Read Biblia Revisión Chuya Qellqa 1992 – Chuya Qellqa 1992 Deuteronomio 7 Bible Online

Deuteronomio 7 - Biblia Revisión Chuya Qellqa 1992 – Chuya Qellqa 1992 bible

Deuteronomio 7

¹Señornikichik Tayta Diosmi yachanaykichik allpaman pusaykususpaykichik qamkunamantapas hatun chaynataq atiyniyuq qanchis nacionkunata qayllaykichikmanta wischunqa; chay nacionkunam kaykuna: Heteokuna, gergeseokuna, amorreokuna, cananeokuna, ferezeokuna, heveokuna chaynataq Jebuseokuna.

²Maypacham Señornikichik Tayta Dios chay nacionkunata qoykusuptikichikmi paykunata venceruspa pasaypaqta chinkachinkichik, amam paykunawanqa ima contratotapas ruwankichikchu nitaqmi llakipayankichikpaschu.

³Amam paykunawanqa casarakunkichikchu, warmi churikichiktapas amam qari churinkuwanqa casarachinkichikchu, nitaqmi qari churikichiktapas warmi churinkuwanqa casarachinkichikchu.

⁴Yanqañataqmi churikichikta Tayta Diosmanta karuncharachispa diosninkunataña yupaychachinmanku, hinaptinqa Tayta Diosmi contraykichikpi piñakuspan qayllanmanta chaylla chinkarachisunkichikman.

⁵Aswanqa paykunapa altarninkunatam tuñichinkichik, yupaychanankupaq rumimanta ruwasqanku pilarkunatapas pasaypaqtam pakipankichik. Asera idolonkutam ñutunkichik, lliw idolonkunatam kañankichik.

⁶Qamkunaqa Señornikichik Tayta Diospa sapaqchakusqan llaqtanmi kankichik. Tayta Diosmi kay pachapi llaqtakunamanta akllasurqankichik paypa kuyasqan llaqta kanaykichikpaq.

⁷Tayta Diosqa kuyasurqankichik hinaspa akllasurqankichik manam wakin nacionkunamanta hatun kasqaykichikraykuchu, qamkunaqa wakin nacionkunamantapas taksallam karqankichik.

⁸Tayta Diosmi qamkunata kuyaspa chaynataq ñawpaq taytaykichikman jurasqanta cumplispan, Egipto nacionpi esclavo kasqaykichikmanta hurqomusurqankichik, hinaspam hatun atiyninwan rey Faraonpa munaychakuyninmanta hurqomusurqankichik.

⁹Señornikichik Tayta Diospa cheqap Dios kasqantayá reqsiychik. Payqa kuyaqninkunawanqa chaynataq kamachikuyninkuna kasukuqkunawanqa waranqantin miraykamapas kuyapayarispa pacto ruwasqanta cumpliqmi.

¹⁰Pipas cheqniqninkunatam ichaqa kikinpuni chinkachinqa, imam ruwasqanman hinataqmi pagapunqapas.

¹¹Chaynaqa, kunan kamachisqay estatutokunata, kamachikuykunata hinaspa decretokunatayá kasukuychik.

¹²Sichum kay uyarisqaykichik yachachikuykunata kasukuspa ruwayman churaptikichikqa Señorninchik Tayta Diosmi ñawpaq taytaykichikkunata llakipayaspan ruwasqan pactota cumplinqa.

¹³Payqa kuyasuspaykichikmi bendecisunkichik hinaspam mirachisunkichik. Bendecinqataqmi wawa-churikichiktapas, allpaykichikpa ruruntapas, trigoykichiktapas, vinoykichiktapas, aceitekichiktapas, vacaykichikpa hinaspa ovejaykichikpa uñankunatapas. Chaynataqa ruwanqa ñawpaq taytaykichikman qonanpaq jurasqan allpapim.

¹⁴Qamkunaqa llapallan nacionkunamantapas aswan bendecisqam kankichik. Qamkuna ukupiqa qaripas, warmipas manam qolluqqa kanqachu, animalnikichikpas manam machorraqa kanqachu.

¹⁵Tayta Diosmi qamkunamanta tukuy onqoykunata wischunqa, Egipto nacionman kachasqan onqoykunatapas manam qamkunamanqa chayachimunqachu. Aswanqa llapallan cheqnisuqnikichik runakunatam chay onqoykunawan ñakarichinqa.

¹⁶Qamkunam ichaqa Señornikichik Tayta Diospa qosusqaykichik allpapi llaqtakunata chinkachinkichik, amam llakipayankichikchu, nitaqmi diosninkunatapas yupaychankichikchu, yanqañataqmi urmachisuqnikichik kanman.

¹⁷Ichapas qamkuna niwaqchik: “Kay nacionkunaqa ñoqanchikmantapas aswan achkam ¿imaynataqsi qarqoyta atichwan?” nispaykichik.

¹⁸Chaywanpas amam paykunataqa manchakunkichikchu. Rey Faraonwan chaynataq Egipto runakunawan Señornikichik Tayta Diospa tukuy ima ruwasqantam yuyarinkichik.

¹⁹Kaytam yuyarinkichik: Señornikichik Tayta Diosmi Egipto nacionmanta hatun milagrokunawan chaynataq admirakuypaq señalkunawan hurqomuwarqanchik, chaykunataqa rikurqankichikmi. Chaynatam manchakusqaykichik nacionkunatapas ruwanqa.

²⁰Puchuqkunamanwan pakakuqkunamanñataqmi wayliskunata Señornikichik Tayta Dios kacharinqa, anchata mancharichispa chinkachinankama.

²¹Paykunapa qayllanpiqa ama katkatataychikchu. Qamkunawan kaq Señornikichik Tayta Diosmi manchakuypaq hatu-hatun Diosqa.

²²Señornikichik Tayta Diosmi chulla-chullallamanta chay nacionkunata qayllaykichikmanta qarqonqa. Llapallan nacionkunata qarqoruynikichikqa manam allinmanchu, purun animalkunam contraykichikpi mirarunman.

²³Kikin Señornikichik Tayta Diosmi chay nacionkunata makikichikman churanqa, hinaspam chinkachinankama pasaypaqta tuñirachinqa.

²⁴Reyninkunatapas makikichikman churaykamuptinmi paykunapi munaychakunkichik. Wañuchispaykichikmi sutinkutapas chinkachinkichik kay pachapi manaña pipas yuyanankama. Manam pipas qamkunawan peleaspaqa vencesunkichikchu, aswanqa qamkunam chinkachinkichik.

²⁵Llapa idolonkunatapas kañankichikmi, chay idolokunata llusichisqanku qorita qollqetapas amam munapayankichikchu, yanqam urmachisunkichikman, Señornikichik Tayta Diospa qayllanpiqa chaykunaqa millakuypaqmi.

²⁶Millakuypaq kaqkunataqa amam wasikichikman apankichikchu, yanqam qamkunapas chinkachisqa kawaqchik. Chay millakuypaq kaqkunaqa chinkachisqa kananpaqmi churasqa kachkan, chayraykum chaykunataqa millakuypaqtaña qawankichik.