Read Biblia Revisión Chuya Qellqa 1992 – Chuya Qellqa 1992 Deuteronomio 12 Bible Online

Deuteronomio 12 - Biblia Revisión Chuya Qellqa 1992 – Chuya Qellqa 1992 bible

Deuteronomio 12

¹Ñawpaq taytaykichikkunapa yupaychasqan Tayta Diospa qosusqaykichik allpapi yachaspaqa kawsanaykichikkamam kay kamachikuykunatawan yachachikuykunata ruwayman churankichik.

²Yaykunaykichik llaqtakunapa idolonkuna yupaychananku sitiokunataqa tuñichinkichikmi, tuñichinkichiktaqmi orqokunapa puntankunapi, moqokunapi chaynataq llaqesapa sachakunapa sikinpi kaqkunatapas.

³Altarninkunatapas tuñichinkichikmi, rumimanta ruwasqa idolonkunatapas ñutunkichikmi, kañankichiktaqmi kullumanta Asera idolokunatapas. Pakipankichiktaqmi idolonkunapa imagenninkunatapas, hinaspam sutintapas chaymanta pasaypaqta chinkachinkichik.

⁴Señorninchik Tayta Diostaqa amam chay runakuna hinachu yupaychankichik.

⁵Aswanqa llapallan ayllukunapa allpanmantam huk sitiota Señornikichik Tayta Dios akllanqa, chaypim sutinta reqsichispa yachanqa, chayman rispam yupaychamunkichik.

⁶Chaypim paypaq animalkunata wañuchispa lliwta kañankichik, wakin kañanapaq ofrendakunatapas chaynallatam ruwankichik. Chaymanmi diezmoykichiktapas chaynataq prometekusqaykichik ofrendakunatawan kikikichikmanta qosqaykichik ofrendakunatapas apankichik. Apankichiktaqmi vacaykichikpa chaynataq ovejaykichikpa punta uñankunatapas.

⁷Hinaspam chay sitiopi Señornikichik Tayta Diospa qayllanpi mikunkichik, hinaspam llamkasqaykichikpa rurun kasqanrayku aylluykichikwan kuska kusikunkichik, chaykunawanmi Señornikichik Tayta Dios bendecisurqankichik.

⁸Chay allpapiqa amañam kaypi ruwasqanchikkunata hinaqa ruwankichikñachu. Kaypiqa sapakamam munasqaykichikta ruwakuchkankichik.

⁹Samanaykichikpaq Señornikichik Tayta Diospa qosunaykichik allpamanqa manaraqmi chayachkankichikraqchu.

¹⁰Chaywanpas Jordán mayuta chimparuspa Señornikichik Tayta Diospa qosusqaykichik allpapiña kaspaykichikmi chaynataq muyuriqnikichikpi enemigoykichikkunamanta hawkaña kaspaykichikmi,

¹¹Señornikichik Tayta Diospa sutin reqsisqa kananpaq, kikinpa akllasqan sitiopi, imaynam kamachisqayman hina, lliw kañana sacrificiota, wakin ofrendakunata, diezmoykichikkunata, ofrendaykichikkunata chaynataq payman prometesqaykichik allinnin kaqkunatapas ofrecenkichik.

¹²Hinaspam Señornikichik Tayta Diospa qayllanpi churikichikkunawan, serviqnikichikkunawan, llaqtaykichikpi yachaq levitakunapiwan fiestata ruwankichik, levitakunaqa manam qamkuna hinachu chakrakunata chaskinqaku.

¹³Tayta Diospaq animalkunata wañuchispaqa amam munasqaykichik sitiopichu ofrecenkichik,

¹⁴chaytaqa ruwankichik hukkaqnin aylluykichikpa allpanmanta Señornikichik Tayta Diospa akllasqan sitiollapim, chaypim lliw kañana sacrificiota ofrecenkichik, chaypitaqmi tukuy ima kamachisqaykunatapas ruwankichik.

¹⁵Llaqtaykichikkunapiqa Señornikichik Tayta Diospa bendecisusqaykichikman hinam animalkunata nakaspa mikunkichik. Chay aychataqa llapallaykichikmi, chuya kaqpas mana chuya kaqpas, luwichupa otaq tarukapa aychanta hina mikunkichik.

¹⁶Yawarnintam ichaqa ama mikunkichikchu, yakuta hinam pampaman tallinkichik.

¹⁷Llaqtaykichikkunapiqa amam mikunkichikchu kawsaykunamanta, vinomanta, aceitemanta diezmoykichiktaqa; vacaykichikpa, ovejaykichikpa punta kaq uñantapas amam mikunkichikchu, Tayta Diosman prometesqaykichik ofrendakunatapas chaynataq kikikichikmanta qosqaykichik ofrendaykichiktapas amam mikunkichikchu.

¹⁸Chaykunataqa Señornikichik Tayta Diospa akllasqan sitiollapim mikunkichik. Paypa qayllanpim fiestata ruwankichik, hinaspam llamkasqaykichikpa rurunmanta kusikunkichik churikichikkunawan, serviqnikichikkunawan chaynataq llaqtaykichikpi yachaq levitakunawan kuska.

¹⁹Chay allpapi yachaspaykichikqa amam levitakunataqa qonqarunkichikchu.

²⁰Sichum allpaykichikta Señornikichik Tayta Dios mirarachiptinqa, aychanayasusqaykichik punchawpim aychata mikunkichik.

²¹Señornikichik Tayta Diospa akllasqan sitio qamkunapa yachasqaykichikmanta karupiraq kaptinqa, Tayta Diospa qosusqaykichik vacaykichikta, ovejaykichikta nakaspam kamachisqayman hina munasqaykichikta llaqtaykichikpi mikunkichik.

²²Luwichupa otaq tarukapa aychanta hinam llapaykichik mikunkichik, chuya kaqkunapas mana chuya kaqkunapas.

²³Yawarnintam ichaqa ama imaraykupas mikunkichikchu. Yawarqa animalpa vidanmi, animalpa vidantaqa amam aychantawan kuskataqa mikunkichikchu.

²⁴Ama mikuspam yakuta hina pampaman tallinkichik.

²⁵Yawarta mana mikuspaqa, qamkunapas churikichikkunapas allinmi kankichik. Mana mikuspaqa Tayta Diospa qayllanpim paypa munasqanta ruwachkankichik.

²⁶Tayta Diospaq sapaqchasqaykichik ofrendakunatawan prometesqaykichik ofrendakunatam ichaqa Tayta Diospa akllasqan sitioman apaspa ofrecemunkichik.

²⁷Chaypim Señornikichik Tayta Diospa altarninpi animalkunata wañuchispa ofrecemunkichik, yawarnintañataqmi altarpa waqtanman tallinkichik, aychantam ichaqa mikunkichik.

²⁸Chaynaqa, tukuy kay kamachisqaykunatayá kasukuychik, chaynapi qamkunapas miraynikichikkunapas wiñaypaq allin kanaykichikpaq, allinqa kankichik Tayta Diospa qayllanpi allinta ruwaspam chaynataq munasqanman hina kawsaspam.

²⁹Yaykunaykichik allpapi llaqtakunata Señornikichik Tayta Dios chinkarachiptin paykunapa allpankunapiña yachaspaykichikqa,

³⁰paykunapa urmachisqan kanaykichikmantam waqaychakunkichik; chay llaqtakuna chinkachisqaña kaptinqa amam diosninkumantapas tapukachakunkichikchu: ¿Kay nacionniyuq runakunaqa imaynatataq diosninkuta yupaycharqaku, ñoqaykupas chaynata yupaychanaykupaq? nispaykichikqa.

³¹Señornikichik Tayta Diostaqa amam paykunapa yupaychasqanman hinaqa yupaychankichikchu. Chay nacionniyuq runakunaqa idolonkuta yupaychanankupaqmi Señornikichik Tayta Diospa millakusqanta hinaspa cheqnisqanta ruwanku, paykunaqa churinkutapas chay idolonkumanmi kañapunku.

³²Chaynaqa, tukuy kamachisqaykunatam mana yapaspa nitaq qechuspa kasukunkichik.