Read Biblia Revisión Chuya Qellqa 1992 – Chuya Qellqa 1992 Lucas 12 Bible Online

Lucas 12 - Biblia Revisión Chuya Qellqa 1992 – Chuya Qellqa 1992 bible

Lucas 12

¹Waranqantin-waranqantin runakuna tanqanakustin Jesuspa kasqanman huñunakaramurqaku. Hinaptinmi Jesusqa discipulonkunamanta qallaykuspan nirqa: Fariseokunapa levaduranmanta cuidakuychik, paykunaqa iskay uyakunam.

²Imapas pakasqa kaqkunaqa qawachisqam kanqa, chaynataqmi mana yachasqa kaqkunapas yachasqataq kanqa.

³Chaynaqa, tutayaypi imapas rimasqaykichikqa punchawpacham uyarisqa kanqa, wasi ukullapi upallallamanta rimasqaykichikpas wasipa hawanmanta willakusqam kanqa.

⁴Kuyasqallaykuna, amayá cuerpo wañuchiqtaqa manchakuychikchu, almataqa manam imanaytapas atinqachu.

⁵Kunanmi yachachisqaykichik pitam manchakunaykichikta: Manchakuychikqa wañurachispa infiernoman wischuykunanpaq atiyniyuq kaqtayá. Arí, paytam manchakunaykichikqa.

⁶¿Manachum pichqa urpichakunata as qollqellapaq rantikunku? Chaywanpas Diospa qayllanpiqa manam mayqellanpas qonqasqachu kanku.

⁷Qamkunapaqqa chukchaykichikpas llapallanmi yupasqa kachkan. Chaynaqa, ama manchakuychikchu, qamkunaqa urpichakunamantapas aswan valorniyuqmi kankichik.

⁸Nikichikmi, runakunapa qayllanpi ñoqamanta willakuqtaqa, runapa Churinpas Diospa angelninkunapa qayllanpim paymanta willakunqa.

⁹Runakunapa qayllanpi negawaqniyqa, Diospa angelninkunapa qayllanpipas negasqam kanqa.

¹⁰Pipas runapa Churinpa contranpi rimaqqa pampachasqam kanqa, Chuya Espiritupa contranpi rimaqmi ichaqa mana pampachasqachu kanqa.

¹¹Sinagogakunaman, juzgadokunaman hinaspa llaqta kamachiqkunaman apasqa kaspaykichikqa, amam llakikunkichikchu imam otaq imaynam rimanaykichikmantaqa.

¹²Imam rimanaykichiktaqa Chuya Espiritum yachachisunkichik.

¹³Jesustam runakunapa chawpinmanta hukkaqnin nimurqa: Yachachikuq, wawqeytayá niykapuway herenciata rakiwananpaq, nispa.

¹⁴Chaymi Jesusñataq nirqa: Yaw runa, ¿pitaq ñoqata churawarqa qamkunapa jueznikichik otaq herenciaykichik rakinaq kanaypaq?

¹⁵Nirqataqmi: Qollqella kuyaymanta cuidakuychik. Runaqa manam tukuy imayuq karuspachu allinta kawsanqa, nispa.

¹⁶Hinaspam kay rikchanachiytawan nirqa: Huk apu runam chakranmanta sinchillataña cosecharurqa,

¹⁷chaymi tanteaspan nirqa: ¿Imatataq ruwaykusaq? Manam cosechay apaykunaypaq sitio kanchu, nispan.

¹⁸Hinaspam nirqa, kaynatayá ruwasaq: Kawsaykuna waqaychanay wasita taqmaruspayá aswan hatuntaña ruwarusaq, cosechaykunatawan tukuy imaykunatapas chaypiña waqaychaspay,

¹⁹almayta nisaq: Almalláy, unay watakunapaqmi tukuy imata achkallataña waqaycharunki. Kunanqa samakuy, mikukuy, upyakuy hinaspa kusikuy, nispa.

²⁰Ichaqa Diosmi payta nirqa: “Mana yuyayniyuq runa, kunan tutam almayki mañaq hamuchkan. Chaynaqa, ¿pipaqtaq kanqa tukuy ima huñukusqaykiqa?” nispa.

²¹Chaynam kanqa kikillanpaq imapas maskaq runaqa, Diospa qayllanpiqa pasaypaq mana imayuqmi kachkan, nispa.

²²Chaymantam discipulonkunata nirqa: Nikichikmi, amayá mikunaykichikmantawan, imawan pachakunaykichikmantaqa llakikuychikchu.

²³Mikuymantapas astawanqa vidaykichikmi valen, pachamantapas astawanpas cuerpoykichikmi valen.

²⁴Ullachkukunata qawariychik, paykunaqa manam tarpunkuchu nitaq cosechankuchu, manataqmi trojenkupas nitaq taqenkupas kanchu. Chaywanpas paykunataqa Diosmi mikuchin. Qamkunaqa alton pawaq urpikunamantapas aswan valorniyuqmi kankichik.

²⁵¿Mayqannikichiktaq maynataña afanakuspapas sayaynikichikman huk kuchustawanraq yaparuwaqchik?

²⁶Chayllatapas mana ruwayta atichkaspaqa ¿imanasqataq wakin kaqkunamanta llakikunkichik?

²⁷Waytakunapa wiñasqantayá qawariychik, manam llamkankuchu nitaq puchkankuchu. Ichaqa nikichikmi, rey Salomonqa tukuy imayuq kachkaspapas manam huknin wayta hinallapas pachakurqachu.

²⁸Chaynaqa, pisi iñiyniyuq runakuna, sichum suma-sumaq kachkaspa paqarinñataq hornopi ruparuq purun waytakunata Diospuni kuyayllapaqta pachachichkaspaqa ¿manachum qamkunatapas pachachisunkichikman?

²⁹Qamkunaqa amayá llakikuychikchu: “Imataraq mikusun, imataraq tomasun”, nispaqa. Amayá imamantapas llakisqallañaqa kaychikchu.

³⁰Tukuy chaykunamantaqa Diosta mana reqsiqkunallam llakikun. Qamkunapa Taytaykichikqa ima pisisusqaykichiktapas yachanñam.

³¹Qamkunaqa Diospa munaychakuynintayá maskaychik, hinaptinqa ima pisisusqaykichiktapas qosunkichikmi.

³²Ovejallaykuna, aslla kaspapas amayá manchakuychikchu, Dios Taytaykichikmi kuyasuspaykichik munaychakuyninta qoykusunkichik.

³³Kapuqnikichikta rantikuspayá mana imayuqkunaman qoychik. Chaynata ruwaspaqa hanaq pachapi mana mawkayaq wayqamanmi mana tukuq kapuqnikichikta huntachichkankichik. Chaymanqa manam suwapas chayanchu, chaypiqa manataqmi puyupas tukunchu.

³⁴Maypim kapuqnikichikpa kasqanpim sonqoykichikpas kanqa.

³⁵Qamkunaqa weqawnikichikta allinta wataspa chaynataq mecheroykichiktapas ratachispa listolla kaychik.

³⁶Casamientomanta patronninku kutimunanta suyaq runakuna hinayá kaychik, chaynapi chayaramuspan punkuta takamuptin chaylla kichanaykichikpaq.

³⁷Mayna kusisqam kanqaku patronnin kutimuspa rikchachkaqta tariykamusqan sirvientekunaqa. Cheqaptapunim nikichik, patronninkuqa allichakuykuspanmi paykunata mesapi tiyaykachispan kikinpuni serviykunqa.

³⁸Chawpi tutataña otaq achikyaqtaña patronnin kutimuspan rikchachkaqta tariykamusqan sirvientekunaqa mayna kusisqam kanqaku.

³⁹Chaynaqa, kaytayá yachaychik, sichum wasiyuq yachanman imay horatam suwa hamunanta, hinaspaqa manachá suwachikunmanchu.

⁴⁰Qamkunapas chaynayá listolla kaychik, runapa Churinqa mana suyasqaykichik horatam kutiramunqa, nispa.

⁴¹Hinaptinmi Pedroñataq tapukurqa: Señor, kay rikchanachiy nisqaykiqa ¿ñoqallaykupaqchu icha llapallan runakunapaqwanchu? nispa.

⁴²Chaymi Señorñataq nirqa: ¿Pitaq allin yuyayniyuq hinaspa allin yachayniyuq sirvienteqa? ¿Paytaqa manachum patronninpas wasinpi churaykun, wasinpi kaqkunaman imam horapi mikuchinanpaq?

⁴³Mayna kusisqam chay runaqa kanqa, sichum patronnin kutimuspa chayna ruwachkaqta tariykamuptinqa.

⁴⁴Cheqaptapunim nikichik, patronninqa tukuy kapuqninkunata nanachikunanpaqñam churaykunqa.

⁴⁵Sichum mana allin sirviente kaspa ninman: “Patronniyqa unamunqaraqmi” nispa, hinaspañataq sirvientemasinkunata maqayta qallarispa mikukuyman, upyakuyman hinaspa machakuyman qokurunman,

⁴⁶hinaptinqa mana suyasqan punchawpi, mana yachasqan horapi patronnin kutiramuspanmi chayna runataqa sinchita castigarunqa, hinaspam mana iñiyniyuqkunatawan kuskata condenarunqa.

⁴⁷Patronninpa munasqanta yachachkaspan mana alistakuq hinaspa mana kasukuq sirvienteqa sinchi castigasqam kanqa.

⁴⁸Sichum patronninpa imam munasqanta mana yachasqanrayku imapipas faltakuruq sirvienteqa pisilla castigasqam kanqa. Achkanpi chaskiqtaqa achkanpitaqmi mañanqapas. Achkanpi confiasqa runamantapas achkanpitaqmi mañanqa.

⁴⁹Ñoqaqa ninatam kay pachaman apamurqani, chaynaqa maynatam munayman rupachkanantaña.

⁵⁰Ichaqa hatun ñakariytam pasanay. Maynatam sonqoy llakikun cumplikunankama.

⁵¹¿Creenkichikchu kay pachaman hawkayayta apaspa hamusqayta? Nikichikmi, ñoqaqa rakinakuytam apamurqani.

⁵²Kunanmantaqa huk ayllupim pichqamanta iskayman rakinasqa kanqaku. Kimsam iskaypa contranpi kanqa, iskayñataqmi kimsapa contranpi.

⁵³Taytanmi churinpa contranpi hatarinqa, churinñataqmi taytanpa contranpi. Mamanmi wawanpa contranpi hatarinqa, wawanñataqmi mamanpa contranpi; suegrapas llumchuyninpa contranpi hatarinqa, llumchuyñataqmi suegranpa contranpi, nispa.

⁵⁴Huktawanmi runakunata Jesús nirqa: Intipa seqaykunan lawmanta puyu hatarimuptinmi “paramunqam” ninkichik, hinaptinmi chayna pasakun.

⁵⁵Sur lawmanta wayramuptinñataqmi “rupamunqam” ninkichik, hinaptinmi chayna pasakun.

⁵⁶¡Iskay uyakuna! Qamkunaqa cielopi chaynataq kay pachapi kaqkunata qawaspam imaynam tiempo kananta yachankichik; chaynaqa ¿imanasqataq kunan tiempokunapi imakunam pasakusqanmantaqa mana yachankichikchu?

⁵⁷Kikillaykichikqa ¿manachu allin arregloman hina imatapas allichawaqchik?

⁵⁸Pipas quejakususpayki juezkunaman apasuptikiqa ñanllapiraqyá allinyanakuruy, yanqañataqmi juezqa guardiaman hapiykachisunkiman, guardiañataq carcelpi wichqarusunkiman.

⁵⁹Nichkaykim, chaymantaqa debekusqaykita pasaypaq paganaykikamam mana lloqsimunkichu, nispa.