Read Biblia Revisión Chuya Qellqa 1992 – Chuya Qellqa 1992 Lucas 15 Bible Online

Lucas 15 - Biblia Revisión Chuya Qellqa 1992 – Chuya Qellqa 1992 bible

Lucas 15

¹Impuesto cobraqkunawan huchasapakunam Jesusta uyarinankupaq asuykurqaku.

²Chaymi fariseokunawan Diospa leynin yachachiqkuna rimakachaspanku nirqaku: Kay runaqa huchasapakunawanmi hukllawakun hinaspam paykunawan mikun, nispanku.

³Hinaptinmi Jesusñataq kay rikchanachiyta nirqa:

⁴¿Mayqannikichiktaq qamkunamanta pachak ovejanmanta huknin chinkaruptin isqon chunka isqonniyuqta purunpi saqeykuspa, chay chinkaq ovejata tarimunankama mana maskamunmanchu?

⁵Tariramuspanñataqmi kusisqallaña hombrorikamunqa.

⁶Hinaspam wasinman chayaramuspan amistadninkunatawan vecinonkunata huñuruspan ninqa: “Ñoqawan kusikusunchik, chinkasqa ovejaytam tariramuni”, nispa.

⁷Nikichikmi, chayna hatun kusikuymi kanqa hanaq pachapipas, huk huchasapa runa wanakuspa Diosman kutirikamuptinqa, isqon chunka isqonniyuq mana huchayuq runakunamantaqa, paykunaqa manañam imamantapas wanakunankupaq kanñachu.

⁸¿Ima warmitaq chunka qollqenmanta huknin chinkaruptin achkitapas rataykachisparaq wasinta pichaspan tarirunankama mana maskanmanchu?

⁹Tariruspanqa amistadninkunatawan vecinankunata huñuykuspan ninqa: “Hamuychik ñoqawan kusikusunchik, chinkarachisqay qollqetam tariruni”, nispa.

¹⁰Chaynaqa, nikichikmi, chaynatam Diospa angelninkunapas kusikun huk huchasapa runa wanakuruptinqa, nispa.

¹¹Jesusqa nirqataqmi: Huk runapam iskay churinkuna karqa.

¹²Sullka kaqmi taytanta nirqa: “Taytáy, tupawaqniytayá qoykuwayña”, nispa. Chaymi taytanñataq iskaynin churinkunaman qoykarirqa.

¹³Chaymanta as punchawllamanmi sullka kaq churinqa lliw kapuqninta rantikuruspan karu llaqtaman ripukurqa, hinaspanmi mana allin kawsayman qokuruspan qollqenta tukururqa.

¹⁴Maypacham tukuy kapuqninta tukuruptinmi, chay kasqan llaqtaman hatun muchuy chayaramurqa. Chaymi yarqaymanta kaspan,

¹⁵llamkayta maskaspan chay llaqtapi huk runaman asuykurqa, hinaptinmi chay runañataq kuchinta michimunanpaq haciendanman kacharqa.

¹⁶Yarqaymanta kaspanmi kuchikunapa mikusqan algarrobotaña mikuykuyta munarqa, ichaqa manam pipas qoykurqachu.

¹⁷Huk punchawmi yuyaymanaspan nirqa: “Taytaypa wasinpi llamkaqkunaqa allin mikusqam kachkanku, ñoqañataqmi kaypi yarqaymanta wañuruchkaniña.

¹⁸Chaynaqa, kutispayá taytayta nimusaq: Taytáy, Diospa contranpiwan qampa contraykipim huchallikuruni.

¹⁹Manañam churiymi niwanaykipaq hinañachu kani, hukkaqnin llamkapusuqnikita hinallañayá chaskiykullaway nispay”.

²⁰Hinaspanmi hatarispan taytanpa kasqanman kutirqa. Taytanñataqmi karullataraq hamuchkaqta rikuruspan sinchita paymanta llakirikuspan chaskiqnin kallparqa, hinaspam muchaykuspan abrazaykurqa.

²¹Churinñataqmi nirqa: “Taytáy, Diospa contranpiwan qampa contraykipim huchallikuruni. Manañam churiymi niwanaykipaq hinañachu kallani”, nispa.

²²Taytanñataqmi serviqninkunata kamachirqa: “Allinnin pachawan chaylla pachachiychik, dedonmanpas anillota churaspa usutaykachiychik.

²³Wiran malta torota pusamuspa nakaychik, kusikuymanta fiestata ruwaspa mikunanchikpaq.

²⁴Kay churiyqa wañusqañam karqa, kunanmi ichaqa kawsariramun; chinkasqam karqa, kunanmi ichaqa tarisqaña”, nispa. Chaymi kusikuyllawanña fiesta ruwayta qallaykurqaku.

²⁵Mayor churinñataqmi chakrapi kasqanmanta wasipa hichpantaña kutimuchkaspan takisqankutawan tususqankuta uyarirurqa.

²⁶Chaymi hukkaqnin serviqninta qayaykuspan imaynampim chayna kasqanta tapurqa.

²⁷Hinaptinmi chay serviqninñataq nirqa: “Wawqekim kutiramun, chaymi taytayki sanollata hinaspa allinllata chaskiykusqanmanta wiran malta torota nakarachispan fiestata ruwachichkan”, nispa.

²⁸Chaymi llumpayta piñakuspan mana yaykuyta munarqachu. Hinaptinmi taytanña lloqsiykuspan yaykunanpaq ruegarqa.

²⁹Ichaqa paymi taytanta nirqa: “Qamqa yachankim tukuypi kasukusqayta chaynataq kaychika wata servisqaytapas, aswanqa manam cabrachallatapas qoykuwarqankichu chaynapi amistadniykunawan kusikunaypaq.

³⁰Qosqayki kapuqnikikunata, chuchumika warmikunawan tukuruspa kutiykaramuq churikipaqñataqmi wiran malta torotaraq nakarachipunki”, nispa.

³¹Taytanñataqmi nirqa: “Churilláy, qamqa tukuy tiempom ñoqawan kachkanki, tukuy imaypas qampam.

³²Chaynaqa, ¿Imanasqataq kay wawqeki kutiramusqanmantaqa mana fiestata ruwaspa kusikuchwanchu? Kay wawqekiqa wañusqam karqa, kunanmi ichaqa kawsariramun; chinkasqam karqa, kunanmi ichaqa tarisqaña”, nispa.