Read Biblia Revisión Chuya Qellqa 1992 – Chuya Qellqa 1992 Deuteronomio 20 Bible Online

Deuteronomio 20 - Biblia Revisión Chuya Qellqa 1992 – Chuya Qellqa 1992 bible

Deuteronomio 20

¹Sichum guerrapi peleaq lloqsispaykichik, enemigoykichikpa caballonkunata, carretankunata chaynataq tropankunata qamkunamantapas aswan achka-achka kasqanta qawaykuspaykichikqa amam manchakunkichikchu. Egipto nacionmanta hurqomusuqninchik Señornikichik Tayta Diosmi yanapasunaykichikpaq qamkunawan kachkan.

²Guerrapi peleanaykichikpaq hora chayaramuptinqa sacerdotem soldadokunaman kaynata

³ninqa: “Israelpa mirayninkuna uyariychik, kunanmi enemigoykichikwan peleamunkichik. Ama hukmanyaychikchu nitaq manchakuychikchu. Amataq paykunapa qayllanpiqa katkatataychikchu.

⁴Señornikichik Tayta Diosmi qamkunawan kachkan, paymi enemigoykichikpa contranpi peleaspan vencechisunkichik”, nispa.

⁵Chaymantam tropa kamachiqkuna ninqaku: “Sichum qamkunamanta pipas musoq wasita ruwaruspan manaraq chaypi yachaspanqa, wasinman kutikuchun. Yanqañataq guerrapi wañuramuptin hukña wasinpi yachakunman.

⁶Qamkunamanta pipas uvasta plantaruspan manaraq rurunta mikuspanqa wasinman kutikuchun. Yanqañataq guerrapi wañuramuptin hukña uvasninta cosechakurunman.

⁷Qamkunamanta pipas casarananpaq huk warmita rimapayaspanqa wasinman kutikuchun. Yanqañataq guerrapi wañuramuptin chay warmita hukña casararunman”, nispa.

⁸Huktawanmi tropa kamachiqkuna ninqaku: “Qamkunamanta pipas manchati kaspaqa wasinman kutikuchun. Yanqañataq manchati kasqanrayku soldadomasinkunatapas hukmanyachinman”, nispa.

⁹Llapa tropa kamachiqkuna rimayta tukuruptinkum, tropapa capitanninkuna ñawpaqman churakuykunqaku.

¹⁰Sichum hukkaqnin llaqtaman peleanaykichikpaq rispaqa, manaraq peleachkaspam hawkalla yaykunaykichikpaq rimapayankichik.

¹¹Sichum chay llaqtapi kaqkuna hawkalla yaykunaykichikta munaspankuqa, esclavoykichikña kaspam mana imallapaq servisunkichik.

¹²Mana yaykunaykichikta munaspanku qamkunawan peleanankupaq hatarimuptinkum ichaqa, llaqtata muyuruspa peleankichik.

¹³Señornikichik Tayta Dios qoykusuptikichikmi chay llaqtapi llapallan qarikunata wañuchinkichik.

¹⁴Warmikuna, wawakuna, animalkuna chaynataq tukuy ima kaqkunam ichaqa qamkunapaqña kanqa. Señornikichik Tayta Dios qosusqaykichikraykum enemigoykichikmanta tukuy ima qechusqaykichikqa qamkunapaqña kanqa.

¹⁵Hina chaynallatam ruwankichik yachanaykichik allpamanta karupi kaq llaqtakunatapas, chaykunaqa manam Canaán allpapi kaq nacionkunachu.

¹⁶Señornikichik Tayta Diospa qosusqaykichik llaqtakunapim ichaqa llapallan runakunata wañuchinkichik.

¹⁷Heteokunata, amorreokunata, cananeokunata, ferezeokunata, heveokunata chaynataq jebuseokunatapas pasaypaqtam chinkachinkichik; Señornikichik Tayta Diospa kamachisusqaykichikman hinam chaynataqa ruwankichik,

¹⁸chaynapi millakuypaq kaqkunata ruwaspanku idolonku yupaychayta mana yachachisunaykichikpaq. Chaynapi Señornikichik Tayta Diospa contranpi ama huchallikunaykichikpaq.

¹⁹Sichum peleanaykichikpaq huk llaqtapa muyuriqninpi campamentoykichikta sayachispaqa amam fruta sachankunataqa kuchuparunkichikchu. Chaykunapa rurunqa mikunaykichikpaqmi kanqa. Sachakunaqa manam runachu kutipakunankupaqqa.

²⁰Mana ruruq sachakunatam ichaqa kuchuwaqchik chaykunawan llaqtata qenchaspa vencenaykichikpaq.