Read Biblia Revisión Chuya Qellqa 1992 – Chuya Qellqa 1992 Lucas 8 Bible Online

Lucas 8 - Biblia Revisión Chuya Qellqa 1992 – Chuya Qellqa 1992 bible

Lucas 8

¹Chaykunapa qepantam, Jesusqa achka llaqtakunapi hinaspa taksa llaqtakunapipas Diospa munaychakuyninmanta allin noticiata willakustin purirqa. Chunka iskayniyuq discipulonkunapas paywanmi rirqaku.

²Rirqakutaqmi demoniopa huntasqanmanta chaynataq tukuy rikchaq onqoykunamanta sanoyachisqan warmikunapas. Paykunamantam karqa Magdala llaqtayuq María, paymantam qanchis demoniokunata qarqorurqa;

³Herodespa mayordomon Chuzapa warmin Juana hinaspa Susana; chaynallataq kapuqninkuwan yanapaqnin warmikunapas.

⁴Sapa llaqtakunamantam Jesusta qawaykunankupaq achkallaña runakuna huñunakaramurqaku, chaymi kay rikchanachiyta yachachirqa:

⁵Huk runam tarpukuq lloqsirqa. Muhuta maqcheptinmi ñanman wakin wichiykuptin sarutyarurqaku, chaymi urpikuna mikururqa.

⁶Wakinmi ranraman wichirqa, chaymi wiñaruspan mana yaku kasqanrayku chaylla chakirurqa.

⁷Wakinmi kichka-kichka ukuman wichirqa, chaymi kichkakunawan kuska wiñaramuptin kichkakuna eqoyarachirqa.

⁸Wakinñataqmi allin allpaman wichirqa, chaymi wiñaruspan huk muhullamanta pachakta rururqa. Chaynata nispanmi qapariq hina nirqa: “Haykam uyarikuqkunaqa, uyarichun”, nispa.

⁹Discipulonkunam tapurqaku chay rikchanachiypa imam ninan kasqanmanta,

¹⁰chaymi Jesusñataq nirqa: Qamkunamanqa Diosmi munaychakuyninpi pakasqa kaqkunata yachachisunkichik. Wakin runakunatam ichaqa rikchanachiykunawan yachachini, chaynapi qawakuchkaspapas mana rikunankupaq, uyarichkaspapas mana entiendenankupaq.

¹¹Rikchanachisqaypa imam ninanqa kaymi: Muhuqa Diospa palabranmi.

¹²Ñanman wichiq muhum rikchakun Diospa palabranta uyariq runakunaman, ichaqa diablom hamuruspan sonqonkumanta hurqorun, chaynapi mana creenankupaq hinaspa mana salvakunankupaq.

¹³Ranraman wichiqñataqmi Diospa palabranta uyariykuspa kusikuyllawanña chaskiqkuna, ichaqa manam sapichakunkuchu. Paykunaqa pisi tiempollapaqmi iñinku, chaynapim sasachakuykuna hamuruptin chaylla kutikunku.

¹⁴Kichkakunaman wichiqñataqmi haykam uyariqkuna, paykunaqa allimantam kay pachapi afanakuykunawan, qori-qollqe maskaywan hinaspa aycha kusichiykunawan pamparachikunku, chaynapim mana rurunkuchu.

¹⁵Allin allpaman wichiqkunam ichaqa, Diospa palabranta uyariykuspa cheqap sonqowan chaskikuq runakuna, paykunaqa allinta takyaspankum achkanpi rurunku.

¹⁶Manam pipas mecherotaqa ratachin imawanpas taparunanpaqchu, otaq camapa ukunman churarunanpaqchu, aswanqa patakman churaptin wasiman yaykuqkunata achkinanpaqmi.

¹⁷Pakasqa kaqkunaqa qawachisqam kanqa, upallallamanta rimasqakunapas yachasqam kanqa.

¹⁸Chaynaqa, sumaqtayá uyariychik: Kapuqniyuqmanqa masraqmi qosqa kanqa, aslla kapuqniyuqmantam ichaqa, “kayqa ñoqapam” nisqanpas qechusqa kanqa.

¹⁹Mamanwan wawqenkunam hamururqaku Jesuswan tupaykuyta munaspanku, ichaqa kichkiy-kichkiy runa kasqanraykum paypa kasqankamaqa mana yaykuyta atirqakuchu.

²⁰Chaymi hukkaqninña Jesusman willaykurqa: Mamaykiwan wawqekikunam qanwan tupaykuyta munaspanku hawapi suyasuchkanki, nispa.

²¹Hinaptinmi Jesusñataq nirqa: Mamaywan wawqeykunaqa, Diospa palabranta uyarispa ruwayman churaqkunam, nispa.

²²Huk kutipim, Jesuswan discipulonkuna huk barcaman qespirurqaku, hinaptinmi Jesús nirqa: Waklaw chimpaman hakuchik, nispa.

²³Qochata chimpachkaptinkum Jesús puñururqa, chayllamanmi sinchi wayra lamar qochaman pukumurqa, hinaptinmi yakupas barcaman huntaptin yaqaña chinkaykurqaku.

²⁴Chaymi discipulonkuna Jesusman asuykuspanku rikchachirqaku: ¡Yachachikuq, Yachachikuq, chinkaykuchkanchikñam! nispanku. Payñataqmi puñusqanmanta hatarispan wayratawan qochapa olankunata qaqcharqa, hinaptinmi hawkayarurqa.

²⁵Hinaspanmi discipulonkunata nirqa: ¿Maytaq iñiynikichikqa? nispa. Paykunañataqmi mancharisqallaña hinaspa admirasqallaña kaspanku ninakurqaku: ¿Pitaq kay runaqa wayratapas, yakutapas kamachiptin kasunanpaqqa? nispanku.

²⁶Gadara lawmanmi chayarurqaku, chayqa kachkan Galilea qochapa chimpanpim.

²⁷Barcamanta Jesús lloqsiykuptinmi demonioyuq runa paywan tupaykunanpaq llaqtamanta lloqsimurqa. Payqa unayñam qalalla karqa, wasipipas manaña yachaspanmi panteonllapiña yachakurqa.

²⁸Jesusta rikuykuspanmi qaparirqa, hinaspam ñawpaqninpi qonqorakuykuspan nirqa: Tukuy imapa hawanpi munaychakuq Diospa Churin Jesús ¿imatataq ñoqawan munanki? ¡Ruegakuykim ama ñakarichiwanaykipaq! nispa.

²⁹Chaynataqa qaparirqa paymanta demonio lloqsinanpaq Jesús kamachisqanraykum. Paypiqa unayñam demonio munaychakurqa; chaymi makinkunata, chakinkunata cadenakunawan wataptinkupas tipiparuspan chunniqkunaman demoniopa kallpanchasqan ayqeq.

³⁰Jesusmi payta tapurqa: ¿Imataq sutiki? nispan. Hinaptinmi payñataq nirqa. [2]Legionmi, nispa. Chaynataqa nirqa achkallaña demoniokuna chay runapi kasqanraykum.

³¹Demoniokunam Jesusta ruegakurqaku: Amayá uku pachamanqa wischuykuwaykuchu, nispanku.

³²Achka kuchikunam orqopa waqtanpi mikuchkarqaku. Chaymi demoniokuna Jesusta ruegakurqaku chay kuchikunaman yaykurunankupaq. Jesús “arí” niykuptinmi,

³³demoniokunaqa runamanta lloqsiruspanku kuchikunaman ustururqaku, hinaptinmi chay kuchikunaqa tukuy waqtata kallpaspanku qochaman pawaykuspanku heqeparurqaku.

³⁴Kuchi michiqkunañataqmi chayta rikuruspanku ayqekurqaku hinaspam llaqtakunapiwan chakrakunapi willakurqaku chay pasakusqanmanta.

³⁵Chaymi llapa runakuna ima pasakusqanta qawamunankupaq kallparqaku. Jesuspa kasqanman chayaruspankum, demoniopa huntasqan runataqa allin pachasqataña hinaspa yuyayninman kutisqataña Jesuspa waqtanpi tiyachkaqta tariykurqaku, hinaspam mancharikurqaku.

³⁶Lliw rikuqkunam paykunaman willarqaku demoniokunapa huntasqan runaqa imaynam sanoyachisqa kasqanmanta.

³⁷Chaymi Gadara lawpi runakuna mancharikuspanku Jesusta ruegarqaku, paykunapa kasqanmanta huklawman pasakunanpaq. Hinaptinmi Jesusqa barcaman qespiykuspan pasakurqa.

³⁸Demoniopa huntasqanmanta sanoyaruq runam Jesusta ruegarqa payta qatinanpaq, ichaqa Jesusmi mana munaspan kaynata nispan aviarurqa:

³⁹Wasikiman kutispayki, Diospa qanwan imam ruwasqanmanta willakamuy, nispa. Chaymi pasaspan tukuy hinastin llaqtakunapi Jesuspa hatun kaqkuna paywan ruwasqanmanta willakurqa.

⁴⁰Qochapa waklawninmanta Jesús kutiruptinmi llapa runakuna kusikuyllawanña chaskiykurqaku.

⁴¹Chayllamanmi sinagogapi kamachikuq Jairo hamuruspan Jesuspa ñawpaqninpi qonqorakuykurqa, hinaspanmi wasinman rinanpaq kaynata ruegakurqa:

⁴²Chunka iskayniyuq watanpi kaq sapallan warmi churiymi wañuruchkanña, nispan. Riptinmi Jesusta achkallaña runakuna ñiti-ñiti qatirqaku.

⁴³Chay runakunapa chawpinpim chunka iskayniyuq wataña yawarpakuywan onqoq warmi kachkarqa, tukuy kapuqninkunata rantikuspam medicokunawan hampichikurqa, ichaqa manam mayqanninkupas sanoyachiyta atirqakuchu.

⁴⁴Kay warmim Jesuspa qepanta rispan capanpa patanta llapchaykurqa, hinaspam yawarpakuyninmanta chaylla sanoyarurqa.

⁴⁵Chaymi Jesús tapukurqa: ¿Pitaq llapchaykaramuwan? nispan. Hinaptinmi llapallanku nirqaku: Manam ñoqaykuchu, nispanku. Pedroñataqmi nirqa: Yachachikuq, kaynaña runakunam tanqanakuspa ñitimuchkasunkiqa, nispa.

⁴⁶Hinaptinmi Jesusñataq nirqa: Hukkaqmi llapchaykamuwan musyakurunim ñoqamanta atiy lloqsirusqanta, nispa.

⁴⁷Warmiñataqmi musyarachikusqanta yacharuspan katkatatastin Jesuspa ñawpaqninpi qonqorakuykurqa, hinaspam llapa runapa qayllanpi imaynam llapchaykuspa chaylla allinyarusqanta willakurqa.

⁴⁸Chaymi Jesusñataq nirqa: Churilláy, iñiynikiraykum sanoyarunki, hawkañayá pasakuy, nispa.

⁴⁹Chaynata Jesús nichkaptinmi Jairopa wasinmanta hukkaqnin hamuruspan kaynata willarqa: Churikiqa wañukunñam, yachachikuqtaqa amaña pusayñachu, nispa.

⁵⁰Chayta uyariykuspanmi Jesusñataq nirqa: Ama manchakuychu, iñiy hinalla churikiqa sanoyanqam, nispa.

⁵¹Jairopa wasinman yaykuspanqa manam munarqachu paywan kuska pipas yaykunanta, aswanqa Pedrotawan, Jacobota, Juanta hinaspa warmapa tayta-mamallantam pusaykurqa.

⁵²Llapallanku pitukuykuspa-pitukuykuspa qaparillawanña waqaptinkum Jesús nirqa: Ama waqaychikchu, warmaqa manam wañusqachu kachkan, aswanqa puñuyllam puñuchkan, nispa.

⁵³Ichaqa wañusqaña kasqanta yachaspankum Jesusmanta asikurqaku.

⁵⁴Chaymi Jesusñataq warmata makinmanta aysarispan nirqa: ¡Warma, hatariy! nispa.

⁵⁵Chaymi espiritun kutiykuptin chaylla kawsarirurqa. Hinaptinmi chaypi kaqkunata Jesús kamachirqa mikuyta qomunankupaq.

⁵⁶Tayta-mamanñataqmi admirasqallaña karqaku chaymi Jesusñataq kamachirqa ama pimanpas chayta willakunankupaq.