Read Biblia Revisión Chuya Qellqa 1992 – Chuya Qellqa 1992 Deuteronomio 25 Bible Online

Deuteronomio 25 - Biblia Revisión Chuya Qellqa 1992 – Chuya Qellqa 1992 bible

Deuteronomio 25

¹Sichum pipas quejanakuypi kaspaqa juezmanmi rinqaku. Juezkunañataqmi allinta qatipaykuspanku huchayuq kaqta sentencianqaku.

²Chay huchayuqta azotenankupaq sentenciaptinkuqa, juezmi qayllanpi pampaman chutaykachispa huchanman hina azotechinqa.

³Ichaqa tawa chunka makillatam azotenkichik, yanqañataqmi llumpayta azoteruptikichikqa chay castamasikichik qayllaykichikpi penqaypaq kanman.

⁴Erapi trillachkaq torotaqa amam senqapankichikchu.

⁵Sichum wawqentin chulla wasillapi yachachkaptinku manaraq churiyuq kachkaspa huknin wañukuptinqa, chay wañukuqpa viudanqa amam sapaq runawanqa yapakunqachu. Aswanqa chay wañukuqpa wawqenmi chay viudata casaranqa hinaspam cuñadokunapaq kamachikuyta cumplinqa.

⁶Chay viudapa piwi wawanmi wañukuq qosanpa sutinta apanqa, chaynapi wañukuqpa sutin Israelpa mirayninkunamanta mana chinkananpaq.

⁷Sichum cuñadanta chay runa mana casarayta munaptinqa, chay viudam llaqtapa punkunpi ancianokunaman rispan paykunaman willanqa: “Cuñadoymi wañukuq wawqenpa sutin Israel ukupi yuyarisqa kananta mana munanchu. Cuñadokunapaq kamachikuytam mana ñoqawan cumpliyta munanchu”, nispa.

⁸Hinaptinmi chay llaqtapi ancianokuna, chay warmipa cuñadonta qayachimuspanku paywan rimanqaku. Sichum chay runa ninqa: “Manam casarayta munanichu” nispa,

⁹hinaptinqa chay viudam ancianokunapa qayllanpi asuykuspan cuñadonpa usutanta chusturunqa, hinaspam uyanpi toqaykuspan ninqa: “Kaynatam wañukuq wawqenpa sutin yuyarinata mana munaq runataqa ruwana”, nispa.

¹⁰Hinaptinmi Israel nacionpi chay runapa ayllunta sutichanqaku: “Usutan chustuchikuq runapa ayllunmi”, nispanku.

¹¹Sichum iskay runakuna maqanakuchkaptinku, huknin runapa warminñataq qosanta amachaspan chay huknin runapa qari kayninmanta hapiruptinqa,

¹²mana llakipayaspam chay warmipa makinta qorurunkichik.

¹³Amam maypipas rantinkichikchu nitaq rantikunkichikchu suwakuq balanzapiqa, nitaq mana cabal tupupipas.

¹⁵Cabal pesaq balanzapim rantinkichik otaq rantikunkichikpas, chaynapim Señornikichik Tayta Diospa qosusqaykichik allpapi unayta kawsakunkichik.

¹⁶Señornikichik Tayta Diosqa millakunmi chayna mana allinkunata ruwaspa runamasinku engañaqkunataqa.

¹⁷Egipto nacionmanta lloqsimuptikichik amalecitakuna ñanpi imam ruwasusqaykichiktam yuyankichik,

¹⁸paykunaqa Tayta Diostapas mana manchakuspankum qepaykichik hamuq pisipasqakunata chaynataq hukmanyasqakunata hayparamuspanku wañuchirqaku.

¹⁹Chaynaqa, qosunaykichik allpapi llapa enemigoykichikta Señornikichik Tayta Dios vencerachisuptikichikmi llapa amalecitakunata kay pachamanta pasaypaqta chinkachinkichik. Yanqataq qonqaruwaqchik.