Read Biblia Revisión Chuya Qellqa 1992 – Chuya Qellqa 1992 Deuteronomio 28 Bible Online

Deuteronomio 28 - Biblia Revisión Chuya Qellqa 1992 – Chuya Qellqa 1992 bible

Deuteronomio 28

¹Sichum Tayta Diosta kasuspaykichik kunan willasqay kamachikuyninkunata ruwayman churaptikichikqa, paymi kay pachapi llapallan nacionkunamanta aswan reqsisqata ruwasunkichik.

²Tayta Diosta kasukuspaykichikqa tukuy kaykunawan bendecisqam kankichik:

³Llaqtapipas chaynataq chakrapipas bendecisqam kankichik.

⁴Tayta Diosmi churikichikkunata, cosechaykichikkunata, vacaykichikkunapa, ovejaykichikkunapa hinaspa tukuy animalnikichikkunapa uñankunatapas bendecinqa.

⁵Canastaykichikpas chaynataq masa poqochinaykichik artesapas bendecisqam kanqa.

⁶Mayta lloqsispaykipas kutiykamuspaykipas bendecisqam kanki.

⁷Tayta Diosmi enemigoykichikkunata vencechisunkichik. Huk ñanllantam contraykichikpi hamunqaku, ichaqa qanchis ñannintam qamkunamanta ayqenqaku.

⁸Tayta Diosmi taqekichiktapas, tukuy ima llamkasqaykichiktapas bendecinqa. Señornikichik Tayta Diosmi qosusqaykichik allpapi bendecisunkichik.

⁹Sichum kamachikuyninkunata ruwayman churaspa munasqanman hina kawsaptikichikqa, prometesusqaykichikman hinam Tayta Diosqa payllapaqña sapaqchasqan llaqtanta hina uywasunkichik.

¹⁰Chaynapim kay pachapi llaqtakuna yachanqaku Tayta Diospa llaqtanwan sutichasqa kasqaykichikta, hinaspam manchakusunkichik.

¹¹Tayta Diosmi tukuy imatapas llimparichkaqta qosunkichik: Churikichikkunatam mirachinqa, mirachinqataqmi animalnikichikkunatawan cosechaykichikkunatapas. Chaynatam ruwanqa ñawpaq taytaykichikkunaman qosunaykichikpaq prometesqan allpapi.

¹²Kapuqninkunata kicharispanmi cielokunamanta allpaykichikman tiempollanpi parachimunqa, hinaspam tukuy ruwasqaykichikpi yanapasunkichik. Achka nacionkunamanmi prestankichik, qamkunam ichaqa mana pimantapas prestakunkichikchu.

¹³Tayta Diosmi munaychakuqta ruwasunkichik, qamkunapim ichaqa mana pipas munaychakunqachu; ñawpaqpim kankichik manam qepapichu. Chaynataqa ruwasunkichik kay willasqay Señornikichik Tayta Diospa kamachikuyninkunata kasukuspa ruwayman churaptikichikmi.

¹⁴Chayna kanaykichikpaqqa kunan kamachisqaykunamantayá ama karunchakunkichikchu, amataq huk dioskunataqa yupaychankichikchu.

¹⁵Sichum Señornikichik Tayta Diosta mana kasukuspaykichik kunan willasqay kamachikuyninkunatapas chaynataq yachachikuyninkunatapas mana ruwayman churaptikichikqa kay ñakaykunam haypamusunkichik:

¹⁶Llaqtapipas chaynataq chakrapipas ñakasqam kankichik.

¹⁷Canastaykichikpas, masa poqochinaykichik artesapas ñakasqam kanqa.

¹⁸Wawa-churikichikpas, cosechaykichikpas, vacaykichikkunapas, ovejaykichikkunapas chaynataq tukuy animalnikichikkunapa uñankunapas ñakasqam kanqa.

¹⁹Mayman lloqsispaykichikpas otaq kutiykamuspaykichikpas ñakasqam kankichik.

²⁰Tayta Diosmi ima ruwasqaykichikpipas ñakasunkichik, muspachisunkichik hinaspa llakichisunkichik. Mana allinkunata ruwanaykichikpaq paymanta rakikusqaykichikraykum manapas unaypi pasaypaqta chinkarachisunkichik.

²¹Tayta Diosmi peste onqoykunata kachaykamuspa qosusqaykichik allpamanta chinkarachisunkichik.

²²Kachaykamunqataqmi tisis onqoytapas, ñakarichikuq calenturatapas, punkipakuytapas, sinchi rupaytapas, usyaytapas chaynataq tarpukuynikichikpaq onqoykunatapas; chaykunam kay pachamanta chinkanayki punchawkama kanqa.

²³Cielokunamanta manaña paramuptinmi allpaykichikpas pasaypaqta taqrayarunqa.

²⁴Tayta Diosmi parapa rantinpi ñutu allpatawan aqotaña parachimunqa pasaypaqta chinkanaykichikkama.

²⁵Tayta Diosmi enemigoykichikkunawan vencechisunkichik. Enemigoykichikpa contranpim huk ñanninta seqella lloqsinkichik, ichaqa qanchis ñannintam paykunamanta ayqenkichik. Llapa nacionkunapa munaychakunanñam kankichik.

²⁶Ullachkukunawan purun animalkuna ayaykichikta mikuptinpas manam pipas manchachinqachu.

²⁷Tayta Diosqa Egipto runakunata hinam chupuwan, amoqllowan, sarnawan chaynataq seqsipakuykunawan mana hampikuypas atinaykichikkama ñakarichisunkichik;

²⁸ñakarichisunkichiktaqmi locoyaywan, ñawsayaywan chaynataq muspaypi hinaña kaywanpas;

²⁹hinaptinmi chawpi punchaw kachkaptinpas tutayaypi hinaña llapchaykachastin ñawsa hina purinkichik. Ima ruwasqaykichikpas manam allinqa lloqsinqachu. Runakunam ñakarichisuspaykichik tukuy imaykichiktapas apakunqaku, ichaqa manam pipas yanapaqnikichik hamunqachu.

³⁰Casaranaykipaq rimapayasqayki sipastapas hukmi abusarunqa. Wasita ruwaspapas manam chaypiqa yachankichu. Uvasta plantaspapas manam rurunta mikunkichu.

³¹Toroykitapas qayllaykipim nakanqaku, ichaqa manam aychanta mikunkichu. Wasikimantam asnoykita pusakunqaku ichaqa manam kutichipamusunkichu. Enemigoykikunam ovejaykikunata qechusunki ichaqa manam pipas yanapaqniki hamunqachu.

³²Churikikunatapas qawachkaptikim huklaw nacionniyuq runakunaman qoykunqaku. Paykunawan tupaykuyta anchallataña munaspaykipas manam ima ruwaytapas atinkichu.

³³Chakraykimanta cosechasqaykikunatawan llamkaspa huñusqaykikunatapas mana reqsisqayki runakunam mikukunqaku. Sarutyasqa kaspam chaylla-chaylla ñakarinki.

³⁴Tukuy chaykuna pasasuptikim locoyarunki.

³⁵Tayta Diosmi moqoykikunapi, piernaykikunapi chaynataq uma puyuknikimanta chaki pampaykikama mana hampiy atina chupukunawan ñakarichisunki.

³⁶Qampapas chaynataq ñawpaq taytaykikunapapas mana reqsisqan nacionmanmi, qamta chaynataq reynikitapas Tayta Dios pusachisunki. Chaypim kullumanta chaynataq rumimanta ruwasqa sapaq dioskunataña yupaychanki.

³⁷Tayta Diospa pusachisusqayki nacionkunapim qanmanta rimaspanku asipayaspa burlakusunki.

³⁸Achkatam tarpunki ichaqa aqaruway tukuruptinmi pisillata cosechanki.

³⁹Uvastam plantanki, ichaqa urukuna tukurusqanraykum uvasnintapas mana pallankichu nitaqmi vinontapas tomankichu.

⁴⁰Chakraykikunapim aceitunas sachaykikuna kapusunki, ichaqa rurunkuna kikillanmanta wichirusqanraykum aceitenwanpas mana llusikunkichu.

⁴¹Churikikuna kaqpas manam qanwanchu yachanqaku, huklaw nacionkunamanmi preso apasqa kanqaku.

⁴²Llapallan sachaykikunatawan tarpukuynikikunatam aqaruwaykuna tukurunqa.

⁴³Qamkunawan yachaq huklaw llaqtayuqkunam qamkunamantapas aswan munayniyuq kanqaku, qamkunañataqmi aswan-aswan chinkankichik.

⁴⁴Paykunam prestasunkichik, qamkunam ichaqa mana prestankichikchu. Paykunam munaychakusunkichik, qamkunañataqmi paykunata servinkichik.

⁴⁵Chaynaqa, chay ñakaykunam hayparuspa wañuchisunkichik. Señornikichik Tayta Diosta mana kasukusqaykichikraykum chaynataq willasusqaykichik kamachikuyninkunatawan yachachikuyninkunatapas mana ruwayman churasqaykichikraykum chaykuna puchukachisunkichik.

⁴⁶Tukuy chay ñakaykunam qamkunapa chaynataq miraynikichikpa contranpipas admirakuypaq señal hina wiñaypaq kanqa.

⁴⁷Tukuy imapas qosuqnikichik Tayta Diosta kusikuywan hinaspa tukuy sonqoykichikwan mana servisqaykichikraykum chaykunaqa chayamusunkichik.

⁴⁸Tayta Diospa kachamusqan enemigoykichikkunatam yarqasqa, yakunayasqa, mana pachayuq hinaspa tukuy imamantapas wakchayasqa servinkichik. Wañunaykichikkamam fierro yugota apachichkaq hina paykunata Tayta Dios servichisunkichik.

⁴⁹Tayta Diosmi kay pachapa patanpi kaq nacionta contraykichikpi pusamunqa. Paykunam pawachkaq anka hinaraq hamunqaku; rimayninkutapas manam entiendenkichikchu.

⁵⁰Paykunaqa manchakuypaq rikchayniyuq runakunam. Yuyaqkunatapas chaynataq wawakunatapas mana llakipayaq runakunam.

⁵¹Paykunam animalnikichikkunata chaynataq kawsaynikichikkunatapas mikukunqaku. Qamkunapaqqa manam puchunqakuñachu trigota, vinota, aceiteta nitaq vacakunapa hinaspa ovejakunapa uñankunatapas, hinaptinmi yarqaymanta wañunkichik.

⁵²Llaqtaykichikkunapa muyuriqninpim campamentonkuta sayachinqaku, chaynapim hapipakunayki qaqay-qaqay murallaykikunapas tuñinqa. Señornikichik Tayta Diospa qosusqaykichik allpata muyuruspam kayninta chayninta yaykumusunkichik.

⁵³Hinaptinmi yarqaymanta kaspa Señornikichik Tayta Diospa qosusqaykichik churikichikkunatapas mikunkichik.

⁵⁴Qamkuna ukupi llampu sonqo runapas manam wawqentapas llakipayanqachu, kuyay warmintapunipas chaynataq churinkunatapas nanay ñawinwanmi qawanqa.

⁵⁵Hinaspam wañusqa churinpa aychan mikusqantapas mana qaraykunqachu. Enemigoykichikkuna muyurusuptikichikqa manam imapas mikunaykichikpaq kanqachu, paykunaqa llumpaytam ñakarichisunkichik.

⁵⁶Qamkuna ukupi añañanka, niñatukuspa qala chakilla pampata mana saruy munaq warmipas kuyay qosantawan wawankunatam nanay ñawinwan qawanqa.

⁵⁷Hinaspam wachakusqan wawan mikusqantapas chaynataq kikinpa madrennin mikusqantapas mana qaraykunqachu, pakasqallapim kikillan mikurunqa. Enemigoykichikkuna muyurusuptikichikqa manam imapas mikunaykichikpaq kanqachu, paykunaqa llumpaytam ñakarichisunkichik.

⁵⁸Sichum kay libropi qellqasqa yachachikuykunata mana kasukuptikichikqa, nitaq ancha reqsisqa manchakuypaq Señornikichik Tayta Diostapas mana manchakuptikichikqa,

⁵⁹paymi qamkunaman chaynataq miraynikichikkunaman admirakuypaq manaña tukuy atiq hatun ñakariykunata hinaspa manchakuypaq mana hampiy atina onqoykunata kachaykamunqa.

⁶⁰Egipto nacionpi manchakusqaykichik llapa castigokunatam qamkunamanpas kachaykamusunkichik, hinaptinmi chaykunawan ñakarinkichik.

⁶¹Tayta Diosqa kacharimusunkichiktaqmi kay kamachikuy libropi mana qellqasqa kaq onqoykunatawan ñakariykunatapas, hinaspam chaykunawan puchukachisunkichik.

⁶²Chaynaqa, Israelpa mirayninkuna, cielopi chaskakuna hina achkallaña kachkaspapas, aschallañam puchurunkichik, Señornikichik Tayta Diosta mana kasukusqaykichikrayku.

⁶³Imaynam Tayta Diosqa tukuy imapi bendecisuspaykichik chaynataq mirachisuspaykichik kusikurqa, chaynatam ñakarichisuspaykichikpas chaynataq wañuchisuspaykichikpas kusikunqa, chaynapim qosusqaykichik allpamanta qarqosqa kankichik.

⁶⁴Tayta Diosmi llapallan nacionkunaman, kay pachapa patanmanta huknin patankama cheqechisunkichik. Chaypim qamkunapa chaynataq ñawpaq taytaykikunapa mana reqsisqan kullumanta hinaspa rumimanta ruwasqa idolokunataña servinkichik.

⁶⁵Chay nacionkunapiqa purisqallaykichikpi kaspam samaytapas mana tarinkichikchu. Tayta Diosmi mancharisqallataña, weqe ñawintinta hinaspa llakisqallataña kawsachisunkichik.

⁶⁶Vidaykichikpas wañuypa patanpi hinaña kaptinmi, tutapas punchawpas mancharisqalla kankichik. Manam yachankichikchu wañunaykichikta otaq kawsanaykichiktapas.

⁶⁷Hatun manchakuytawan sasachakuyllata qawaspaykichikmi sapa pacha achikyayta ninkichik: “Amalaya tutaykurunmanña”, nispa. Tutaykuruptinñataqmi ninkichik: “Amalaya achikyarunmanña”, nispa.

⁶⁸Tayta Diosmi nisurqankichik Egipto nacionman amaña haykapipas kutinaykichikpaq; ichaqa kikinmi barcokunapi kutichisunkichik, hinaptinmi esclavo kanaykichikpaq enemigoykichikkunaman munachikunkichik, ichaqa manam pipas rantiyta munasunkichikchu.