunata aviaruspanmi Diosta mañakunanpaq orqoman qespirqa.

⁴⁷Tutayaramuptinmi barcaqa qochapa chawpintaña richkarqa, Jesusñataqmi qocha patallanpiraq sapallan kachkarqa.

⁴⁸Hinaspam discipulonkunata rikururqa paykuna lawman llumpayta wayra pukumuptin ñakariyllawanña yaku qachisqankuta. Yaqa pacha achikyaytañam yaku hawantakama paykuna lawman Jesús rispan ñawparuyta munarqa.

⁴⁹Discipulonkunañataqmi yaku hawantakama puriqta rikuruspanku qaparirqaku: ¡Manchachikum wakqa! nispanku.

⁵⁰Llapallankum rikuruspanku mancharikurqaku. Jesusñataqmi paykunata rimapayaspan nirqa: Ñoqam kani, ¡Hawkalla kaychik! ama manchakuychikchu, nispan.

⁵¹Barcaman Jesús qespiruptinmi wayra tanirurqa. Discipulonkunañataqmi llumpayta admirakurqaku.

⁵²Paykunaqa rumi sonqo kasqankuraykum tantakuna mirachisqantapas mana entienderqakuchu.

⁵³Qochata chimparuspankum Genesaret lawman chayaruspanku barcata qocha patanpi watarqaku.

⁵⁴Maypacham barcamanta uraykuptinkum llapa runakuna Jesusta reqsirurqaku.

⁵⁵Hinaspam muyuriqninpi llaqtakunaman kallpaspanku llapa onqoqkunata chakanakunapi Jesusman apamurqaku.

⁵⁶Llaqtakunaman, chakrakunaman hinaspa maymanña Jesús riptinpas, onqoqkunata ñankunaman churaspankum ruegakurqaku capanpa patallantapas hapiykachinanpaq, chaymi haykam hapiykuqkunaqa sanoyarqaku.