Read Biblia Revisión Chuya Qellqa 1992 – Chuya Qellqa 1992 Deuteronomio 11 Bible Online

Deuteronomio 11 - Biblia Revisión Chuya Qellqa 1992 – Chuya Qellqa 1992 bible

Deuteronomio 11

¹Señornikichik Tayta Diostayá kuyaychik, hinaspayá kamachikuyninkunata, estatutonkunata, decretonkunata, yachachikuyninkunata tukuy tiempo kasukuychik.

²Tayta Diospa corregisusqaykichikta reqsikuychik, chaykunataqa manam churikichikkunaqa yachankuchu nitaqmi rikurqakuchu. Tukuy atiyninwan ruwasqankunata hinaspa hatun kaynintayá yuyariychik,

³yuyariychiktaqyá Egiptopi rey Faraonpa contranpi chaynataq allpanpa contranpi admirakuypaq kaqkuna ruwasqantapas,

⁴chaynataq tropankunapa, caballonkunapa, carretankunapa contranpi peleaspan qamkunata qatimusuchkaptikichik imaynam Puka lamar qochawan pamparachisqantapas, chaynatam paykunataqa Tayta Dios wiñaypaq chinkarachirqa.

⁵Yuyariychiktaqyá kayman chayamunaykichikkama chunniqpi tukuy ima ruwasqantawan.

⁶Rubén ayllumanta kaq Eliabpa churin Datantawan Abiramta, Israel miraykunapa chawpinmanta aylluntinta, animalnintinta chaynataq tukuy imankunatawan kuskata allpa kichakuykuspan millpurusqantapas.

⁷Qamkunam testigo kankichik Tayta Diospa admirakuypaq kaqkuna ruwasqankunamantaqa.

⁸Kunan willasqay llapallan kamachikuykunata kasukuychik, chaynapi kallpanchakuspa qosusqaykichik allpaman yaykunaykichikpaq,

⁹hinaspa chay allpapi unay watakuna kawsanaykichikpaq. Chay allpatam ñawpaq taytaykichikkunaman hinaspa paykunapa mirayninkunaman qonanpaq Tayta Dios prometekurqa, chay allpaqa tukuy imapa qespinan hinaspa tukuy imapa kanan allpam.

¹⁰Chay yaykunaykichik allpaqa manam lloqsimusqaykichik Egipto nacionpi allpa hinachu. Chay Egipto nacionpiqa muhuta tarpuruspapas yaqa yuyu huertakunata hinam chakikichikwan parqorqankichik.

¹¹Chay allpaqa orqo kaspapas qechwa kaspapas parapa chayanan allpam.

¹²Kikin Señornikichik Tayta Diosmi chay allpataqa nanachikun, chay allpataqa watapa qallariyninmanta tukupayninkamam qawachkan.

¹³Sichum kunan punchawpi qosqay kamachikuykunata kasukunkichik hinaspa Señornikichik Tayta Diosta kuyaspaykichik tukuy sonqoykichikwan hinaspa tukuy vidaykichikwan serviptikichikqa,

¹⁴paymi tarpuy paratapas chaynataq poqoy paratapas tiempollanpi allpaykichikman parachimunqa, qamkunañataqmi kawsaykunata, vinota hinaspa aceiteta cosechankichik.

¹⁵Animalnikichikpaqpas pastokunatam wiñachinqa, qamkunapaqpas mikuyqa manam pisinqachu.

¹⁶Chaynaqa, waqaychakuspa ama engañachikuychikchu. Amam Tayta Diosmanta rakikunkichikchu idolokunataña yupaychaspa chaykunapa qayllanpi qonqoranaykichikpaqa.

¹⁷Chaynata ruwaptikichikqa Tayta Diosmi contraykichikpi piñakuspan manaña parachimunqachu, chakraykichikmantapas manañam cosechankichikñachu, Tayta Diospa qosunaykichik allin allpapipas chayllam wañurunkichik.

¹⁸Chaynaqa, kay kamachikuykunata sonqoykichikpi hinaspa yuyaymanaynikichikpi waqaychaychik, qellqaspa señalta hina makikichikpi hinaspa urkuykichikpi watakuychik.

¹⁹Kay kamachikuykunatam sapa kutilla churikichikkunaman yachachinkichik, wasipi kaspaykichik, ñanpi purispaykichik, puñuq yaykuspaykichik chaynataq hatarispaykichikpas.

²⁰Qellqankichiktaqmi wasikichikpa pilarninkunapiwan chakankunapipas,

²¹chaynapi ñawpaq taytaykichikkunaman qonanpaq Tayta Diospa jurasqan allpapi qamkunapas chaynataq miraynikichikkunapas mana chinkaruq cielokuna hina otaq kay pacha hina unay watakunata kawsanaykichikpaq.

²²Sichum kay willasqay llapallan kamachikuykunata kasukuspa Señornikichik Tayta Diostapas kuyaspa munasqanman hina kawsaspa payta qatiptikichikqa,

²³paypas qayllaykichikmantam llapallan nacionkunata wischunqa, hinaptinmi qamkunapas aswan achka hinaspa atiyniyuq runakunapa nacionninta munaychakunkichik.

²⁴Maymi sarusqaykichik allpam qamkunapa kanqa, chunniqmanta qallarispa Líbano orqokama chaynataq Eufrates mayumanta qallarispa intipa seqaykunan lawpi lamar qochakama.

²⁵Manam pipas qamkunawan peleaytaqa atinqachu, prometewasqanchikman hinam maylawman riptikichikpas chaypi kaq runakunata Señornikichik Tayta Dios mancharichispan katkatatachinqa.

²⁶Kunan punchawyá akllakuykuychik bendecisqa kanaykichikta otaq ñakasqa kanaykichiktapas.

²⁷Kunanmi willachkaykichik Señornikichik Tayta Diospa kamachikuyninkunata, chayta kasukuspaqa bendecisqam kankichik.

²⁸Idolokunataña qatinaykichikpaq Tayta Diospa kamachikuyninkunata mana kasukuspa chaynataq kunan kamachisqayman hina mana kawsaspaqa ñakasqam kankichik.

²⁹Qosunaykichik allpaman Señornikichik Tayta Dios pusaykusuptikichikqa, Diospa bendecisqan kanamantam Gerizim orqopi rimankichik, Ebal orqopiñataqmi ñakasqa kanamanta rimankichik.

³⁰Chay orqokunaqa kachkan Jordán mayupa waklaw chimpan intipa seqaykunan lawman rinapim, cananeokunapa allpanpi, Gilgal llaqtapa chimpanpi otaq encina sachakunapa kasqan More sutiyuq lawpi.

³¹Qamkunam kay Jordán mayuta chimpankichik, chaynapi Señornikichik Tayta Diospa qosusqaykichik allpaman yaykunaykichikpaq. Chay allpaman yaykuspa chaypiña yachaspaykichikqa,

³²kunan willasqay kamachikuykunatawan yachachikuykunatam kasukunkichik.