Read Biblia Revisión Chuya Qellqa 1992 – Chuya Qellqa 1992 Lucas 22 Bible Online

Lucas 22 - Biblia Revisión Chuya Qellqa 1992 – Chuya Qellqa 1992 bible

Lucas 22

¹Mana levadurayuq tantata mikunanku fiestam otaq Pascua fiestam hichpamuchkarqaña.

²Sacerdotekunapa kamachiqninkunawan Diospa leynin yachachiqkunañataqmi, runakunata manchakusqankurayku, mana pipa yachasqallanta Jesusta imaynam wañurachiyta maskarqaku.

³Chunka iskayniyuq discipulonkunapa hukninmi karqa Iscariotewan sutichasqanku Judas, paymanmi Satanás yaykururqa,

⁴hinaptinmi sacerdotekunapa kamachiqninkunaman hinaspa templopi guardiakunapa capitanninkunaman rirqa, Jesusta imaynam entregananmanta rimaq.

⁵Chaymi paykunañataq kusikuspanku qollqeta paganankupaq prometekurqaku.

⁶Judasñataqmi “allinmi” nispan, runakunapa mana yachasqallanta, imaynam entregaykuyta maskarqa.

⁷Mana levadurayuq tanta mikunanku fiestam chayaramurqa, chay punchawpim Pascua carnerota wañuchiqku.

⁸Jesusñataqmi Pedrotawan Juanta kacharqa Pascua mikuyta ruwamunankupaq.

⁹Paykunañataqmi tapurqaku: ¿Maypitaq ruwamunaykuta munanki? nispanku.

¹⁰Chaymi Jesusñataq nirqa: Llaqtaman yaykuspaykichikmi puyñupi yaku apachkaq runawan tupankichik, paytam yaykusqan wasikama qatinkichik.

¹¹Hinaspam wasiyuqta ninkichik: “Yachachikuqmi nimusunki: ¿Mayqan cuartopitaq Pascua mikuyta discipuloykunawan mikusaq? nispa”.

¹²Payñataqmi hatun cuartota allichasqataña wasipa altosninpi qawachisunkichik, chaypiyá allichamuychik, nispa.

¹³Rispankum Jesuspa nisqanman hina tariykurqaku, hinaspam Pascua mikuyta ruwarqaku.

¹⁴Hora chayaramuptinmi apostolninkunawan kuska mesaman tiyaykurqaku.

¹⁵Jesusñataqmi paykunata nirqa: Maynatam munarqani manaraq wañuruchkaspay qamkunawan kuska kay Pascua carnero mikuykuyta.

¹⁶Nikichikmi: Manañam mastaqa mikusaqñachu Diospa munaychakuyninpi huktawan mikunanchikkama, nispa.

¹⁷Vinoyuq vasota hapiykuspanmi Diosman graciasta qoykuspan nirqa: Kay vasomantayá sapakama aypunakuychik.

¹⁸Nikichikmi, manañam vinotaqa tomasaqñachu Diospa munaychakuynin hamunankama, nispa.

¹⁹Chaymantam Tantata hapiykuspan Diosman graciasta qorqa, hinaspam parteykarispan nirqa: Kaymi cuerpoy qamkunarayku entregasqa. Kaytam qamkunapas ruwankichik ñoqata yuyariwanaykichikpaq, nispa.

²⁰ Cenayta tukuruspanmi vinoyuq vasota hapiykuspan nirqa: Kay vasom yawarniywan ruwasqa musoq pacto, chaymi qamkunarayku chaqchusqa kanqa.

²¹Traicionawaqniy runam ñoqawan kuska kay mesapi tiyachkan.

²²Runapa Churinqa Diospa nisqanman hinam wañunqa, ichaqa ¡ay, imaynaraq kanqa traicionawaqniy runaqa! nispa.

²³Apostolninkunañataqmi tapunakuyta qallaykurqaku: ¿Mayqanninchiktaq chayta ruwachwan? nispanku.

²⁴Discipulonkunam atipanakurqaku mayqanninkum puntapi kanankumanta.

²⁵Hinaptinmi Jesusñataq nirqa: Reykunaqa munaychakusqan nacionkunapim runankunata ñakarichin, kamachikuqkunañataqmi runakunapi munaychakunku, hinaptinmi munaychakusqan runakunañataq allin ruwaqpaq hapinku.

²⁶Qamkunaqa manam chaynachu kanaykichik. Aswanraqmi qamkunamanta pipas puntapi kayta munaspaqa warma hina kanan, kamachikuqñataqmi servikuq kanan.

²⁷Mayqantaq mayor ¿mesapi tiyaqchu icha mesaman serviqchu? Cheqaptapunipas mesapi tiyaqmi. Chaywanpas ñoqaqa qamkunatam servichkaykichik.

²⁸Qamkunapas ñoqawantaqmi sasachakuypi kaptiypas karqankichik.

²⁹Chayraykum, imaynam Taytay munaychakuq kanaypaq churawasqanta hina qamkunatapas munaychakuq kanaykichikpaq churaykichik,

³⁰chaynapi qamkunapas munaychakuyniypi ñoqawan kuska mikunaykichikpaq hinaspa tomanaykichikpaq; qamkunam tronokunapi tiyaykuspa Israelpi chunka iskayniyuq ayllukunata juzgankichik, nispa.

³¹Señorqa nirqataqmi: Simón, Simón, Satanasmi mañakurun trigota hina suysusunaykichikpaq,

³²ichaqa ñoqam qampaq mañakuruni, chaynapi iñiyniki mana pisinanpaq. Qamñataqmi ñoqaman kutirimuspayki iñiqmasikikunata kallpanchanki, nispa.

³³Pedroñataqmi nirqa: Señor, ñoqaqa chayllam kachkani qanwan kuska carcelman rinaypaq chaynataq qanwan kuska wañunaypaqpas, nispa.

³⁴Hinaptinmi Jesusñataq nirqa: Pedro, kunanpunim manaraqpas utulu waqamuchkaptin reqsiwasqaykita kimsa kutikama negawanki, nispa.

³⁵Chaymantam llapankuta Jesús tapurqa: Mana qollqeyuqta, mana wayqayuqta hinaspa mana usutayuqta kachaptiyqa ¿imapas pisisurqankichikchu? nispa. Chaymi paykunañataq nirqaku: Manam, nispanku.

³⁶Hinaptinmi Jesusñataq nirqa: Kunanyá ichaqa qollqekichikpas chaynataq wayqaykichikpas kaptinqa apaychik. Espadaykichik mana kaptinqa capaykichikta rantikuspayá rantiychik.

³⁷Nikichikmi, Qellqapa nisqanmi ñoqapi cumplikunan, chaypim nin: “Mana allin runakunawan yupasqam karqa”, nispa. Ñoqamanta qellqasqa kaqkunaqa cumplikunanpunim, nispa.

³⁸Chaymi paykunañataq nirqaku: Señor, kayqaya iskay espada kachkan, nispanku. Jesusñataqmi nirqa: ¡Hinaña kachun amaña mastaqa rimasunchu! nispa.

³⁹Chaymanta lloqsiruspanmi, costumbrenman hina Olivos moqoman pasakurqa, hinaptinmi discipulonkunapas paywan rirqaku.

⁴⁰Chayaruspanmi discipulonkunata nirqa: Diosta mañakuychik tentacionman ama wichinaykichikpaq, nispa.

⁴¹Hinaspam paykunamanta karuniqman asurispan chaypi qonqorakuykurqa, hinaspam Diosta kaynata mañakurqa:

⁴²Taytáy, munaspaykiqa kay ñakariymantayá libraykuway, ichaqa amayá ñoqapa munasqaychu kachun, aswanqa qampa munasqaykiyá, nispa.

⁴³[4][Hinaptinmi hanaq pachamanta huk ángel rikuriykamurqa kallpanchananpaq.

⁴⁴Payñataqmi llumpay llakisqallaña tukuy kallpanwan Diosta mañakurqa, chaymi sudorninpas yawar hinaraq pampaman suturqa].

⁴⁵Diosta mañakusqanmanta hatarispanmi, discipulonkunaman asuykuspan tariykurqa llakiwan inturachikuspanku puñuchkaqta.

⁴⁶Chaymi paykunata nirqa: ¿Imanasqataq puñuchkankichik? Hatariychik, Diosta mañakuychik tentacionman ama wichinaykichikpaq, nispa.

⁴⁷Chaynata Jesús rimachkaptinmi, Judaspa pusasqan achkallaña runakuna chayaramurqaku. Judasqa chunka iskayniyuq discipulonkunapa hukninmi karqa. Paymi muchaykunanpaq Jesusman asuykurqa,

⁴⁸chaymi Jesusñataq nirqa: ¿Judas, muchaykuspachu runapa Churinta traicionarunki? nispa.

⁴⁹Chaykuna pasakusqanta qawaspankum discipulonkuna nirqaku: Señor ¿munankichu espadawan hatarimunaykuta? nispanku.

⁵⁰Chaymi huknin discipulon, espadata hapiykuspan sumo sacerdotepa serviqninpa alleq rinrinta qorururqa. Hinaptinmi Jesusñataq nirqa:

⁵¹Ama imanaychikchu, nispan. Chaynata niruspanmi chay runapa rinrinta llapchaykuspan sanoyarachirqa.

⁵²Chaymantam sacerdotekunapa, templopi guardiakunapa hinaspa judiokunapa kamachiqninkunata nirqa: ¿Suwamanpas hinachu espadayuq hinaspa kaspiyuq hamurqankichik?

⁵³Ñoqaqa sapa punchawmi qamkunawan templopi karqani, ichaqa manam presochawarqankichikchu. Ñam qamkunapa ruwanaykichik horaña, kunanqa tutayaypi kamachikuqñam munaychakuchkan, nispa.

⁵⁴Jesustam presocharuspanku sumo sacerdotepa wasinman pusarurqaku. Pedroñataqmi karu qepallanta qatirqa.

⁵⁵Chaypim patiopa chawpinpi ninata ratachispanku tiyaykuptinku, Pedropas paykunawan kuska tiyaykurqa.

⁵⁶Hinaptinmi huk criadañataq Pedrota ninapa waqtanpi tiyachkaqta rikuruspan nirqa: Kay runapas Jesuspa puriqmasinmi, nispa.

⁵⁷Chaymi Pedroñataq negakuspan nirqa: ¡Yaw warmi, manam reqsinichu! nispa.

⁵⁸Tumpa unaymantam hukpas rikuruspan nirqa: Qampas paykunamanta kaqmi kanki, nispa. Hinaptinmi Pedroñataq nirqa: Ñoqaqa manam paykunamanta kaqchu kani, nispa.

⁵⁹Huk hora qepatam, hukpas uyanpi niykurqa: Cheqaptapunim kay runapas Jesuswan purirqa, Galilea llaqtayuqmi kanpas, nispa.

⁶⁰Chaymi Pedroñataq nirqa: Yaw runa, imatachá rimakunkipas, nispa. Chaynata rimachkaptinmi utulu waqaramurqa.

⁶¹Chaymi Jesusñataq muyuriykuspan Pedrota qawariykurqa, Pedroñataqmi Señorpa kayna nisqanta yuyarirurqa, paymi nirqa: “Kunanpunim manaraqpas utulu waqachkaptin reqsiwasqaykita kimsa kutikama negawanki” nispa.

⁶²Chaymi hawaman lloqsiruspan aminankama waqakurqa.

⁶³Jesusta cuidaq runakunam paymanta burlakuspanku maqarqaku.

⁶⁴Ñawintapas wataruspankum uyanpi takaspanku nirqaku: Niykuwayku ¿pitaq takasuchkanki? nispanku.

⁶⁵Chaymi tukuy imata nispanku kamirqaku.

⁶⁶Achikyaramuptinmi, ancianokunawan sacerdotekunapa kamachiqninkuna hinaspa Diospa leynin yachachiqkuna huñunakuruspanku Jesusta corteman aparqaku. Chaypim payta tapurqaku:

⁶⁷Niykuwayku ¿qamchu Cristo kachkanki? nispanku. Chaymi Jesusñataq nirqa: Sichum “ñoqam kani” niptiyqa manam creewankichikmanchu,

⁶⁸qamkunata tapuptiypas manataqmi contestawankichikmanchu.

⁶⁹Ichaqa kunanmantam runapa Churinqa Tukuy Atiyniyuq Diospa alleqninpi tiyaykunqa, nispa.

⁷⁰Chaymi llapallanku nirqaku: Chaynaqa, ¿Diospa Churinchu kachkanki? nispanku. Hinaptinmi Jesusñataq nirqa: Qamkunam ninkichik ñoqa kasqayta, nispa.

⁷¹Chaymi paykunañataq nirqaku: ¿Imapaqñataq testigotapas munachwan? Kayqaya kikinpa siminmantapunim uyariykunchik, nispanku.