Read Biblia Revisión Chuya Qellqa 1992 – Chuya Qellqa 1992 Marcos 7 Bible Online

Marcos 7 - Biblia Revisión Chuya Qellqa 1992 – Chuya Qellqa 1992 bible

Marcos 7

¹Jerusalenmanta hamuruspankum llapa fariseokunawan Diospa leynin yachachiqkuna Jesusman asuykurqaku.

²Paykunam Jesuspa wakin discipulonkunata makinkuta mana mayllakuspa mikuchkaqta rikururqaku, chayraykum paykunapa contranpi rimarqaku.

³(Fariseokunawan judiokunaqa ñawpaq taytankupa costumbrenta qatispankum, makinkuta manaraq mayllakuchkaspaqa imatapas manam mikuqkuchu.

⁴Mercadomanta kutimuspankupas manaraq makinkuta mayllakuspaqa manam mikuqkuchu. Chayna tukuy rikchaq costumbrekunamanmi hapipakunku, chayraykum vasokunata, jarrokunata, fierro mankakunata hinaspa catrekunatapas mayllanku)

⁵Chaymi fariseokunawan Diospa leynin yachachiqkunaqa, Jesusta tapurqaku: ¿Imanasqataq discipuloykikunaqa ñawpaq taytanchikkunapa costumbrenkuta ruwayman mana churankuchu hinaspa qacha makintillan mikuchkanku? nispanku.

⁶Chaymi Jesusñataq nirqa: ¡Iskay uyakuna! Allintam profeta Isaías qamkunamanta qellqarqa: “Kay llaqtaqa simillamantam yupaychawan, sonqonmi ichaqa ñoqamanta karupi kachkan.

⁷Yanqapaqmi yupaychawankupas, yachachisqankupas runapa kamachisqallanmi”, nispan.

⁸Qamkunaqa Diospa kamachikuyninkunata mana kasukuspam runakunapa costumbrenkunaman hapipakunkichik.

⁹Qamkunaqa Diospa kamachikuyninkunata mana kasukuspam costumbrekunallataña qatinkichik.

¹⁰Moisesqa kaynatam yachachirqa: “Tayta-mamaykita respetay, pipas tayta-mamanta ñakaqqa wañunqapunim”, nispan.

¹¹Qamkunam ichaqa kaynata yachachinkichik: “Runaqa atinmanmi taytanta otaq mamanta kayna niyta: Manam yanapaykimanchu, lliw kapuqniytam Diosmanña qoykuni [3]corbán, nispa”.

¹²Chaynata niqkunaqa manañam taytanta otaq mamantaqa yanapanmanñachu, nispaykichik.

¹³Ñawpaq costumbrekuna chaskisqaykichikta ruwaspaykichikmi Diospa kamachikuyninta yanqachankichik. Qamkunaqa imatapas costumbreman hinallam ruwankichik, nispan.

¹⁴Chaymi runakunata huktawan qayaykuspan Jesús nirqa: Llapallaykichik uyariwaychik hinaspa entiendeychik:

¹⁵Manam imapas hawamanta yaykuqchu runataqa huchallichin, runataqa huchallichin sonqonmanta lloqsimuqmi.

¹⁶[4][Uyarikuqkunaqa kasukuychikyá] nispa.

¹⁷Runakunamanta rakikuykuspan wasiman Jesús yaykuruptinmi, chay yachachikuymanta discipulonkuna tapukurqaku.

¹⁸Hinaptinmi Jesusñataq nirqa: ¿Qamkunapas manachu entiendenkichik? ¿Manachu yachankichik imapas hawamanta yaykuqqa runata mana huchallichisqanta?

¹⁹Imapas mikusqanqa manam sonqonmanchu yaykun, aswanqa wiksanman yaykuspam letrinaman lloqsin, nispa. Chaywanqa Jesusqa nichkarqa llapa mikuykunaqa limpio kasqantam.

²⁰Jesusqa nirqataqmi: Sonqomanta lloqsimuqmi runataqa huchallichin.

²¹Ukunmanta lloqsimuqqa runapa sonqonmantam lloqsimun. Chaymantam lloqsimun tukuy mana allin piensaykuna, aychapi qachachakuykuna, suwakuykuna, runata wañuchiykuna,

²²waqllikuykuna, imatañapas munapayaykuna, mana allin ruwaykuna, engañakuykuna, vicioman qokuruykuna, envidiakuykuna, cuento qepi kaykuna, hatun tukuykuna, mana allin tanteaykuna.

²³Tukuy kay mana allinkunam sonqonmanta lloqsimuspan runata huchallichin, nispa.

²⁴Jesusmi chaymanta lloqsiruspan Tiro lawman rirqa. Chay llaqtapi kasqanta mana pipas yachananta munaspanmi huk wasiman yaykururqa, ichaqa manam imayna pakakuyta atirqachu.

²⁵Chaypi kachkaptinmi, mana allin espiritupa huntasqan sipaspa maman yacharurqa, chaymi hamuruspan Jesuspa ñawpaqninpi qonqorakuykurqa.

²⁶Chay warmiqa manam judiochu karqa, aswanqa Siria lawpi Fenicia llaqtayuqmi. Paymi Jesusta ruegakurqa wawanmanta demoniota qarqonanpaq.

²⁷Jesusmi ichaqa nirqa: Puntataqa warmakunaraqmi saksanan, manam allinchu warmakunamanta tantata qechuruspa allqokunaman wischuykuyqa, nispa.

²⁸Chay warmiñataqmi nirqa: Arí chaynam Señorlláy, chaywanpas mesapa ukunpi kaq allqokunapas warmakunapa wichichisqantam mikunku, nispa.

²⁹Hinaptinmi Jesús nirqa: Chaynata nisqaykiraykuyá hawkallaña ripukuy, demonioqa ñam wawaykimanta lloqsirunña, nispa.

³⁰Wasinman chayaruspanmi wawanta camapi waqtapachkaqta tariykurqa, demoniopas paymantaqa ñam lloqsirusqaña.

³¹Jesusmi Tiro lawmanta lloqsiruspan Sidón lawninta rispan Decápolis lawpi Galilea qochaman chayarurqa.

³²Chaymanmi mana uyarikuq wata-wata rimaq runata aparamuspanku makinta churaykunanpaq ruegakurqaku.

³³Jesusñataqmi runakunamanta sapaqman pusaruspan dedonkunawan chay runapa rinrinta wiqorurqa, hinaspam toqayninwan qallunta tupaykachirqa.

³⁴Hinaspanmi altoman qawarispan qaparirqa: ¡Efata! nispan. Chayqa ¡kicharikuy! ninanmi.

³⁵Hinaptinmi chay runapa rinrinkuna chaypunilla kicharikururqa, qallunpas paskakuruptinmi allintaña rimarqa.

³⁶Jesusñataqmi chaypi kaqkunata kamachirqa ama pimanpas willakunankupaq, ichaqa chaynata kamachichkaptinpas aswanraqmi willakurqaku.

³⁷Chaymi runakuna admirakuspanku nirqaku: Jesusqa imatapas allintam ruwan, mana uyariqkunatam uyarichin, mana rimaqkunatapas rimachinmi, nispanku.