Read Biblia Revisión Chuya Qellqa 1992 – Chuya Qellqa 1992 Marcos 8 Bible Online

Marcos 8 - Biblia Revisión Chuya Qellqa 1992 – Chuya Qellqa 1992 bible

Marcos 8

¹Chay punchawkunapim achkallaña runakuna huktawan huñunakururqaku, chaymi mikunankupaq mana imapas kaptin, discipulonkunata qayaspan Jesús nirqa:

²Kay runakunamantam llakipayarikuni, paykunaqa kimsa punchawñam ñoqawan kachkanku, manam imapas mikunankupaq kanchu,

³mana mikusqata wasinkuman kachaykuptiyqa ripusqan ñankunapichá desmayarunqaku, wakiqninkuqa karukunamantaraqmi hamurqaku, nispa.

⁴Discipulonkunañataqmi nirqaku: ¿Imatataq mikuchichwan mana runapa kasqanpiqa? nispanku.

⁵Jesusñataqmi paykunata tapurqa: ¿Haykataq tantaykichik kachkan? nispa. Chaymi paykuna nirqaku: Qanchisllam, nispanku.

⁶Hinaptinmi llapa runakunata pampapi tiyaykachispan, chay qanchisnintin tantakunata hapiykuspan Diosman graciasta qorqa, hinaspam pakiykuspan discipulonkunaman qoykurqa runakunaman aypunankupaq, chaymi paykunañataq aypurqaku.

⁷Paykunapaqqa karqataqmi as challwachankupas, chaymi Diosman graciasta qospa chaykunatapas Jesús aypuchirqa.

⁸Chaymi llapallanku saksanankukama mikurqaku, hinaptinmi puchuqtapas qanchis canastataraq huñururqaku.

⁹Mikuqkunam karqa yaqa tawa waranqa hina. Mikuruptinkum Jesús aviarurqa.

¹⁰Chaymantam discipulonkunawan barcaman seqaruspan Dalmanuta lawman pasakurqa.

¹¹Fariseokunam hamuspanku Jesuswan atipanakuyta qallaykurqaku, hinaspam wichichiyta munaspanku mañarqaku huk milagrota ruwaspa Diosmanta hamusqanta qawachinanpaq.

¹²Jesusñataqmi llakirikuspan paykunata nirqa: ¿Imanasqataq kay runakunaqa señaltaraq mañawanku? Cheqaptam nikichik, manam ima señalpas ruwasqachu kanqa, nispa.

¹³Hinaspanmi chay runakunata saqeruspan barcaman qespiykuspan qochapa waklaw chimpanman pasakurqa.

¹⁴Discipulonkunam tanta apayta qonqarurqaku, aswanpas huk tantallam barcapi karqa.

¹⁵Jesusmi discipulonkunata nirqa: Fariseokunapa hinaspa Herodespa levaduranmantayá waqaychakuychik, nispa.

¹⁶Chaymi discipulonkuna ninakurqaku: Tantata mana apamusqanchikraykum chaynataqa nichkan, nispanku.

¹⁷Jesusñataqmi rimasqankuta musyaruspan nirqa: ¿Imanasqataq manam tantanchik kanchu nispa atipanakunkichik? ¿Manachu entiendenkichik? ¿Hinallachu sonqoykichik rumirayachkan?

¹⁸¿Ñawikichik kachkaptinchu mana rikukunkichik? ¿Rinrikichik kachkaptinchu mana uyarikunkichik? ¿Manachu yuyankichik

¹⁹chay pichqa tantata pakispa pichqa waranqa qarikunapaq haypachisqayta? ¿Hayka canastatataq puchuqta huñurqankichik? nispa. Chaymi paykunañataq nirqaku: Chunka iskayniyuq canastatam, nispanku.

²⁰Qanchis tantamanta tawa waranqa runapaq mirachiptiyqa ¿hayka canasta huntataraqtaq puchuqta huñurqankichik? nispa. Chaymi paykunañataq nirqaku: Qanchis canastatam, nispanku.

²¹Hinaptinmi Jesús nirqa: ¿Chaynaqa, imanasqataq mana entiendenkichikchu? nispa.

²²Betsaida llaqtaman chayaruptinkum huk ñawsata Jesusman pusamurqaku, hinaspam llapchaykunanpaq ruegarqaku.

²³Chaymi Jesusñataq ñawsata makinmanta aysarikuspan llaqtamanta hawanman pusarurqa, hinaspanmi ñawinman toqaykuspan makinta hawanman churaykuspan tapurqa: ¿Yaqachu rikukuchkankiña? nispa.

²⁴Ñawsañataqmi qawaykachakuspan nirqa: Runakunatam sachakunata hina rikuchkani, ichaqa purichkaqta, nispa.

²⁵Chaymantam ñawinpa hawanman makinta huktawan churaykuptin qawarikuruspan sanoyarurqa, hinaspanmi tukuy imakunatapas allintaña rikurqa.

²⁶Jesusñataqmi wasinman ripunanpaq kamachispan nirqa: Amam llaqtamanqa yaykunkichu, nispa.

²⁷Chaymantam Jesusqa discipulonkunawan Cesarea de Filipo lawpi llaqtakunaman rirqaku. Richkaptinkum discipulonkunata Jesús tapurqa: ¿Pim kasqaytataq runakunaqa ñoqamanta rimanku? nispa.

²⁸Chaymi paykunañataq nirqaku: Wakinmi ninku Bautizaq Juan kasqaykita, wakinñataqmi Elías kasqaykita, wakinñataqmi ninku hukkaqnin profeta kasqaykita, nispanku.

²⁹Jesusñataqmi paykunata tapurqa: Qamkunaqa ¿pim kasqaytataq ninkichik? nispa. Hinaptinmi Pedro nirqa: Qamqa Cristom kanki, nispa.

³⁰Chaymi paykunata Jesús kamachirqa ama pimanpas paymanta willakunankupaq.

³¹Chaymantam Jesusqa yachachiyta qallaykurqa, runapa Churinqa llumpayta ñakarichisqa kananmanta, ancianokunapa, sacerdotekunapa kamachiqninkunapa, Diospa leynin yachachiqkunapa cheqnisqan kananmanta. Chaynataq wañuchisqa kananmantawan, kimsa punchawman kawsarimunanmantapas.

³²Chaykunataqa mana pakaspam willarqa. Chaymi Pedroñataq huklawman pusaruspan Jesusta qaqcharqa.

³³Jesusñataqmi discipulonkunaman muyuriykuspan Pedrota qaqchaspan nirqa: ¡Ñoqamanta anchuy Satanás! Qamqa manam Diospa qawasqanta hinachu qawanki, aswanqa runakunapa qawasqanman hinallam, nispa.

³⁴Chaymantam discipulonkunatawan runakunata qayaykuspan nirqa: Pipas qatiwayta munaspaqa, amaña kikillanpaq kawsaspayá cruzninta qepikuykuspa qatiwachun.

³⁵Pipas vidanta salvay munaqqa chinkarunqam, ñoqarayku hinaspa evangeliorayku wañuqmi ichaqa vidanta salvanqa.

³⁶¿Imatataq runa hurqokunman kay pachapi kaqkunata ganaruspan vidantañataq pierderuspanqa?

³⁷¿Haykatataq runa paganman vidanta salvananpaq?

³⁸Chaynaqa, pipas mana kasukuq huchasapa runakunapa qayllanpi ñoqamanta hinaspa palabraykunamanta penqakuqtaqa, runapa Churinpas paymantam penqakunqa. Chaynataqa ruwanqa angelninkunawan kuska Taytanpa atiyninpi kutimuspanmi.