Read Biblia Revisión Chuya Qellqa 1992 – Chuya Qellqa 1992 Deuteronomio 2 Bible Online

Deuteronomio 2 - Biblia Revisión Chuya Qellqa 1992 – Chuya Qellqa 1992 bible

Deuteronomio 2

¹Chaymantam Tayta Diospa niwasqanman hina, Puka lamar qochaman riq ñanninta chunniqman rirqanchik. Unaymi Seir orqopa muyuriqninkunapi purirqanchik.

²Hinaptinmi Tayta Dios niwarqa:

³“Unayñam kay orqopa muyuriqninpi purirunkichik, kunanqa norte lawmanña riychik.

⁴Runakunata kaynata kamachiy: Esaupa mirayninkunapa allpantam pasankichik. Paykunaqa aylluykichikmi, Seir orqopim yachachkanku. Paykunaqa manchakusunkichikmi, chaywanpas anchatayá cuidakuychik.

⁵Amam paykunawanqa peleankichikchu, paykunapa allpantaqa manam taksallatapas qosqaykichikchu. Seir orqokunaqa Esaupa mirayninkunapam, paykunamanmi ñoqa qorqani.

⁶Mikunaykichikpaq imatapas munaspaqa paykunamantam rantinkichik, yaku tomasqaykichikmantapas pagankichikmi”, nispa.

⁷Señornikichik Tayta Diosmi tukuy ima ruwasqanchikpi bendeciwarqanchik, tawa chunka watañam ñoqanchikwan kasqanqa, chaymi kay manchakuypaq chunniqpi puriptinchikpas mana imapas pisiwarqanchikchu.

⁸Chaymantam Elat llaqtanta, Ezión-geber llaqtanta hinaspa Arabá law ñanninta rispa Seir orqopi yachaq ayllunchik Esaupa mirayninkunapa allpanpa hichpanta pasarqanchik, Arabá wayqoman riq ñanmanta rakikuspanchikmi Moab law chunniq ñanninta rirqanchik.

⁹Hinaptinmi Tayta Dios niwarqa: “Moabitakunataqa amam imanankichikchu nitaqmi paykunawanqa peleankichikchu, paykunamanqa Lotpa mirayninkuna kasqanraykum Ar law allpata qorqani. Paykunapa allpantaqa manam qosqaykichikchu”, nispa.

¹⁰(Ñawpaqtam chay allpapi Em casta runakuna yacharqaku, paykunaqa kallpasapa hinaspa achkallañam karqaku, Anacpa mirayninkuna hina hatunkaray runakunam karqaku.

¹¹Wakin runakunam hapirqaku chay hatunkaray runakunaqa Refaim castakuna kasqanta, Moab runakunam ichaqa Em castakunawan suticharqaku.

¹²Seir lawpiqa Hor casta runakunam ñawpaqta yacharqaku, ichaqa Esaupa mirayninkunam chaypi yachanankupaq paykunata qarqorurqaku. Chaynataqa ruwarqaku Israelpa mirayninkuna Tayta Diospa qosqan allpamanta qarqosqankuta hinam).

¹³Tayta Diosmi nirqa: “Kunanyá Zered mayuta chimpaychik”, nispa. Hinaptinmi Zered mayuta chimparqanchik.

¹⁴Cades-barnea lawmanta hamuspa Zered mayuta chimpamunanchikkamam kimsa chunka pusaqniyuq wataña pasarurqa. Chay watakunakamaqa guerrapaq akllasqa miraykunapas lliwñam wañururqaku, imaynam Tayta Diospa jurasqanman hina.

¹⁵Tayta Diospa piñakuyninmi lliw wañunankukama paykunapa contranpi karqa.

¹⁶Maypacham guerrapaq akllasqa qarikuna wañuruptinkuñam,

¹⁷Tayta Dios niwarqa:

¹⁸“Kunanmi Moab castakunapa allpanta pasaspaykichik Ar llaqtaman rinkichik.

¹⁹Amonitakunapa allpanman chayaspaykichikqa amam imanankichikchu, amataqmi paykunawanqa peleankichikpaschu. Amonitakunapa allpantaqa manam qosqaykichikchu. Chay allpataqa Lotpa mirayninkunamanmi herencianku kananpaq qorqani”, nispa.

²⁰(Chay allpatapas reqsirqaku hatunkaray runakunapa allpan nispankum, chaypi ñawpaqta Refaim castakuna yachasqankurayku. Paykunatam amonitakuna suticharqaku “zomzomeokuna”, nispanku.

²¹Chay llaqtaqa achkallaña runayuq hatun llaqtam karqa. Runankunapas Anacpa churinkuna hina hatunkaray runakunam karqaku. Paykunatam llapa amonitakunawan Tayta Dios tukurachirqa, chaynapim amonitakunaña chaypi yachachkanku.

²²Paykunapaqpas Tayta Diosqa imaynam Seir orqopi yachaq Esaupa mirayninkunapaq ruwasqanta hinam ruwarqa. Horeokunata qarqoruptinmi Esaupa mirayninkunaña paykunapa rantinpi kunankama yachachkanku.

²³Chaynatam Gaza llaqtapa muyuriqnin taksa llaqtakunapi yachaq aveokunatapas ruwarqa; llapa caftoreokunam Cretamanta hamuruspanku paykunata puchukarachirqaku, hinaspam paykunaña chaypi yachachkanku).

²⁴Tayta Diosmi niwarqa: “Hatarispa Arnón mayuta chimpaychik, kunanmi Hesbón llaqtapi yachaq amorreokunapa reynin Sehonta vencechisqaykichik, hinaspam allpanta qosqaykichik. Chaynaqa, guerrapi peleaspa allpanta hapimuychik.

²⁵Kunanmantapunim kay pachapi runakunata mancharichiyta qallarisaq. Qamkunamanta rimaqta uyarispankum mancharikuymanta katkatataspa qewipakunqaku”, nispa.

²⁶Chaymi Cademot chunniqmanta runakunata kacharqani Hesbón llaqtapi yachaq rey Sehonta sumaq simillawan kaynata nimunankupaq:

²⁷“Allpayki chawpintam pasaruyta munaniku. Mana mayman muyuspam ñanllanta pasarusaqku.

²⁸Mikunaykupaq pisiptinpas rantisqaykikum, yaku tomasqaykumantapas pagasqaykikum. Chaynaqa, allpayki chawpintayá pasarachiwayku.

²⁹Seir orqopi yachaq Esaupa mirayninkuna chaynataq Ar llaqtapi yachaq moabitakuna hinayá qampas pasarachiwayku, Jordán mayuta chimparuspa Señorninchik Tayta Diospa qowananku allpaman chayarunaykukama”, nispanku.

³⁰Ichaqa Hesbón llaqtapa reynin Sehonmi allpan pasananchikta mana munarqachu. Señorninchik Tayta Diosmi paytaqa pasaypaq rumi sonqota ruwarurqa, chaynapim ñoqanchikmanña qoykuwarqanchik.

³¹Hinaptinmi Tayta Dios niwarqa: “Kunan punchawmantapunim rey Sehonta chaynataq allpantapas qoykichik. Chaynaqa, allpanman yaykuspa hapimuychik”, nispa.

³²Rey Sehonmi llapa tropankunapiwan Jahaza llaqtapi peleananchikpaq lloqsimurqa.

³³Ichaqa Señorninchik Tayta Diosmi qoykuwarqanchik, chaymi payta, churinkunata hinaspa tropankunatapas vencerurqanchik.

³⁴Llapallan llaqtankunata venceruspanchikmi tuñichirqanchik, hinaspam qarikunatapas, warmikunatapas chaynataq wawakunatapas mana puchuykuspa wañuchirqanchik.

³⁵Llapa animalkunawan llaqtakunapa tukuy imankunam ichaqa ñoqanchikpaqña karqa.

³⁶Arnón mayu patanpi Aroer llaqtamanta chaynataq wayqopi kaq llaqtamanta Galaad lawpi llaqtakunakamam mayqan llaqtapas mana imanayta atiwarqanchikchu, Señorninchik Tayta Diosmi llapallanta munaychakunanchikpaq qoykuwarqanchik.

³⁷Amonitakunapa allpanman, Jaboc mayu lawpi llapallan kaqkunamanwan, orqo lawpi kaqkunamanmi ichaqa mana chayarqanchikchu, manaqa chayarqanchikchu Señorninchik Tayta Dios amam paykunamanqa yaykunkichikchu niwasqanchikraykum.