Read Biblia Revisión Chuya Qellqa 1992 – Chuya Qellqa 1992 Lucas 9 Bible Online

Lucas 9 - Biblia Revisión Chuya Qellqa 1992 – Chuya Qellqa 1992 bible

Lucas 9

¹Chunka iskayniyuq discipulonkunata huñuykuspanmi, demoniokunata qarqomunankupaq hinaspa onqoqkunata sanoyachimunankupaq atiyta qorqa.

²Paykunatam Diospa munaychakuyninmanta willakamunankupaq hinaspa onqoqkunata sanoyachimunankupaq kacharqa.

³Hinaspanmi nirqa: Rispaykichikqa amam apankichikchu tawnatapas, wayqatapas, qoqawtapas, qollqetapas nitaq mudanaykichiktapas.

⁴May wasimanpas yaykuspaqa, chay llaqtamanta lloqsinaykichikkamam chayllapi samapakunkichik.

⁵Sichum may llaqtapipas mana chaskisuptikichikqa chay llaqtanmantam lloqsinkichik, hinaspam usutaykichikpi polvotapas taspinkichik, chaynapim chay runakuna mana kasukuq kasqankuta yachanqaku, nispa.

⁶Chaymi rispanku llapallan llaqtakunapi evangeliota willakuspanku onqoqkunata sanoyachirqaku.

⁷Rey Herodes Antipasmi Jesuspa tukuy ima ruwasqanmanta yacharuspan hukmanyarurqa, wakin runakunapa “Bautizaq Juanmi kawsariramun”, nisqankuwan.

⁸Wakinñataqmi nirqaku: Eliasmi rikuriramun, otaqmi ñawpaq profetakunamanta hukkaqnin kawsariramun, nispanku.

⁹Herodesmi ichaqa nirqa: Juantaqa ñoqam kunkanta qorurachirqani, chaynaqa ¿pitaq kaykuna ruwaqqa kanman? nispa. Chaymi Jesusta rikuykuyta munarqa.

¹⁰Apostolkunam kutiramuspanku tukuy imam ruwamusqankuta willakurqaku. Chaymi Jesusqa paykunallata pusarikuspan Betsaida llaqtaman pasakurqa.

¹¹Runakunañataqmi risqanta yacharuspanku qatirqaku. Chaymi Jesusqa paykunata chaskiykuspan Diospa munaychakuyninmanta yachachirqa, hinaspam onqoqkunatapas sanoyachirqa.

¹²Tardeykuruptinmi chunka iskayniyuq discipulonkuna Jesusman asuykuspanku nirqaku: Runakunata aviayña, llaqtakunaman rispanku samapakamunankupaq hinaspa mikuyta maskanankupaq, kayqa chunniqmi, manam imapas kanchu, nispanku.

¹³Hinaptinmi Jesusñataq nirqa: Qamkunayá mikuykachiychik, nispa. Paykunañataqmi nirqaku: Pichqa tantawan iskay challwallaykum kachkan. ¿Icha rispachu kay runakunapaq mikuyta rantimusaqku? nispanku.

¹⁴Chaypiqa yaqa pichqa waranqa qarikunam kachkarqaku. Chaymi discipulonkunata kamachirqa llapa runakunata pichqa chunkatakama tiyachinankupaq.

¹⁵Kamachisqanman hinam llapallankuta tiyarachirqaku.

¹⁶Jesusñataqmi pichqa tantakunatawan iskaynin challwakunata hapiykuspan, hanaq pachata qawarispan Diosman graciasta qorqa, hinaspam tantakunata pakiykuspan discipulonkunaman qoykurqa runakunaman aypunankupaq.

¹⁷Llapallankum saksanankukama mikurqaku. Puchuqtapas chunka iskayniyuq canasta huntataraqmi huñururqaku.

¹⁸Huk kutipim, Jesusqa Diosta sapallan mañakuchkarqa, discipulonkunapas paywanmi kachkarqaku. Chaymi paykunata Jesús tapurqa: ¿Pim kasqaytataq llapa runakuna ñoqamanta rimanku? nispa.

¹⁹Chaymi paykunañataq nirqaku: Wakinmi ninku, Bautizaq Juan kasqaykita; wakinñataqmi ninku, Elías kasqaykita; otaqmi ñawpaq profetakunamantam hukkaqnin kawsariramun, nispanku.

²⁰Chaymi Jesusñataq nirqa: Qamkunaqa ¿pim kasqaytataq ninkichik? nispa. Hinaptinmi Pedroñataq nirqa: Qamqa Diosmanta hamuq Cristom kanki, nispa.

²¹Jesusmi ichaqa chay rimasqanmanta ama pimanpas willakunankupaq kamachirqa.

²²Chaymantam discipulonkunata nirqa: Runapa Churinqa llumpaytam ñakarinqa, llapa ancianokunawan sacerdotekunapa kamachiqninkunam hinaspa Diospa leynin yachachiqkunam qepanchaspanku wañuchinqaku, ichaqa kimsa punchawmanmi kawsarimunqa, nispa.

²³Chaymantam llapallankutaña nirqa: Pipas qatiwayta munaspaqa, kikinpa munasqanman hina amaña kawsaspayá cruzninta qepikuykuspa qatiwachun.

²⁴Pipas vidanta salvay munaqqa wañunqam, pipas ñoqarayku wañuqmi ichaqa salvakunqa.

²⁵¿Imatataq runa hurqokunman kay pachapi kaqkunata ganaruspan vidantañataq pierderuspan?

²⁶Pipas ñoqamanta chaynataq palabraykunamanta penqakuqtaqa, runapa Churinpas paymantam penqakunqa, chaynataqa ruwanqa angelninkunawan kuska Taytanpa atiyninpi kutimuspanmi.

²⁷Cheqaptapunim nikichik, kaypi kaqkunamantaqa achkaqmi mana wañunqakuchu Diospa munaychakuyninta rikunankukama, nispa.

²⁸Pusaq punchaw pasaruptinmi Jesusqa, Pedrota, Juanta hinaspa Jacobota pusarikuspan, Diosta mañakamunanpaq orqoman qespirqa.

²⁹Mañakuchkaptinmi rikchaynin tikrakururqa, pachankunapas yuraq-yuraq hinaspa kancharichkaqmi rikurirurqa.

³⁰Hinaptinmi iskay runakuna rikuriykuspan paywan rimarqaku. Paykunaqa karqa Moiseswan Eliasmi.

³¹Paykunam achkiypa chawpinpi rikuriykamuspanku rimarqaku imaynam Jesuspa Jerusalén llaqtapi wañukunanmanta.

³²Pedrowan riqmasinkunañataqmi puñuymanta kachkaspankupas rikcharqaku, hinaspam Jesuspa achkiriynintawan chay iskay runakunata rikurqaku.

³³Chay iskay runakuna Jesusmanta rakikuykunankupaq kachkaptinkum, Pedroñataq Jesusta nirqa: Yachachikuq ¡allinmi kaypi kayninchikqa! Kimsa ramadatayá ruwarusaqku, hukta qampaq, hukta Moisespaq, huktañataq Eliaspaq, nispa.

³⁴Chaynata nichkaptinmi puyu rikuriykamuspan paykunata pampaykurqa, chaymi puyu pampaykuptin llumpayta mancharikurqaku.

³⁵Hinaptinmi puyu ukumanta huk rimay uyarikamurqa: Paymi akllasqay Churiy, payta uyariychik, nispa.

³⁶Chay rimay upallaruptillanmi Jesusqa sapallanña qeparurqa. Chay rikusqankutam llapa discipulonkuna sonqollankupi hatallirqaku, hinaspam chay punchawkunapiqa mana pimanpas willakurqakuchu.

³⁷Orqomanta paqarinnintin punchaw uraykamuptinkum, achka-achka runakuna paykunaman taripaykurqaku.

³⁸Hinaptinmi paykunamanta huk runa lloqsiykuspan kaynata qaparirqa: Yachachikuq, ruegakuykim kay sapallan churiyta qawaykunaykipaq.

³⁹Paytam huk demonio hapiruspan qonqaymanta qaparkachachin, taspispanmi posoqollataña aqtuchin, hinaspanmi ñakarichispan sasa-sasata kacharin.

⁴⁰Discipuloykikunatam qarqonankupaq ruegakurqani, ichaqa manam atirqakuchu, nispan.

⁴¹Chaymi Jesusñataq nirqa: Mana allin ruwaqkunapa miraynin mana iñiyniyuq runakuna ¿haykapikamataq qamkunawan kasaq hinaspa aguantasqaykichik? Chay churikita asuykachimuway, nispa.

⁴²Chaymi warma asuykuchkaptin demonio wikaparuspan wañuy mañawan hapirachirqa. Hinaptinmi Jesusñataq demoniota qaqcharqa, chaymi warma sanoyaruptin taytanman qoykurqa.

⁴³Chayta qawaykuspankum Diospa hatun atiyninmanta llapallan runakuna admirakurqaku. Chay ruwasqankunawan llapallan runakuna admirasqallaña kachkaptinkum, Jesusñataq discipulonkunata nirqa:

⁴⁴Allintayá uyariychik: Runapa Churinqa runakunapa makinman entregasqam kanqa, nispa.

⁴⁵Discipulonkunam ichaqa mana entienderqakuchu, paykunapaqqa pakasqa hina kasqanrayku, manchakurqakutaqmi tapuykuytapas.

⁴⁶Chaynapim discipulonkunaqa mayqanninkum puntapi kanankumanta atipanakurqaku.

⁴⁷Jesusñataqmi paykunapa atipanakusqanta musyaruspan, huk warmachata waqtanpi sayaykachirqa,

⁴⁸hinaspam nirqa: Kay warmachata ñoqapa sutiypi pipas chaskiqqa ñoqatam chaskiwan, pipas ñoqata chaskiwaqniyñataqmi kachamuwaqniyta chaskin. Qamkunamanta mayqannikichikpas taksan kaqmi puntapiqa kanqa, nispan.

⁴⁹Chaymi Juanñataq nirqa: Yachachikuq, huk runatam rikuramurqaniku demoniokunata sutikipi qarqochkaqta, hinaptinmi mana ñoqanchikwan purisqanrayku michakaramuniku, nispa.

⁵⁰Jesusñataqmi nirqa: Ama michakuychikchu, pipas mana contranchikpi kaspaqa ñoqanchikwanmi kachkan, nispa.

⁵¹Hanaq pachaman kutinan tiempoña kaptinmi valorchakuykuspa Jerusalenman Jesús pasarqa.

⁵²Ichaqa willakuqkunatam ñawpachirqa. Paykunam Samaria lawpi huk llaqtaman chayaruspanku Jesuspa samananpaq wasita maskarqaku.

⁵³Chay llaqtachapi runakunam ichaqa Jerusalenman risqanta qawarispanku mana chaskirqakuchu.

⁵⁴Chayta qawaykuspankum Jacobowan Juanñataq nirqaku: Señor, ¿munankichu cielomanta ninata uraykachimuptiyku kay runakunata kañarunanta? nispanku.

⁵⁵Jesusñataqmi paykunata qaqcharqa.

⁵⁶Chaymantam huklaw llaqtaman pasakurqaku.

⁵⁷Ñanta richkaptinkum, Jesusta huk runa nirqa: Señor, maymanña riptikipas qatisqaykim, nispa.

⁵⁸Jesusñataqmi nirqa: Atoqkunapapas kanmi machayninku, alton pawaq urpikunapapas kanmi qesanku, runapa Churinpam ichaqa maypim umallantaña samaykachinanpaqpas mana kanchu, nispa.

⁵⁹Huk runatapas nirqataqmi: Qatiway, nispa. Chaymi payñataq nirqa: Señorlláy, taytaytaraqyá pamparamusaq, nispan.

⁶⁰Chaymi Jesusñataq nirqa: Wañuqkunataqa wañusqakunayá pampamuchun, qamyá ichaqa rispayki Diospa munaychakuyninmanta willakamuy, nispa.

⁶¹Huk runapas nirqataqmi: Señor, qanwan riytam munani, ichaqa puntatayá wasiypi kaqkunamanta despedikaykamusaq, nispa.

⁶²Hinaptinmi Jesusñataq nirqa: Takllawan yapuchkaspa qepata qawariq runaqa manam Diospa munaychakuyninpaq hinachu, nispan.