Read Biblia Revisión Chuya Qellqa 1992 – Chuya Qellqa 1992 Deuteronomio 21 Bible Online

Deuteronomio 21 - Biblia Revisión Chuya Qellqa 1992 – Chuya Qellqa 1992 bible

Deuteronomio 21

¹Señornikichik Tayta Diospa qosunaykichik allpapi kachkaspa, maylaw purunpipas wañusqa runata tariruwaqchik, ichaqa mana yachawaqchikchu pim wañuchisqantapas , hinaptinqa

²ancianokunawan juezkunam wañusqa runapa kasqanmanta qallarispa muyuriqninpi kaq llaqtakunakama metrowan tupunqaku.

³Hinaptinmi chay wañusqata tarirusqanku sitiopa hichpanpi kaq ancianokuna manaraq yugoman watasqa vaquillata pusamunqaku.

⁴Chay llaqtapi ancianokunam chay vaquillata yakupa kanan mana yapuna, mana tarpuna qechwaman pusanqaku, hinaspam chaypi kunkanta qewirunqaku.

⁵Chaymantam Leví ayllumanta sacerdotekuna chay llaqtaman asuykunqaku. Paykunataqa Señornikichik Tayta Diosmi akllarqa, paypa qayllanpi servinankupaq hinaspa runakunatapas Tayta Diospa sutinpi bendecinankupaq. Ima atipanakuypas chaynataq ima piñanakuypas paykunapa nisqanman hinam arreglasqa kanqa.

⁶Chaymantam chay llaqtapi llapallan ancianokuna makinkuta mayllakunqaku chay wañusqa vaquillapa hawanpi,

⁷hinaspam ninqaku: “Kay runataqa manam ñoqaykuchu wañuchirqaniku, nitaqmi pim wañuchisqantapas rikurqanikuchu.

⁸Chaynaqa, Dios Taytallayku, salvasqayki Israel llaqtaykitayá pampachaykuwayku, amayá chay wañuqmantaqa Israel llaqtaykimanqa tumpawaykuchu”, nispanku. Chaynapim chay wañuchisqanku huchamanta pampachasqa kankichik.

⁹Chaynaqa, Tayta Diospa qayllanpi allinta ruwaspaykichikmi chay wañuchisqa runamanta mana huchayuq kankichik.

¹⁰Sichum enemigoykichikwan peleaptikichik Señornikichik Tayta Dios hapiykachisuptikichik presocharunkichik hinaptinñataq

¹¹hukkaqnikichik buenamoza warmita rikuruspan warmin kananpaq munaruspanqa,

¹²chay warmitam wasinman pusanqa, hinaptinmi chay warmiqa chukchanta kachiy-kachiyta rutukunqa, chaynataqmi sillunkunatapas kaptakunqa.

¹³Presochachikusqan pachantapas mudakuspanmi qaripa wasinpiña yachanqa. Tayta-mamanmantam huk killatapuni lutokunqa. Chaymantañam chay qari paywan casarakunqa chaynapim paypas warminña kanqa.

¹⁴Sichum chaymanta chay warmita manaña kuyaspaqa libretam kachaykunqa, ichaqa penqayman churasqanmantam mana rantikunqachu nitaqmi criadanpaqpas hapinqachu.

¹⁵Sichum huk qari iskay warmiyuq kaspan hukllanta kuyanman huknintañataq mana hinaspa iskayninpi churin karuptin, piwi qari churinñataq mana kuyasqan warmipiraq karunman, hinaptin

¹⁶kapuqninkunata churinkunaman rakinanan punchaw chayaramuptinqa, kuyasqan warmipi piwi churinman qonantam chay mana kuyasqan warmipi kaq piwi churinman qonqa.

¹⁷Mana kuyasqan warmipa wawanmanmi piwi churin kasqanrayku, wakin churinkunaman qosqanmantapas huk chaynatawanraq qonqa. Payqa piwi churi kasqanraykum chayta chaskinqa.

¹⁸Sichum pipapas munaysapa, mana uyarikuq, mana kasukuq churin kanqa, tayta-maman qaqchaptinpas chaynataq azoteptinpas mana kasukuq,

¹⁹hinaptinqa tayta-mamanmi hapiruspanku llaqtapi ancianokunaman pusanqaku.

²⁰Hinaspam ninqaku: “Kay warmaykum mana kasukuq, mana uyarikuq, imata niptiykupas manam kasuwankuchu, mikuylla-mikukuq, machakuyllapi purikuq”, nispanku.

²¹Chaymi llaqtanpi llapallan qarikuna rumiwan choqapaspa wañuchinqaku. Chaynata ruwaspaykichikmi mana allin ruwaqkunata qamkunamanta chinkachinkichik. Chayta yachaspankum Israelpa mirayninkuna manchakunqaku.

²²Sichum pitapas mana allin ruwasqanmanta sachapi warkuruptikichik wañuruptinqa,

²³amam chaypiqa tukuy tutaqa cuerponta saqerunkichikchu, aswanqa chay punchawllam pamparunkichik. Sachapi warkusqa wañuq runaqa Diospa ñakasqanmi. Señornikichik Tayta Diospa qosusqaykichik allpataqa amam millakuypaqtaqa ruwankichikchu.