Read Biblia Revisión Chuya Qellqa 1992 – Chuya Qellqa 1992 Lucas 24 Bible Online

Lucas 24 - Biblia Revisión Chuya Qellqa 1992 – Chuya Qellqa 1992 bible

Lucas 24

¹Chay warmikunam domingo tutapayta sepulturaman rirqaku, perfumekunatawan miski asnaq pomadakuna preparasqankuta aparikuspanku.

²Chayaruspankum sepultura wichqasqanku rumita asuchisqataña tarirurqaku;

³chaymi yaykuruspanku Señor Jesuspa cuerpontaqa manaña tarirqakuchu.

⁴Chaywan mancharisqallaña kachkaptinkum, qonqayllamanta kancharichkaq pachayuq iskay runakuna waqtankupi rikuriykurqa.

⁵Chaymi manchakuymanta pampakama kumuykuspanku kaynata nirqaku: ¿Imanasqataq kawsaqta wañusqakuna ukupi maskachkankichik?

⁶Payqa manam kaypiñachu, aswanqa kawsarirunmi, nispanku. Yuyariychikyá Galileapi kachkaspan,

⁷“Runapa Churintaqa huchasapakunaman qoykuptinkum chakatasqa kanqa, ichaqa kimsa punchawmantam kawsarimunqa”, nisusqaykichikta.

⁸Hinaptinmi paykunaqa Jesuspa nisqanta chayraq yuyarirurqaku.

⁹Chaymi sepulturamanta kutiruspanku, tukuy chaykunata chunka hukniyuq apostolkunamanwan wakinkunaman willarqaku.

¹⁰Chay willakuqkunam karqaku Magdala llaqtayuq María, Juana, Jacobopa maman María hinaspa wakin warmikuna.

¹¹Chay willakusqankutam llapa apostolkuna cuentopaq hapispanku mana creerqakuchu.

¹²Pedrom ichaqa hatarispan sepulturaman kallparqa, chaymi sepulturata qawaykuspan sabanasllataña tariykurqa, hinaspam chayta qawaykuspan admirasqallaña wasinman kutirirqa.

¹³Chay punchawllapim iskay discipulonkuna Emaús llaqtaman richkarqaku. Chay llaqtaqa kachkan Jerusalenmanta yaqa chunka hukniyuq kilómetro masninpim.

¹⁴Paykunam tukuy ima pasakusqanmanta rimastin richkarqaku.

¹⁵Chaykunata rimastin richkaptinkum, kikin Jesús asuykuspan paykunawan rirqa.

¹⁶Ichaqa rikuchkaspankupas manam pay kasqanpaqqa hapirqakuchu.

¹⁷Jesusñataqmi paykunata tapurqa: ¿Imamanta atipanakustintaq richkankichik? nispa. Chaymi paykunañataq llakisqallaña sayarurqaku.

¹⁸Hinaptinmi paykunamanta huknin, Cleofas sutiyuq nirqa: ¿Qamllachu Jerusalenpi samapakuqkunamanta chay llaqtapi imakunam kay punchawkunapi pasakusqanmanta mana imatapas yachaq kachkanki? nispan.

¹⁹Chaymi Jesusñataq nirqa: ¿Imataq pasakururqa? nispa. Hinaptinmi paykunañataq nirqaku: Rimachkanikuqa Nazaret llaqtayuq Jesusmantam. Payqa karqa profetam hinaspa Diospa qayllanpipas chaynataq runakunapa qayllanpipas atiywan rimaspa imatapas ruwaqmi.

²⁰Ichaqa sacerdotekunapa kamachiqninkunawan llapa kamachiqninchikkunam chakataspa wañuchinankupaq hapichirqaku.

²¹Ñoqaykuqa piensarqaniku Israel nacionpa libraqnin kasqantam, ichaqa kimsa punchawñam wañukun.

²²Chaywanpas ñoqaykuwan kaq warmikunam mancharirachiwanku, paykunam tutapayta sepulturanman rirqaku,

²³hinaspam cuerponta mana tarimuspanku wasiman kutiramuspa willakurqaku, iskay angelkuna rikuriykuspa “Jesusqa kawsarirunmi”, nispa nimusqankuta.

²⁴Chaymi ñoqaykuwan kaqkunamanta wakiqniyku sepulturaman rispanku warmikunapa nisqankuman hina tariykamurqaku, Jesustam ichaqa mana rikumurqakuchu, nispanku.

²⁵Chaymi Jesusñataq paykunata nirqa: Mana yuyayniyuq runakuna, qamkunaqa profetakunapa willakusqantapas sasallaña creeqmi kankichik.

²⁶¿Manachum Cristoqa hanaq pachaman kutinanpaqqa tukuy chaykunata ñakarinan karqa? nispan.

²⁷Hinaspam Moisespa qellqasqanmanta qallarispa profetakunapa qellqasqankama, paymanta llapallan Qellqapa nisqanta paykunaman entiendechirqa.

²⁸Emaús llaqtaman chayaruptinkum Jesusqa karuman richkaq hina ñanman churakuykurqa.

²⁹Hinaptinmi paykunañataq harkaspanku nirqaku: Tutaykamuchkanñam, kayllapiña samapakusunchik, nispanku. Chaymi Jesusqa paykunawan samakunanpaq yaykurqa.

³⁰Mesaman tiyaykuptinkum, tantata hapiykuspan Diosman graciasta qorqa, hinaspanmi pakiykuspan qoykarirqa.

³¹Hinaptinmi chay ratollapi ñawinku kicharikuruptin Jesús kasqanta reqsirurqaku. Paymi ichaqa chinkarurqa.

³²Paykunañataqmi kaynata ninakurqaku: ¿Manachum sonqonchikpas ruparirqaraq ñanpi rimapayawaspanchik Qellqapa imam nisqanta entiendechiwaptinchik? nispanku.

³³Hinaspankum chay ratollapi Jerusalén llaqtaman kutirirqaku, chaypim chunka hukniyuq discipulokunatawan paykunawan kaqkunata huñunasqata tariykurqaku.

³⁴Paykunam ninakuchkasqaku: Cheqaptapunim Señorqa kawsarirusqa. Pedromanpas rikuriykunñam, nispanku.

³⁵Hinaptinmi Emaús llaqtamanta kutiqkunapas, ñanpi imam pasakusqanmanta hinaspa mesapi tantata pakiptin reqsirusqankumanta willakurqaku.

³⁶Chaykunamanta rimachkaptinkum Jesusqa chawpinkupi rikuriykuspan nirqa: Hawkayay qamkunawan kachun, nispa.

³⁷Hinaptinmi paykunañataq mancharikurqaku anima kasqanta piensaspanku.

³⁸Chaymi Jesusñataq nirqa: ¿Imanasqataq mancharisqallaña kachkankichik? ¿Imanasqataq sonqoykichikpi iskayrayachkankichik?

³⁹Makiykunatawan chakiykunata qawaychik. Ñoqam kani, qawaykuwaspa llapchaykuwaychik. Animaqa mana aychayuq hinaspa mana tulluyuqmi, ñoqam ichaqa aychayuq hinaspa tulluyuq kachkani, nispan.

⁴⁰Chaynata niruspanmi makinkunatawan chakinkunata paykunaman qawaykachirqa.

⁴¹Paykunam ichaqa, admirasqa chaynataq kusikuypa huntasqan kaspanku imam rikusqankupi mana creerqakuchu, chaymi Jesusñataq paykunata tapurqa: ¿Kachkanchu imallaykichikpas mikuykunaypaq? nispa.

⁴²Hinaptinmi kankasqa parten challwata qoykuptinku,

⁴³hapiykuspan paykunapa qayllanpi mikurqa.

⁴⁴Chaymantam paykunata nirqa: Kaykuna pasakunanmantaqa qamkunawan kachkaspayraqmi willarqaykichikña: Moisespa qellqasqan kamachikuykunapi, profetakunapa qellqasqanpi hinaspa Salmokunapi ñoqamanta qellqasqa kaqkunaqa cumplikunanpunim, nispay.

⁴⁵Chaynata niruspanmi yuyayninkuta kichaykurqa Qellqapa nisqanta entiendenankupaq.

⁴⁶Hinaspanmi paykunata Jesús nirqa: Qellqasqam kachkan Cristoqa ñakarispa wañunanmanta hinaspa kimsa punchawman kawsarimunanmanta,

⁴⁷chaynapi Jerusalenmanta qallaykuspa lliw nacionkunapi paypa sutinpi willakuptinku, runakuna huchankumanta wanakuspa pampachasqa kanankupaq.

⁴⁸Chaynaqa, qamkunam kaykuna rikusqaykichikmanta testigo kankichik.

⁴⁹Qamkunamanmi Taytaypa prometesusqaykichikta kachamusaq, chaykamayá kay Jerusalén llaqtallapi suyaykuychik, hanaq pachamanta hamuq atiywan pachallisqa kanaykichikkama, nispa.

⁵⁰Chaymantam paykunata Betania llaqtakama pusarqa. Chaypim makinkunata hoqariykuspan paykunata bendeciykurqa.

⁵¹Bendecichkaspanmi paykunamanta rakikuykuspan hanaq pachaman hoqarisqa karqa.

⁵²Paykunañataqmi hatunchasqankumanta ancha kusisqallaña Jerusalenman kutimurqaku.

⁵³Hinaspankum templopi tukuy tiempo kaspanku Diosta yupaycharqaku.