Read Biblia Revisión Chuya Qellqa 1992 – Chuya Qellqa 1992 Lucas 17 Bible Online

Lucas 17 - Biblia Revisión Chuya Qellqa 1992 – Chuya Qellqa 1992 bible

Lucas 17

¹Discipulonkunatam Jesús nirqa: Runapa huchaman aysaqninqa kanqapunim. Ichaqa ¡imaynaraq kanqa runamasinta huchaman urmachiq runaqa!

²Ñoqapi iñiq taksakunamanta hukninta pipas huchallichiqtaqa, allinchá kanman molino rumita kunkanman wataruspa lamar qochaman wischuykuyninkuqa.

³Chaynaqa, cuidakuychikyá. Sichum runamasiki imapipas pantarusuptikiqa qaqchaykuyá. Huchanta reqsikuptinqa pampachaykuyá.

⁴Sichum huk punchawpi qanchis kutikama pantarusunkiman hinaspa pampachaykunaykipaq qanchis kutikama hamuptinqa, pampachaykuyá, nispa.

⁵Apostolninkunam Señorta mañakurqaku: Iñiytayá yapaykuwayku, nispanku.

⁶Chaymi Señorñataq nirqa: Mostazapa muhun hinallapas iñiynikichik kaptinqa kay purun higos sachatam niwaqchik: “Sapikimanta chutakuspa lamar qochapiña sapichakamuy” nispa, hinaptinqa kasusunkichikmanmi.

⁷¿Yaqachu yapusqanmanta otaq animal michimusqanmanta sirvientekichik kutiramuptin niwaqchik: “Mesapi tiyaykuspa mikumuy” nispaykichik?

⁸Manam, aswanqa niwaqchikmi: “Cenayta ruwaspa servimuway, mikuruptiy tomaruptiyñam qampas mikunki hinaspa tomanki”, nispaykichik.

⁹Manataqmi kamachisqaykichik ruwasqanmantaqa chay serviqnikichikmanqa graciastapas qonkichikchu.

¹⁰Chaynayá qamkunapas, tukuy kamachisusqaykichikta ruwaruspaqa kaynata niychik: “Mana imapaq valeq sirvientekunam kanchik, kamachiwasqallanchiktam ruwarunchik”, nispaykichik.

¹¹Jesusmi Jerusalenman rispan, Galileanta hinaspa Samarianta pasarqa.

¹²Huk llaqtaman chayaruptinmi leprawan onqoq chunka runakuna taripaykurqaku. Paykunam karullamanta,

¹³kaynata qayakurqaku: ¡Yachachikuq, Jesús, kuyapayariykullawayku! nispanku.

¹⁴Jesusñataqmi paykunata qawarispan nirqa: Rispaykichik sacerdotekunawan qawachikamuychik, nispa. Chaymi richkaspanku sanoyarurqaku.

¹⁵Hinaptinmi paykunamanta hukninku, allinyarusqantaña qawakuykuspan qaparillawanña Diosta yupaychastin kutirirqa.

¹⁶Hinaspam graciasta qospan Jesuspa ñawpaqninpi qonqorakuykurqa. Payqa karqa Samaria lawmanta kaqmi.

¹⁷Jesusñataqmi tapurqa: ¿Manachum chunka sanoyarqankichikqa? ¿Maytaq wakin isqonqa?

¹⁸¿Kay huklaw llaqtayuq runallachum Diosta yupaychananpaq kutiramun? nispa.

¹⁹Chaynata niruspanmi chay runata nirqa: Hatarispayki pasakuy, iñiynikim sanoyarachisunki, nispa.

²⁰Haykapim Diospa munaychakuynin hamunanmanta fariseokuna tapuptinmi, Jesusñataq nirqa: Diospa munaychakuyninqa mana pipapas yachasqallantam hamunqa.

²¹Manam ninqakuchu: “Kaypim kachkan” otaq “wakpim kachkan” nispankuqa. Diospa munaychakuyninqa ñam qamkuna ukupiña kachkan, nispa.

²²Discipulonkunatapas nirqataqmi: Chayamunqam punchaw runapa Churinpa hukkaqnin punchawninta rikuykuy munanaykichikpaq, ichaqa manam rikunkichikchu.

²³Nisunkichikmi: “Kaypim kachkan” otaq “wakpim kachkan”, nispa; ichaqa amam rinkichikchu amataqmi qatinkichikchu.

²⁴Imaynam llipyay tukuy hinastinman kancharin, chaynam runapa Churinpa punchawninpas kanqa.

²⁵Ichaqa puntatam llumpayta ñakarinan, hinaspam kay miraykunapa wischupakusqan kanan.

²⁶Imaynam Noeypa tiemponpi karqa, chaynam runapa Churin kutimuptinpas kanqa.

²⁷Llapa runakunam mikukuypi, upyakuypi, casarakuypi hinaspa casarachinakuypi kakuchkarqaku, arcaman Noé yaykunankama, chaymi sinchi para chayaramuspan lliwta chinkarachirqa.

²⁸Lotpa punchawninkunapipas chaynam pasakurqa. Runakunam mikukuypi, upyakuypi, rantikuypi, tarpukuypi, wasikuna ruwakuypi kakuchkarqaku.

²⁹Ichaqa Sodoma llaqtamanta Lot lloqsiruptinmi, azufreyuq nina para chayaramuspan llapa runata chinkarachirqa.

³⁰Chaynapunim kanqa runapa Churin rikuriykamuptinpas.

³¹Chay punchawpiqa, wasipa hawanpi kaqpas amañayá uraykamuchunchu imanpas hurqoqqa. Chakrapi kaqpas amañayá wasinmanqa kutichunñachu.

³²Lotpa warminmantayá yuyariychik.

³³Pipas vidanta waqaychay munaqqa chinkarachinqam, pipas vidanta chinkarachiqmi ichaqa kawsanqa.

³⁴Nikichikmi, chay tutam iskay runakuna camapi kachkanqaku, hukninmi apasqa kanqa, hukninñataqmi saqesqa.

³⁵Iskay warmikunam kutakuchkanqaku. Hukninmi apasqa kanqa, hukninñataqmi saqesqa.

³⁶[3][Iskay runakunam chakrapi kachkanqaku, hukninmi apasqa kanqa hukninñataqmi saqesqa kanqa], nispa.

³⁷Chaymi Jesusta tapurqaku: Señor ¿maypitaq chaykuna pasakunqa? nispanku. Hinaptinmi Jesusñataq nirqa: Maypim ayapa kasqanpim ullachkukuna huñunakunqaku, nispa.