Read Biblia Revisión Chuya Qellqa 1992 – Chuya Qellqa 1992 Deuteronomio 32 Bible Online

Deuteronomio 32 - Biblia Revisión Chuya Qellqa 1992 – Chuya Qellqa 1992 bible

Deuteronomio 32

¹¡Cielokuna, rimarisqayta uyariychik! ¡Kay pacha, rimarisqayta uyariy!

²Yachachikuyniyqa para hinam chayamunqa, rimasqayqa sulla hinam wichimunqa; lliwaman paramuchkaq hinam chayamunqa, pastoman paramuchkaq hinam wichimunqa.

³Tayta Diospa sutintam hatunchasaq, qamkunapas Diosninchikta hatunchaychik.

⁴Payqa pakakunanchik qaqam, ruwasqankunapas mana pantayniyuqmi, ruwayninkunapas allinpunim. Payqa cheqap Diosmi, paypiqa manam ima mana allinpas kanchu, payqa derechonpim imatapas ruwan.

⁵Millakuypaq huchasapa runakuna, Tayta Diosta piñachiq runakuna, manam qamkunaqa churinchu kankichik.

⁶Mana yuyayniyuq mana yachayniyuq runakuna, ¿chaynatachu Tayta Diosman pagapunkichik? ¿Manachum payqa taytaykichik karqa? ¿Manachum payqa unanchasuqnikichik karqa? Paymi unanchaspa takyachisurqankichik.

⁷Ñawpaq tiempokunamanta yuyariychik, ñawpaq watakunapi achka miraykunamanta yuyariychik, ñawpaq taytaykichikkunata tapurikuychik, paykunam willasunkichik. Yuyaqkunata tapurikuychik, paykunam nisunkichik.

⁸Tukuy imapa hawanpi munaychakuq Diosmi nacionkunaman herenciata rakinarqa, chay nacionkunapa linderonkunatam churarqa, Israelpa mirayninkunaman hinam rakirqa.

⁹Tayta Diospa herencianqa runankunallam, paypa herencianqa Jacobpa mirayninkunallam.

¹⁰Paykunatam chunniq allpapi tarirqa, wayrapa pukunan chaki allpapi. Marqayninpi apamuspanmi paykunata yachachirqa, ñawi rurunta hinam waqaycharqa.

¹¹Mallqonkunata pawachinanpaq qesanpa altonpi muyurichkaq anka hinam, Tayta Diospas raprankunata mastarispan apamurqa, hoqarispanmi wichayta qespichirqa.

¹²Tayta Diosmi paykunataqa pusamurqa, manam sapaq dioschu.

¹³Alto orqonkunatam pusamurqa, paykunamanqa allpapa rurunkunatam mikuchirqa, mikuchinanpaqmi qaqamanta mielta hurqorqa, raqchi rumimantam aceitenkutapas hurqorqa.

¹⁴Vacakunamanta lecheta hurqospam lluklluta mikuchirqa, allinnin malta carnerokunatawan, Basán lawpi carnerokunata, allinnin chivatokunatam mikuchirqa. Allinnin trigotam mikuchirqa, uvaspa weqenmanta vinotam tomachirqa.

¹⁵Ichaqa [2]Jesurunmi wirayaruspan haytakuqllaña rikurirurqa, wiranpas wiswirinankamam anchallataña poqorurqa; hinaspam unanchaqnin Tayta Diosta saqerurqa, waqaychaqnin qaqatam wischupakururqa.

¹⁶Mana reqsisqanku dioskunata yupaychaspankum Tayta Diosta llakichispa piñachirqaku.

¹⁷Demoniokunapaqmi animalkunata ofrecerqaku, manam Tayta Diospaqchu; paykunapapas chaynataq ñawpaq taytankupapas mana reqsisqanku chayllaraq rikurimuq idolokunapaqmi chayta ruwarqaku.

¹⁸Israelpa mirayninkuna, amparaqnikichik taytaykichiktam qonqarunkichik, kawsay qosuqnikichik Tayta Diostam qonqarunkichik.

¹⁹Chayta rikuspanmi Tayta Dios sinchita piñakururqa, piñakuruspanmi qaritapas warmitapas churinkunata qepanchakururqa.

²⁰Chayraykum Tayta Dios nirqa: Paykunatam qepanchakurusaq, imatas ruwanqaku; paykunaqa mana allin ruwaqkunam, paykunaqa iskay uya churikunam.

²¹ Idolokunata yupaychaspankum llakichiwarqaku, millakuypaq idolokunata yupaychaspankum piñachiwarqaku. Chayraykum ñoqapas paykunata hukmanyarachisaq, mana yachayniyuq llaqtawanmi sientirachisaq, mana yuyayniyuq runakunawanmi piñarachisaq.

²²Piñakuyniymi nina hinaraq ruparinqa, uku pachapa ukunkamaraqmi chayarunqa; allpatapas kawsaynintintam tukurunqa, orqokunapa sapintam kañarunqa.

²³Tukuy mana allinkunatam montoykamusaq, flechaykunatam paykunaman chayachimusaq.

²⁴Yarqaymantam wañunqaku, sinchi calenturawanmi puchukanqaku, millay peste onqoywanmi tukunqaku, mikukuq purun animalkunatawan kachukuq maqta urukunatam paykunaman kachaykusaq.

²⁵Callekunapim churinkupas espadapi wañunqaku, wasinku ukupiñataqmi mancharisqallaña kanqaku; jovenkunawan sipaskunapas, ñuñuq wawakunawan yuyaqkunapas wañunqakum.

²⁶Paykuna cheqerachiytam tantearqani, manaña yuyarisqa kanankupaq chinkarachiytam tantearqani.

²⁷Ichaqa enemigokunapa asipayasqa kanantam mana munarqanichu, yanqañataq contrankupi kaqkuna ninmanku: “Kaytaqa kallpallanchikwanmi ruwarunchik, manam Tayta Dioschu ruwan”, nispanku.

²⁸Israel llaqtaqa mana yachayniyuqmi kachkan, yuyaymanayninmi chinkarun.

²⁹Yachayniyuq kaspaqa musyakunmankuchá imapim tukurunankutapas.

³⁰¿Chullalla runa, waranqa runata qatikacharunmanchu? ¿Iskaylla runa, chunka waranqa runata qatikacharunmanchu? Arí atirunmanmi, ichaqa enemigonkuman waqaychaqninku Tayta Dios hapiykachiptillanmi.

³¹Enemigonchikkunapa waqaychaqninkuqa manam waqaychaqninchik hinachu, chaytaqa enemigonchikkunapas allintam yachanku.

³²Paykunapaqqa uvas plantankupas Sodoma Gomorra lawpi uvas hinam, paykunapa uvasninkuqa venenoyuq qatqe uvaskunam.

³³Vinonpas maqta urupa venenon hinam, maqta urupa wañuchikuq venenon hinam, nispa.

³⁴Tayta Diosmi nin: “Tukuy kaykunatam qorita hina waqaychachkani.

³⁵Mana allin ruwaqkunatam castigasaq, mana allin ruwasqankuman hinam pagapusaq. Wichinanku punchawmi chayamuchkanña, chinkachisqa kananku punchawmi hichpaykamuchkanña, purmachisqa kananku punchawmi utqaykamuchkanña”, nispa.

³⁶Tayta Diosmi llaqtanta mana kallpayuqta rikuspan nanachikunqa, manaña pipas kallpayuq qepasqanta rikuspanmi serviqninkunata llakipayarinqa.

³⁷Tayta Diosmi enemigonchikkunata ninqa: “¿Maytaq chay qaqa hina hapipakunaykichik idoloykichikkunaqa?

³⁸¿Maytaq ofrecesqanku wirakuna mikuq idoloykichikkunaqa? ¿Maytaq vino tallipusqanku tomaq idoloykichikkunaqa? Yanapasunaykichikpaq hatarichunku, nanachikusunaykichikpaq hamuchunku.

³⁹Kayta yachaychik: Ñoqallam Diosqa kani, ñoqamanta hukqa manam kanchu. Ñoqallam wañuchinipas ñoqallataqmi kawsachinipas, ñoqallam kirinipas ñoqallataqmi hampinipas, makiymantaqa manam pipas librakunmanchu.

⁴⁰Cieloman makiyta haywarispaymi jurani, wiñaypaq kawsaq Dios kasqayta.

⁴¹Espadayta llipipipinankama ñawchiyachispaymi, justicia ruwanaypaq espadayta hapiykuspaymi, enemigoykunamanta vengakusaq, ruwayninkuman hinam cheqniwaqniykunaman pagapusaq.

⁴²Flechaykunatam yawarwan sinkarachisaq, espadaymi aychata mikukunqa; wañuqkunapa, presokunapa yawarninta chapuparusaq, capitankunapa umantam mikukunqa”, nispa.

⁴³ Llapa nacionkuna, Diospa llaqtanwan kusikuychik, Tayta Diosmi serviqninkunapa wañusqanmanta vengakunqa, enemigonkunatam castiganqa. Allpantam chuyanchanqa, runankunatam pampachanqa, nispa.

⁴⁴Israelpa mirayninkunapa qayllanman Moisés hamuruspanmi, Nunpa churin Josueypiwan chay takita qallariyninmanta tukuyninkama takirqaku.

⁴⁵

⁴⁶Chaymantam Israelpa mirayninkunata kaynata nirqa: Tukuy kay nisqaykunata yuyaymanaspa sonqoykichikpi hatalliychik. Churikichikkunata kamachiychik kay yachachikuykunata kasukuspa ruwayman churanankupaq.

⁴⁷Kay yachachikuykunaqa manam llutan yachachikuykunachu, aswanqa kawsachiqnikichikmi. Kay yachachikuykunaraykum Jordán mayuta chimpaspa Tayta Diospa qosusqaykichik allpapi unay watakunata kawsakunkichik, nispa.

⁴⁸Chay punchawllapim Moisesta Tayta Dios nirqa:

⁴⁹Moab lawpi, Jericó llaqtapa chimpan Abarim orqokunaman rispaykiyá Nebo orqoman qespiy, chaymantam Israelpa mirayninkunaman qonay Canaán allpata qawarinki.

⁵⁰Chay qespisqayki orqopim wañukunki, hinaspam ñawpaq taytaykikunapa kasqanman rinki, imaynam wawqeki Aaronpas Hor orqopi wañukuspan ñawpaq taytaykikunapa kasqanman risqanpi hina.

⁵¹Iskaynikichikmi Israelpa mirayninkunapa qayllanpi, Zin chunniqpi, Meriba-cades sitiopi ñoqapa contraypi huchallikurqankichik, hinaspam Israelpa mirayninkunapa qayllanpi mana hatunchawarqankichikchu.

⁵²Chaynaqa, chimpallanmantam chay allpataqa qawarinki, Israelpa mirayninkunaman qonay allpamanqa manam yaykunkichu.