Read Biblia Revisión Chuya Qellqa 1992 – Chuya Qellqa 1992 Lucas 1 Bible Online

Lucas 1 - Biblia Revisión Chuya Qellqa 1992 – Chuya Qellqa 1992 bible

Lucas 1

¹Ancha kuyasqay Teófilo, achkaqñam qellqayta qallaykunku ñoqayku ukupi tukuy imam pasakusqanmanta, paykunam qellqarqaku qallariyninmantapuni Jesuswan kuska kaqkunapa imam willawasqankuta. Paykunatam Jesús kamachirqa evangelionta willakamunankupaq. Chaymi ñoqapas tukuy imakunam pasakusqanmanta sumaqta qatipaykuspay imam kaqta qellqamuyki,

⁴chaynapi uyarisqaykikunaqa cheqap kasqanta yachanaykipaq.

⁵Judea lawpi Herodes munaychakuchkaptinmi, Zacarías sutiyuq runa sacerdote karqa, paymi sacerdote Abiaspa gruponwan kuska templopi servikurqa. Zacariaspa warmin Elisabetqa sacerdote Aaronpa mirayninmanta kaqmi karqa.

⁶Paykunaqa warmi-qarim Diospa qayllanpi allin ruwaq runakuna karqaku. Diospa kamachikuyninkunatapas lliwtam kasukuqku.

⁷Ichaqa warmin Elisabet qolluq kasqanraykum mana wawa-churiyuq karqaku. Iskayninkum yuyaqkamaña karqaku.

⁸Huk punchawmi Zacariaspa gruponman templopi serviy tuparurqa.

⁹Sacerdotekunapa costumbrenman hina sorteaptinkum, Zacariasman tuparurqa Señorpa templonpi Chuyay-chuyay lugarman yaykuspa incienso kañay.

¹⁰Inciensota kañanankamam, llapa runakunañataq Diosta mañakuspanku hawapi karqaku.

¹¹Hinachkaptinmi Zacariasman Señorpa angelnin qonqayllamanta rikuriykurqa, incienso kañananku altarpa alleq lawninpi sayaykuspa.

¹²Zacariasñataqmi angelta rikuykuspan llumpayta mancharikurqa.

¹³Ichaqa chay angelmi nirqa: Zacarías ama manchakuychu, mañakuynikitam Dios uyariykun. Warmiki Elisabetmi qari wawata wachakunqa, paytam Juan nispa sutichanki.

¹⁴Naceruptinmi ancha-anchata kusikunki, llapa runakunapas anchallataña kusikunqaku.

¹⁵Payqa Diospa qayllanpipas llumpay hatunchasqam kanqa. Manam vinotapas nitaq ima sinkachikuqtapas tomanqachu. Manaraq nacechkaspanmi Chuya Espiritupa huntasqanña kanqa.

¹⁶Israelpa achkaq mirayninkunatam Señor Diosninkuman kutichinqa.

¹⁷Paymi Señorpa ñawpaqninta rinqa Eliaspa espiritunwan hinaspa atiyninwan, chaynapi tayta-mamakunata wawa-churinkuwan allinyanachinanpaq, mana kasukuqkunapas kasukuqña kanankupaq. Chaynatam llapa runakunapa sonqonta allichanqa Señorta chaskinankupaq, nispa.

¹⁸Hinaptinmi Zacariasñataq angelta tapurqa: ¿Imaynatataq nisqaykikunaqa cheqap kasqanta yachasaq? Ñoqapas chaynataq warmiypas llumpay yuyaqñam kaniku, nispan.

¹⁹Chaymi angelñataq nirqa: Ñoqaqa Diospa qayllanpi servikuq Gabrielmi kani, paymi kachamuwarqa kay allin noticiata qanman willanaypaq.

²⁰Chaynaqa, nisqaykunata mana creesqaykiraykum churiki nacenankama mana rimaq kanki. Kay nisqaykuna cumplikunankamam mana rimankichu, nispa.

²¹Chaykamam runakunañataq Zacariasta hawapi suyarqaku, santuariomanta manaña lloqsirimusqanmanta tapukuspanku.

²²Lloqsiramuspanmi paykunata imayna rimapayaytapas mana atirqachu, chaynapim musyarurqaku visionta santuariopi chaskiramusqanta. Manaña rimayta atispanmi señasllawanña entiendechirqa.

²³Zacariasmi templopi servikunan punchawkunata cumpliruspan wasinman ripukurqa.

²⁴Chaykunapa qepantam warmin Elisabet wiksayakuruspan pichqa killatapuni wasinmanta mana lloqsirqachu, kaynata nisqanrayku:

²⁵“Señormi kaynata ruwaruwan, chaynapi runakuna manaña asipayawananpaq”, nispa.

²⁶Elisabetpa wiksayakusqan soqta killa qepatam, ángel Gabrielta Dios kacharqa Galilea lawpi Nazaret llaqtaman,

²⁷manaraq qari reqsiq sipasta watukamunanpaq, paypa sutinmi karqa María. Chay sipasmi casarakunanpaq Davidpa mirayninmanta kaq Joseypa rimapayasqanña karqa.

²⁸Chay angelmi Mariapa wasinman yaykuykuspan nirqa: Diospa bendecisqan María, rimaykullaykim, Señormi qanwan kachkan, nispan.

²⁹Mariañataqmi angelpa rimaykusqanwan hukmanyarurqa, hinaspam sonqollanpi tapukurqa chay rimaykusqanpa ima ninanmi kasqanmanta.

³⁰Angelñataqmi nirqa: María ama manchakuychu, Diospa kuyapayakuynintam haypaykunki.

³¹Kunanmi wiksayakuspayki qari wawata wachakunki, paytam Jesuswan sutichanki.

³²Payqa atiyniyuqmi kanqa, chayraykum tukuy imapa hawanpi munaychakuq Diospa Churinwan sutichasqa kanqa. Kikin Diosmi Rey kananpaq ñawpaq taytan Davidpa trononta qoykunqa.

³³Chaynapi Israel nacionpi wiñaypaq munaychakunanpaq, munaychakuyninqa manam haykapipas tukunqachu, nispa.

³⁴Hinaptinmi Mariañataq tapurqa: Manaraq qariwan kachkaptiyqa ¿imaynataq chayqa kanman? nispa.

³⁵Chaymi angelñataq nirqa: Chuya Espiritum qanman hamunqa, hinaptinmi hanaq pachapi Diospa atiynin llantuy hina pampaykusunki. Chayraykum naceq chuya wawaqa Diospa Churinwan sutichasqa kanqa.

³⁶Qolluq nisqanku aylluyki Elisabetpas yuyaqña kachkaspam soqta killa wiksayuqña kachkan, huk qari wawatam wachakunqa.

³⁷Diospaqqa manam imapas sasachu, nispa.

³⁸Mariañataqmi nirqa: Ñoqaqa Diospa serviqllanmi kani, nisqaykiman hinayá ñoqawan ruwasqa kachun, nispa. Chaymantam ángel pasakurqa.

³⁹Chay punchawkunapim utqayman María rirqa Judá law orqopi kaq llaqtaman.

⁴⁰Hinaspanmi Zacariaspa wasinman yaykuykuspan Elisabetta rimaykurqa.

⁴¹Rimaykusqanta Elisabet uyariykuptinmi wiksanpi wawa chaylla kuyurirurqa. Chaymi Elisabetqa Chuya Espíritu huntaykuptin

⁴²kusikuymanta qaparispan Mariata nirqa: ¡Diosmi wakin warmikunamantapas masta bendeciykusunki, bendeciykuntaqmi wiksaykipi kaq wawatapas!

⁴³¿Pitaq ñoqaqa karqani Señorniypa maman watukaykamuwananpaqqa?

⁴⁴Rimaykuwasqaykita uyariykuptiymi wiksaypi wawa kusikuymanta kuyurirun.

⁴⁵Creesqaykiraykum qamqa ancha kusisqa kanki, Señorpa nisusqaykikunaqa cumplikunqapunim, nispa.

⁴⁶Mariañataqmi nirqa: Almaymi Señorta hatunchan,

⁴⁷espirituypas Salvaqniy Diospim kusikun.

⁴⁸Diosmi kay wakcha serviqninpi ñawinta churaykun, chayraykum kunanmantaqa lliw miraykuna “ancha kusisqa” nispa sutichawanqaku.

⁴⁹Tukuy Atiyniyuq Diosmi hatun kaqkunata ñoqawan ruwarun, ¡paypaqa sutinpas Chuyam!

⁵⁰Payqa wiñaypaqmi kuyapayan kasukuqninkunataqa.

⁵¹Atiyninwanmi admirakuypaq kaqkunata ruwarqa, hatun tukuqkunapa imam ruway munasqankutam yanqacharun.

⁵²Munaychakuqkunatam trononkumanta wichichin, uchuychakuqkunatam hatunchan.

⁵³Wakchakunatam tukuy imawan huntaykachin, apukunatañataqmi mana imayuqta kutirichin.

⁵⁴Serviqnin Israeltam yanapaykurqa, kuyapayakuywan yanapakuqtaqa manam qonqarqachu.

⁵⁵Chaynatam ñawpaq taytanchik Abrahamman hinaspa mirayninkunaman prometerqa, nispa.

⁵⁶Mariaqa yaqa kimsa killam Elisabetwan yacharqa, chaymantam wasinman kutikurqa.

⁵⁷Elisabetpa wachakunan tiempo cumplikuruptinmi huk qari wawata wachakururqa.

⁵⁸Chaymi vecinonkunawan ayllunkunapas Diospa bendeciykusqanta yachaykuspanku paywan llumpayta kusikurqaku.

⁵⁹Pusaq punchawninmanmi wawata señalachinankupaq aparqaku, hinaptinmi taytan Zacariaspa sutinwan sutichayta munarqaku.

⁶⁰Mamanñataqmi nirqa: Juanmi sutinqa kanqa, nispa.

⁶¹Paykunañataqmi nirqaku: Aylluykikunapiqa manam pipas chayna sutiyuqqa kanchu, nispanku.

⁶²Hinaptinmi señaschaspanku wawapa taytanta tapurqaku: Imataq sutin kanqa, nispanku.

⁶³Zacariasñataqmi tablachata qoykuptinku qellqarqa “Juanmi sutinqa” niqta. Chaymi llapallanku admirakurqaku.

⁶⁴Chayllamanmi Zacariaspa siminqa kicharikururqa, qallunpas paskarikururqam, hinaspam Diosta yupaycharqa.

⁶⁵Chaykuna pasakusqanwanmi vecinonkuna llumpay mancharisqallaña karqaku, hinaspam Judea law orqokunapi lliw willakurqaku.

⁶⁶Chaymi haykam uyariqkuna kaynata tapukurqaku: ¿Imaraq kay wawa kanqa? nispanku. Diospa atiyninmi wawawan karqa.

⁶⁷Juanpa taytan Zacariasmi Chuya Espíritu huntaykuptin kaynata profetizarqa:

⁶⁸Israelpa Diosninyá qapaqchasqa kachun, payqa llaqtanta salvaykunanpaqmi hamurqa.

⁶⁹Tukuy Atiyniyuq Salvaqninchiktam kachamuwarqanchik, payqa serviqnin Davidpa mirayninmi.

⁷⁰Paymi ñawpaqmantaraq chuya profetankunatakama prometekurqa,

⁷¹enemigonchikkunamanta hinaspa cheqniqninchikkunamanta salvawananchikpaq;

⁷²ñawpaq taytanchikkunamanta llakipayarikuspan pacto ruwasqanta yuyarinanpaq.

⁷³Ñawpaq taytanchik Abrahammanmi prometerqa,

⁷⁴enemigonchikkunamanta librawananchikpaq chaynapi mana manchakuspa payta servinanchikpaq,

⁷⁵Diosllapaqña kawsaspa, allin kaqkunata ruwaspa payllapaqña sapa punchaw kawsananchikpaq.

⁷⁶Churilláy, qamñataqmi tukuy imapi munaychakuq Diospa profetanwan sutichasqa kanki, qanmi ñanta allichastin Señorpa ñawpaqninta rinki.

⁷⁷Hinaspam llaqtanman willamunki huchankumanta pampachasqa kaspa salvasqa kanankuta.

⁷⁸Diosninchikmi kuyapayawaspanchik hanaq pachamanta musoq punchawpa kanchariyninta qoykuwanchik,

⁷⁹chaynapi nisyu tutayaypi kaqkunata kancharinanpaq, hinaspa ñoqanchiktapas hawkayay ñanninta pusawananchikpaq, nispan.

⁸⁰Juanmi wiñaspan espiritupi kallpanchakurqa, hinaspam chunniqkunapi yacharqa Israelpa mirayninkunaman reqsichikunankama.