Read Biblia Revisión Chuya Qellqa 1992 – Chuya Qellqa 1992 Deuteronomio 24 Bible Online

Deuteronomio 24 - Biblia Revisión Chuya Qellqa 1992 – Chuya Qellqa 1992 bible

Deuteronomio 24

¹Sichum pipas casarasqan warmipi imapas mana allin ruwasqanta tarispaqa rakikunanpaqmi papelta qellqanqa. Chayta qoykuspanmi wasinmanta qarqorunqa.

²Chay qarqosqa warmiqa atinmanmi hukwan casarakuyta.

³Sichum qepa qosanpas imapas mana allin ruwasqanta tarirunman hinaspa paypas rakikunanpaq papelta qoykuspan wasinmanta qarqorunman otaq wañurunmanpas,

⁴hinaptinqa millakuypaq kasqanraykum punta qosanqa manaña huktawanqa casaranmanñachu. Chay ruwaytaqa Tayta Diosqa millakunmi. Herenciaykichik kananpaq Señornikichik Tayta Diospa qosunaykichik allpataqa amam millakuypaq huchawanqa qachachankichikchu.

⁵Chayllaraq casarakuruq qariqa wata pasanankamam ama guerraman rinqachu, nitaqmi imapipas servikunqachu, chaynapi warminta kusichinanpaq.

⁶Amam kutakunanku maraytawan [1]tunawnintapas prendapiqa hapinkichu, chayqa kanman runapa vidanta prendapi hapichkaq hinam.

⁷Sichum Israelpa mirayninmanta hukkaqnin runa, hina llaqtamasillanta suwarunman paywan servichikunanpaq otaq rantikurunanpaqpas, hinaptinqa chay suwaqtam wañuchinkichik. Chaynata ruwaspam chay mana allin ruwayta qamkunamanta chinkachinkichik.

⁸Lepra onqoy rikuriruptinqa, Leví ayllumanta kaq sacerdotekunapa tukuy ima nisusqaykichiktam ruwankichik. Imaynam paykunaman kamachisqayman hinam ruwankichik.

⁹Egipto nacionmanta lloqsimuspa hamuchkaptikichik Mariata Señornikichik Tayta Dios imam ruwasqantam yuyarinkichik.

¹⁰Runamasikiman imatapas prestaspaqa, amam prenda hurqoqqa wasinta yaykunkichikchu.

¹¹Hawallapi suyaptikim kikin hurqomuspan qosunki.

¹²Wakcha runa kaptinqa amam chay prendanta paqarinnintinkamaqa hatallinkichu.

¹³Inti seqaykuyllatam kutiykachipunki, chaynapi puñuq yaykuspa chaywan qatakunanpaq. Hinaptinqa qampaq Señornikichik Tayta Diosta mañakuptinmi chay ruwasqaykiwan paypa qayllanpi allin kanki.

¹⁴Llamkapakusuqniki wakcha runataqa, llaqtamasiki kaptinpas otaq huklaw llaqtayuq kaptinpas amam ñakarichinkichu.

¹⁵Llamkasqanmantaqa manaraqpas inti seqaykuytam hina chay punchawllapi pagaykapunki. Chay runaqa wakcha kasqanraykum llamkapakusqan qollqellawan kawsan, mana chaynata ruwaptikiqa Tayta Diosta qayakuptinmi huchayuq kawaq.

¹⁶Wawa-churinkupa huchallikusqanmantaqa amam tayta-mamantaqa wañuchinkichikchu, nitaqmi tayta-mamanpa huchanmantapas wawa-churintaqa wañuchinkichikchu. Huchallikuspaqa sapakamam huchankumanta wañunqaku.

¹⁷Huklaw llaqtayuqkunatawan mana tayta-mamayuqkunataqa amam engañankichikchu. Amataqmi viudakunamantapas prendantaqa mañankichikchu.

¹⁸Egiptopi esclavo kasqaykichikmanta Señornikichik Tayta Dios hurqomususqaykichiktam yuyarinkichik. Chayraykum kay kamachisqaykunata ruwayman churankichik.

¹⁹Kawsaynikikunata rutuspa hukkaqnin gavillata chakrapi qonqaruspaqa amañam hoqariqqa kutinkiñachu. Chaytaqa huklaw llaqtayuqkunapaqwan mana tayta-mamayuqkunapaq chaynataq viudakunapaqmi saqenki. Chaynapim Señornikichik Tayta Dios tukuy ruwasqaykipi bendecisunki.

²⁰Aceitunasta pallaspaqa amañam pallapankichu. Puchuqkunataqa huklaw llaqtayuqkunawan mana tayta-mamayuqkuna chaynataq viudakuna pallapakunanpaqmi saqenki.

²¹Uvasnikita pallaspaqa amañam pallapankichu. Puchuqkunataqa huklaw llaqtayuqkunawan mana tayta-mamayuqkuna chaynataq viudakuna pallapakunanpaqmi saqenki.

²²Egipto nacionpi esclavo kasqaykitam yuyarinki. Chayraykum kasukunaykipaq kaykunata kamachiki.