Read Biblia Revisión Chuya Qellqa 1992 – Chuya Qellqa 1992 Deuteronomio 9 Bible Online

Deuteronomio 9 - Biblia Revisión Chuya Qellqa 1992 – Chuya Qellqa 1992 bible

Deuteronomio 9

¹Israelpa mirayninkuna, kayta uyariychik: Jordán mayuta chimpaspa qamkunamantapas aswan atiyniyuq chaynataq achka runayuq nacionkunata qarqospa qaqay-qaqay murallasqa hatun llaqtakunaman yaykunaykichik punchawmi chayaramun,

²yachasqaykichikpi hinapas chay llaqtakunapa runankunaqa anaceokuna hina hatunkaray runakunam, uyarirqankichiktaqmi: “¿Anacpa mirayninkunawanqa pitaqsi peleanman?” nisqankutapas.

³Kaytayá yachaychik: Señornikichik Tayta Diosmi ñawpaqnikichikta rinqa. Payqa ratachkaq nina hina rispanmi chay nacionniyuq runakunata wañuchispan qayllaykichikpi penqayman churanqa. Qamkunañataqmi Tayta Diospa nisqanpi hina qarqoruspa chaylla chinkachinkichik.

⁴Señornikichik Tayta Dios qayllaykichikmanta paykunata qarqoruptinqa, amam sonqoykichikpi ninkichikchu: “Allin runakuna kasqanchikraykum Tayta Diosqa kay allpata qoykuwanchik”, nispaqa. Chay nacionkunataqa Tayta Diosqa qarqonqa mana allin runakuna kasqankuraykum.

⁵Manam allin ruwaq runakuna otaq allin sonqoyuq kasqaykichikraykuchu paykunapa allpanmanqa pusasunkichik. Aswanqa Señornikichik Tayta Diosmi chay runakunataqa mana allinkuna ruwasqankumanta qarqonqa, chaynata ñawpaq taytaykichik Abrahamman, Isaacman hinaspa Jacobman jurasqanta cumplinanpaq.

⁶Manam allin ruwaq runakuna kasqaykichikraykuchu Señornikichik Tayta Diosqa chay allpataqa qosunkichik. Qamkunaqa rumi sonqo runakunam kankichik.

⁷Kaytayá yuyariychik: Señornikichik Tayta Diosta chunniqpi piñachisqaykichiktaqa amam haykapipas qonqarunkichikchu. Egipto nacionmanta lloqsimusqaykichikmanta kayman chayamunaykichikkamam Tayta Diostaqa mana kasurqankichikchu.

⁸Horeb orqopim Tayta Diosta piñachirqankichik, chayraykum qamkunapaq piñakuruspa yaqalla chinkarachisurqankichik.

⁹Ñoqam orqoman qespirqani tabla rumikunata chaskiq. Rirqaniqa qamkunawan Tayta Diospa pacto ruwasqan tabla rumikuna chaskiqmi. Chay orqopim tawa chunka punchaw hinaspa tawa chunka tuta kamurqani, mana mikuspa nitaq yakutapas tomaspa.

¹⁰Hinaptinmi Tayta Dios iskay tabla rumikunata qowarqa, chaykunapim kikinpa qellqasqan kamachikuykuna karqa, chaykunaqa karqa huñunakusqanchik punchawpi orqomanta ratachkaq ninapa chawpinmanta nisusqaykichik kamachikuykunam.

¹¹Tawa chunka punchawwan tawa chunka tuta pasaruptinmi, Tayta Diosqa pacto ruwasqanta chay iskay tabla rumikunapi qowarqa.

¹²Hinaspam niwarqa: “Chaylla kutiy, Egipto nacionmanta hurqomusqayki runakunam huchallikurunku, manapas unaypim kamachisqaykunata mana cumplispanku qorita chulluchisqa idolota ruwakurunku”, nispa.

¹³Tayta Diosqa niwarqataqmi: “Kunanmi qawani kay runakunaqa ancha rumi sonqo kasqankuta.

¹⁴Ama harkawaychu, wañurachispay sutinkutapas kay pachamanta chinkarachisaq. Hinaspaymi qampa miraynikimantaña paykunamantapas aswan atiyniyuq nacionta hatarichispay achkallataña mirachisaq”, nispa.

¹⁵Chaymi ratachkaq orqomanta uraykamurqani chay pactota iskay tablakunapi marqarikuspay.

¹⁶Hinaspam Señornikichik Tayta Diospa contranpi huchallikusqaykichikta qawaykurqani. Qamkunam Tayta Diospa kamachisqankunata manapas unaypi saqeruspa metalta chulluchispa malta toroman rikchakuq idolotaña ruwakururqankichik.

¹⁷Chaymi iskay tabla rumikuna apamusqayta qamkunapa qayllaykichikpi chamqaruspay challururqani.

¹⁸Chaymantam Tayta Diospa qayllanpi qonqorakuykurqani, hinaspam ñawpaqta hina tawa chunka punchaw hinaspa tawa chunka tuta mana mikurqanichu nitaq yakutapas tomarqanichu. Chaynatam Tayta Diospa contranpi huchallikuspa piñachisqaykichikmanta ruwarqani.

¹⁹Contraykichikpi anchata piñakuruspan wañuchisunaykichikpaq kaptinmi mancharikurqani; chaywanpas Tayta Diosqa huktawanmi mañakusqayta uyariykuwarqa.

²⁰Tayta Diosqa Aaronpaqpas anchata piñakuspanmi wañurachiyta munarqa, ichaqa paypaqpas mañakurqanim.

²¹Huchallikunaykichikpaq ruwasqaykichik toroman rikchakuq idolotapas kañaruspaymi ñutuy-ñutuyta kutaruspa orqomanta uraykamuq mayuman machqeykurqani.

²² Tabera lawpipas, Masah lawpipas hinaspa Kibrot-hataava lawpipas Tayta Diostaqa piñachirqankichikmi.

²³Cades-barnea llaqtamanta qosunaykichik allpaman rinaykichikpaq kamachisuptikichikpas Señornikichik Tayta Diostaqa manam kasurqankichikchu. Manam paypiqa hapipakurqankichikchu nitaqmi uyariytapas munarqankichikchu.

²⁴Qamkunaqa reqsisqay punchawmantapunim Tayta Diosta mana kasukuq runakuna karqankichik.

²⁵Wañuchisunaykichikpaq Tayta Dios rimasqanraykum paypa qayllanpi tawa chunka punchaw hinaspa tawa chunka tutan qonqorakuykurqani.

²⁶Qayakuspaymi Tayta Diosta nirqani: “Señor Diosnilláy, kikikipa runaykikuna kasqankuraykuyá paykunataqa ama chinkarachiychu. Paykunataqa hatun atiynikiwanmi libramurqanki, Egipto nacionmantapas hatun atiynikiwanmi hurqomurqanki.

²⁷Serviqniki Abrahamta, Isaacta hinaspa Jacobta yuyarispa kay runakunapa rumi sonqo kayninkuta, mana allin ruwayninkuta, huchallikuyninkuta ama kaqpaqpas hapiychu.

²⁸Yanqañataq hurqomuwasqaykiku nacionpi kaqkuna ninmanku: Tayta Diosqa manam prometesqan allpaman pusaykuyta atirqachu. Cheqnispanmi paykunata hurqorurqa chunniqpi wañurachinanpaq, nispanku.

²⁹Paykunaqa qampa runaykikunam, hatu-hatun atiynikiwantaqmi hurqomurqankipas”, nispay.